ភ្នំពេញ៖ គិតត្រឹមខែ កញ្ញា ឆ្នាំ ២០១៨ កម្ពុជាជំពាក់លុយបរទេស ចំនួន ៦៨២៥លានដុល្លារអាមេរិក ។ នេះបើតាមរបាយការណ៍របស់ នាយកដ្ឋានថវិកានៃក្រសួងសេដ្ឋកិច្ច និងហិរញ្ញវត្ថុ។
បើតាមសេចក្តីព្រាងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០១៩ បានឲ្យដឹងថា ឆ្នាំ២០១៩នេះ រាជរដ្ឋាភិបាលកម្ពុជា គ្រោងនឹងខ្ចីប្រាក់ពីដៃគូអភិវឌ្ឍន៍បរទេស ក្នុងទឹកប្រាក់ប្រមាណជិត ២ពាន់លានដុល្លារបន្ថែមទៀត ដើម្បីលើកកម្ពស់ភាពប្រកួតប្រជែង និងផលិតភាពសេដ្ឋកិច្ច ដែលរួមមានវិស័យថាមពល ធារាសាស្ត្រ ហេដ្ឋារចនាសម្ព័ន្ធ និងវិស័យអាទិភាពផ្សេងទៀត ដូចជា វិស័យកសិកម្ម សុខាភិបាល ហិរញ្ញវត្ថុ ផ្គត់ផ្គង់ទឹកស្អាត អប់រំ និងបណ្តុះបណ្តាលជំនាញវិជ្ជាជីវៈ។
បំណុលបរទេស ដែលកម្ពុជាជំពាក់ច្រើនជាងគេ គឺ ៤៨.៣ ភាគរយ ជាបំណុលរបស់ចិន, ២៩ភាគរយ ជាបំណុលទ្វេភាគីផ្សេងទៀត, ៩.១ភាគរយ ជាបំណុលចាស់ដែលកំពុងចរចាដោះស្រាយ, ៥.២ភាគរយ ជំពាក់កូរ៉េខាងត្បូង, ៤.៤ភាគរយ ជំពាក់ជប៉ុន និង ៤ភាគរយ ជាបំណុលទ្វេភាគី។ ដើម្បីដោះស្រាយបំណុល រដ្ឋាភិបាលកម្ពុជា គ្រោងនឹង បង្កើនមូលធនជាតិតាមរយៈការចេញលក់មូលបត្របំណុល។ ក្រសួងសេដ្ឋកិច្ចហិរញ្ញវត្ថុ បានឲ្យដឹងថា កម្ពុជាកំពុងអភិវឌ្ឍទីផ្សារមូលប័ត្រ ដែលនឹងដាក់លក់លើទីផ្សារ នៅត្រឹមឆ្នាំ ២០១៩ ដែលការចេញលក់មូលប័ត្របំណុលនេះ មានន័យថា ការខ្ចីប្រាក់ក្នុងមូលដ្ឋាន មានហានិភ័យទាបជាងការខ្ចីពីបរទេស។
គួរបញ្ជាក់ថា បើតាមរយៈក្រសួងសេដ្ឋកិច្ចនិងហិរញ្ញវត្ថុ បានឲ្យដឹងថា ប្រាក់កម្ចីពីបរទេស ពិសេស ប្រទេសចិន បានចូលរួមចំណែកដ៏សំខាន់ក្នុងការអភិវឌ្ឍ និងជំរុញកំណើនសេដ្ឋកិច្ច ពោល ចិនគឺជាប្រភពផ្តល់ប្រាក់កម្ចីធំជាងគេសម្រាប់អភិវឌ្ឍសេដ្ឋកិច្ចកម្ពុជា៕