រតនៈគីរី ៖ នាព្រឹកថ្ងៃទី១២ខែកុម្ភៈឆ្នាំ២០១៩ឯកឧត្តមនាយឧត្តមសេនីយ៍ខេង សុមេធអគ្គស្នងការរងនគរបាលជាតិនិងឯកឧត្តម ថងសាវុនអភិបាលខេត្តរតគិរីបានអញ្ជើ្មញជាអធិបតីដ៏ខ្ពង់ខ្ពស់ក្នុងពិធីប្រកាសផ្ទេរភារកិច្ចនិងតែងតាំងមុខតំណែងស្នងការនៃស្នងការដ្ឋាននគរបាលខេត្តរតគិរី។
មានប្រសាសន៍ក្នុងពិធីប្រកាសផ្ទេរនិងតែងតាំងមុខតំណែងមន្ត្រីនគរបាលជាន់ខ្ពស់ខាងលើឯកឧត្តម នាយឧត្តមសេនីយ៍ ខេង សុមេធបានធ្វើការព្រមានដល់មន្ត្រីក្រោមឱវាទ មិនត្រូវយកតួនាទីរបស់ខ្លួនធ្វើជាមុខរបរឡើយ ដើម្បីចៀសវាងការចោទប្រកាន់ពីមហាជនទូទៅ ដែលនាំឲ្យប៉ះពាល់ដល់តម្លៃនិងសេចក្តីថ្លៃថ្នូវិន័យរបស់មន្ត្រីនគរបាលប្រសិនបើរកឃើញថាមន្ត្រីរូបណាប្រព្រឹត្តទង្វើបែបនេះ ត្រូវទទួលទោសទៀតផង ។
ឯកឧត្តម នាយឧត្តមសេនីយ៍ ខេង សុមេធអគ្គស្នងការរងនគរបាលជាតិមានប្រសាសន៍ថាក្នុងនាមជាមន្ត្រីនគរបាល ជាអ្នកបម្រើប្រជាជន ត្រូវតែបំពេញនូវកាតព្វកិច្ចរបស់ខ្លួនរៀងៗខ្លួននិងរក្សាបាននូវសេចក្តីថ្លៃថ្នូ សាមគ្គីផ្ទៃក្នុងអង្គភាពឲ្យបានរឹងមាំដើម្បីធានាបាននូវការបំពេញកិច្ចការងារប្រកបដោយប្រសិទ្ធភាព តម្លាភាពកាន់តែប្រសើរឡើង។
តែទោះជាបែបនេះក្តីឯកឧត្តម បន្តថា មន្ត្រីនគរបាលទាំងអស់ ត្រូវចៀសវាងឲ្យបានជាដាច់ខាតរាល់ការយកតួរនាទី ភារកិច្ចរបស់ខ្លួនទៅធ្វើជាមុខរបរនិងគៀបសង្កត់មន្ត្រីក្រោមឱវាទក្នុងអង្គភាពតាមគ្រប់រូបភាពណាក៏ដោយ។ប្រសិនបើរកឃើញថាមន្ត្រីរូបណាបានប្រព្រឹត្តទង្វើអសកម្មណា មួយក្នុងអង្គភាពមន្ត្រីនោះនឹងត្រូវតែទទួលទោសជាមិនខានឡើយ។
ជាមួយគ្នានេះដែរ ឯកឧត្តម ថង សាវុន អភិបាលខេត្តរតនគិរីក៏បានជម្រុញឲ្យមន្ត្រីនគរបាលគ្រប់មូលដ្ឋានទាំងអស់ត្រូវបង្កើនការសហការគ្នាជាមួយអាជ្ញាធរពាក់ព័ន្ធគ្រប់លំដាប់ថ្នាក់ទាំងអស់ត្រូវធ្វើយ៉ាងណាបន្តរួមគ្នាបំពេញភារកិច្ចដែលរាជរដ្ឋាភិបាលប្រគល់ ជូន ដើម្បីរក្សាបាននូវសន្តិសុខ សណ្តាប់ធ្នាប់និងសុវត្ថិភាពការរស់នៅរបស់ប្រជាពលរដ្ឋទូទាំងខេត្តរតនគិរីឲ្យមានភាពកក់ក្តៅជាពិសេសនោះត្រូវបន្តស្រាវជ្រាវបង្ក្រាបឲ្យបានរាល់បទល្មើសផ្សេងៗដែលកើតមានក្នុងមូលដ្ឋានឲ្យមានប្រសិទ្ធភាពបំផុត ។
ឯកឧត្តមឧត្តមសេនីយ៍ទោយិនចំណានស្នងការដ្ឋាននគរបាលខេត្តរតនគិរីរដែលទើបតែងតាំងថ្មីបានប្តេជ្ញាអនុវត្តឲ្យបានម៉ឹងម៉ាត់បំផុតរាល់ការដាក់ចេញនូវបទបញ្ជារបស់ថ្នាក់ដឹកនាំជាពិសេសនោះធ្វើឲ្យផ្ទៃក្នុងអង្គភាពកាន់តែមានភាពរឹងមាំ សម្តៅដល់ការ បម្រើ ការពារផលប្រយោជន៍ប្រជាពលរដ្ឋប្រកបដោយប្រសិទ្ធភាព ខ្ពស់។
សូមបញ្ជាក់ថា ការផ្ទេរ និងតែងតាំងមុខតំណែងស្នងការដ្ឋានខេត្តរតនគិរីថ្មីនេះគឺតែងតាំងឯកឧត្តម ឧត្តមសេនីយ៍ទោយិនចំណាន ជំនួសឯកឧត្តម ឧត្តមសេនីយ៍ទោងួនគឿនដែលត្រូវបានចូលនិវត្តន៍ ៕
ដោយ ៖ ចាប សំអាន