កំពង់ឆ្នាំង ៖ ប្រជាពលរដ្ឋចំនួន៦គ្រួសារតំណាងអោយ ៦១ គ្រួសារដែលធ្លាប់រងការបណ្ដេញចេញពីទីតាំងអធិការដ្ឋាននគរបាលស្រុកជលគិរី ក្នុងអំឡុងឆ្នាំ១៩៩០- ១៩៩១ បានចេញមុខតវ៉ា បន្ទាប់ពីលេចធ្លាយព័ត៌មានថា៖ទីតាំងដីអធិការដ្ឋាននគរបាលស្រុកជលគីរី ត្រូវបានគេពុះឡូត៍លក់ ទៅឱ្យអ្នកដទៃ និងអ្នកមានលុយ ដោយមិនបានគិតគូពួកគាត់ដែលធ្លាប់រស់នៅលើដីនោះតាំង ពីឆ្នាំ១៩៧៩ មកនោះឡើយ ។
ប្រជាពលរដ្ឋទាំងនោះបានលើកឡើងថា៖ ពួកគាត់បានចូលមករស់នៅក្នុងទីតាំងដីខាងលើ នោះ តាំងពីឆ្នាំ១៩៧៩ មកម្លេះគឺមិនទាន់មានអង្គភាពអធិការដ្ឋាននគរបាល តាំងនៅទីនោះឡើយ ។ ប៉ុន្តែក្រោយមកក៏បានបង្កើតឲ្យមានអធិការរដ្ឋាននគរបាលស្រុកជលគិរី នៅទីនោះ ហើយបានបណ្ដេញប្រជាពលរដ្ឋចេញអោយទៅតាមជើងភ្នំដែលជាទីកប់ខ្មោចដូចជាទៅនៅចំណុចវត្តលោកតាពេជ្រ ខាងលិចភ្នំស្ដេចស៊ីដោះ និងប្រជាពលរដ្ឋខ្លះទៀតត្រូវគេជម្លៀសអោយទៅនៅចំណុចអ្នកតាច្រកខាងកើតភ្នំស្ដេចស៊ីដោះជាដើម។
ក្រោយពីរៀបចំអោយកើតមានជាអគារអធិការដ្ឋានគរ ស្រុកជលគីរីហើយ ពួកគាត់ត្រូវបានបណ្តេញចេញនៅអំឡុងឆ្នាំ១៩៩០ និង១៩៩១ ក្នុងសម័យរដ្ឋកម្ពុជា ។ការបណ្តេញចេញពីក្នុងទីតាំងបរិវេណអធិការដ្ឋាននគរបាលស្រុកជលគីរី នាសម័យនោះ មិនមែនដេញដោយសន្តិវិធីនោះទេ គឺប្រើអំពើហឹង្សារុះរើ និងសែងផ្ទះពួកគាត់ចេញទៀតផង។ ប្រជាពលរដ្ឋក៏ព្រមចាកចេញ ដោយខ្លះបានទៅរស់នៅតាមជើងភ្នំនិងខ្លះក៏ទៅកាយដីក្បែរផ្នូរសពដើម្បីយកទីតាំងធ្វើផ្ទះរស់នៅ រហូតដល់សព្វថ្ងៃ ។
ប៉ុន្តែនៅចុងឆ្នាំ២០១៨ ក្រោយពីទីតាំងអធិការដ្ឋាននគរបាលត្រូវបានព័ទ្ធរបងជុំវិញររួចហើយ ក៍បានលេចធ្លាយព័ត៌មានឮថា៖ដីនៅក្នុងអធិការដ្ឋាននគរបាលស្រុកជលគីរី នោះត្រូវបានគេពុះឡូត៍លក់អស់ហើយ ដោយក្នុងមួយឡូ ត៍មានទំហំ៥មគុណនិង២០ម៉ែត្រក្នុងតម្លៃ ចាប់ពី៨៥០០ដុល្លារ ទៅជាង១ម៉ឺន៥ពាន់ដុល្លាឯណោះ។
ការលក់ទីតាំងអធិការដ្ឋាន នេះគឺលក់ជាសម្ងាត់នោះគេមិនបើកទូលាយនោះទេ បើអ្នកណាចង់ទិញដីនៅក្នុងបរិវេណអធិការស្រុកជលគីរីនោះត្រូវទៅបង់លុយ អោយទៅក្នុងកុង ធនា គារអេស៊ីលីដា ដែលគេបើកលេខគណនី ក្នុង ធនាគារនោះស្រាប់ ។
ប្រភពពីប្រជាពលរដ្ឋបានអោយដឹងថាពួកគាត់បានលើកឡើងថា៖បើគេយកទីតាំងនេះ បន្តធ្វើអធិការដ្ឋាននគរបាលបន្តទៀត ពួកគាត់នឹងមិនតវ៉ានោះទេ។
ប៉ុន្តែបើសិនជាយកទីតាំងនេះពុះឡូត៍ លក់ពិតមែន ពួកគាត់នឹងមិនសុខចិត្តឡើយ ។ ពួកគាត់សូមសំណូមពរសុំ ដល់ប្រមុខរាជរដ្ឋាភិបាលពិសេស សម្ដេច ហ៊ុនសែន សូមមេត្តាជួយអន្តរាគមន៍យកដីនោះមកឱ្យ ពួកគាត់វិញផង ។ឬបើគេលក់ដីរបស់ពួកគាត់ហើយគួរយកលុយមកអោយគាត់វិញក្នុងតម្លៃសមស្របណាមួយ ។
