ក្រចេះ ៖ ជនសង្ស័យម្នាក់ក្នុងចំណោមបក្ខពួក៣នាក់ ត្រូវកម្លាំងនគរបាលឃាត់ខ្លួនពាក់ព័ន្ធករណីសម្លាប់អ្នកកាសែតម្នាក់កាលពីយប់ថ្ងៃទី៣ ខែគុម្ភះ ឆ្នាំ២០១៩ នៅចំនុចផ្លូវបំបែក៨៨ ឃុំ ២ធ្នូ ស្រុកស្នួល ខេត្តក្រចេះ។
ការឃាត់ខ្លួនជនសង្ស័យខាងលើ គឺធ្វើឡើងនៅថ្ងៃទី៧ ខែគុម្ភះ ឆ្នាំ២០១៩ នៅចំនុចភូមិជើងឃ្លេ ឃុំ២ធ្នូ ស្រុកស្នួល។
នគរបាលបានឲ្យដឹងថា ជនសង្ស័យឈ្មោះ វ៉ន វិញ ភេទប្រុស អាយុ១៩ឆ្នាំ រស់នៅភូមិ ឃុំកើតហេតុ ក្រោយពីឃាត់ខ្លួនបានសមត្ថកិច្ចបានសួរនាំ ជនសង្ស័យរូបនោះឆ្លើយសារភាពថា នៅថ្ងៃកើតហេតុខ្លួន និងបក្ខពួកចំនួន ៣នាក់រួមមាន÷ ទី១ឈ្មោះ លឹម សុខគង់ ភេទប្រុស អាយុ ២១ឆ្នាំរស់នៅភូមិដង្កោ ឃុំទ្រៀក ស្រុកមេមត់ ខេត្តត្បូងឃ្មុំ រត់គេចខ្លួនបាត់ ទី២ឈ្មោះ រឹត សីហា ភេទប្រុស អាយុ២១ឆ្នាំរត់គេចខ្លួន រស់នៅចំនុចគីឡូម៉ែត្រ ៩០ ភូមិជើងឃ្លេ ឃុំ២ធ្នូ ស្រុកស្នួល ខេត្តក្រចេះ។ ទី៣- រូបខ្លួនផ្ទាល់ជិះម៉ូតូ១គ្រឿងគ្នា៣នាក់ក៏ធ្វើសកម្មភាពមកស្ទាកវាយជនរងគ្រោះពេលនោះឈ្មោះ រិត សីហា និងឈ្មោះ លឹម សុខគង់ ជាអ្នកយកដុំថ្មគប់ទៅលើជនរងគ្រោះ បណ្ដាលឲ្យធ្លាក់ពីលើម៉ូតូតែម្ដង។
ពេលធ្វើសកម្មភាពរួច ជនសង្ស័យឈ្មោះ វ៉ន វិញ បានទាក់ទងមិត្តភក្តិឈ្មោះ រដ្ឋា ភេទប្រុស អាយុប្រហែល១៧ឆ្នាំ មកឌុបឈ្មោះ រឹត សីហា ទៅបាត់ចំណែកខ្លួន ជិះម៉ូតូជាមួយឈ្មោះ លឹម សុខគង់ មកផ្ទះវិញ លុះដល់ស្អែកឡើងទើបដឹងថា ជនរងគ្រោះឈ្មោះស៊ន សិទ្ធិ ស្លាប់។
សូមបញ្ជាក់ថា នៅវេលាម៉ោង២២និង៣នាទីយប់ថ្ងៃទី៣ ខែគុម្ភះ ជនរងគ្រោះឈ្មោះ ស៊ន សិទ្ធិ អាយ១៩ឆ្នាំ រស់នៅភូមិក្បាលស្នួល ឃុំស្នួល ស្រុកស្នួល ខេត្តក្រចេះ ជាអ្នកកាសែត ត្រូវជនសង្ស័យស្ទាក់ផ្លូវវាយ និងគប់នៅចំនុចផ្លូវបំបែក៨៨ ភូមិជើងឃ្លេ ឃុំ២ធ្នូ ស្រុកស្នួល បណ្ដាលឲ្យធ្លាក់ពីលើម៉ូតូស្លាប់នៅកន្លែងកើតហេតុ។
បច្ចុប្បន្ន ជនសង្ស័យដែលសមត្ថកិច្ចឃាត់ខ្លួននោះកំពុងឃុំខ្លួនបណ្ដោះអាសន្ននៅ អធិការរដ្ឋាននគរបាលស្រុកស្នួល ដើម្បីសួរនាំកសាងសំណុំរឿងទៅការិយាល័យជំនាញសួរនាំបន្ដ ៕
ដោយ កិះខន