ជុំវិញការលើកឡើងខាងលើនេះ លោក ហ៊ឹម យ៉ង់នាយអធិការដ្ឋាននគបាលស្រុកជលគីរីបានប្រាប់អោយដឹងថាលោកមិនបានដឹងអ្វីនោះទេ។ ចំពោះលោកគឺដូចជាទីមោងដែលគេអោយចាំដីអញ្ចឹង បើចង់ដឹងសូមសួរទៅលោកមេមេៗទៅគឺអោយសួរទៅលោកហៃ មនោរម្យ អភិបាលស្រុជលគីរី និសួរទៅលោកឡុច វណ្ណរាស្នងការនគបាលខេត្តទៅ។ប៉ុន្តែលោកហៃ មនោរម្យទូរស័ព្ទចូលមិនមានអ្នកទទួល។
ចំណែកលោកឡុច វណ្ណារ៉ា ស្នងការនគរបាលខេត្តកំពង់ឆ្នាំង បានបញ្ជាក់ថា៖គ្មានការលក់ដូរ ដីនៅអធិការរដ្ឋាននគរបាលស្រុកជលគីរីនោះទេ ប្រយ័ត្នចាញ់បោកគេ ។ ព្រោះការទិញលក់ដរាបណាមានលិខិតទិញលក់ និងលិខិត ទទួលប្រាក់ត្រឹមត្រូវ រឿងអីត្រូវយកលុយទៅបង់នៅធនាគារ ដោយ គ្មានឯកសារអ្នកប្រគល់ អ្នកទទួលបែបនេះ ប្រយ័ត្នចាញ់បោកគេ។
បីទោះយ៉ាងនេះក្តី លោក ហៃ មនោរម្យ អភិបាលស្រុកជលគីរី បាននិយាយខុសពីស្នងការនគរបាលខេត្ត ដោយលោកបានបញ្ជាក់ថា៖ អាគារដែលកំពុងសាងសង់នៅមុខគណបក្សប្រជាជនស្រុកជលគីរី គឺជាអាគារ អធិការដ្ឋាននគរបាលស្រុកជលគីរីថ្មី ពិតណាស់មិនមានការលក់ដូរ ទីតាំងអធិការដ្ឋាន នគរបាលចាស់នោះទេ ប៉ុន្តែ ធ្វើនេះដូចនៅស្នងការដ្ឋាននគរបាលចាស់យ៉ាងដូច្នេះដែរ គឺកិច្ចការនេះឯកឧត្តមអភិបាលខេត្ត អោយបង្កើតគណៈកម្មការ វាយ តម្លៃ មានការចូលរួមពីថ្នាក់ជាតិ ។
ចំណែករឿង អោយប្រជាពលរដ្ឋ ចេញពីកន្លែងធ្វើការរដ្ឋ កាលពីជំនាន់សម័យសាធារណៈរដ្ឋ ប្រជាមានិតកម្ពុជា គឺបានដោះស្រាយគោលនយោបាយអស់ហើយ ដោយពួកគាត់មានដី និងសង់ផ្ទះបានសមរម្យអស់ហើយ ។
សូមបញ្ជាក់ដែរថា ជាការពិតណាស់ប្រជាពលរដ្ឋជាច្រើនដែលទិញដីក្នុងអធិការដ្ឋាននគរបាល ហើយបានយកលុយទៅបង់នៅអេស៊ីលីដាបានបញ្ជាក់ថា៖ពួកគាត់បានបង់តាមលេខកូដគណនីបញ្ញើរសន្សំសំចៃ ដែលឈ្មោះ ហឹម យ៉ុង អធិការនគរបាលស្រុកជលគីរីនោះ អោយនោះមែន ប៉ុន្តែមកដល់ពេលនេះ ពួកគាត់ទៅជាព្រួយបារម្មណ៍ ទៅវិញ ព្រោះលុយអោយគេអស់ហើយ តែមិនទាន់បានដីនៅឡើយ ។
ជាមួយគ្នានេះ ប្រជាពលរដ្ឋ ដែលមានដីផ្ទះ ជាប់របងពីខាងត្បូងអធិការដ្ឋាននគរបាល មាន១១គ្រួសារ បានបញ្ជាក់ថាៈ កាលពីរបងអធិការដ្ឋានមិនទាន់ធ្វើ លោកអធិការបានមកប្រាប់ប្រជាពលរដ្ឋថាៈ បើចង់សល់ដីក្រោយផ្ទះបន្ថែមទៀត ត្រូវអោយលុយ ដោយខ្លះ២ពាន់ទៅ៣ពាន់ដុល្លា ទើបគេធ្វើរបងអធិការបង្រួមចូលក្នុង ដើម្បីអោយពួកគាត់ជាប្រជាពលរដ្ឋ សល់ដីក្រោយផ្ទះចាប់ពី៣ទៅ៤ម៉ែត្រ ។
ជុំវិញករណីដីអធិការដ្ឋាននគរបាលស្រុកជលគីរីនេះដែរប្រជាពលរដ្ឋជាច្រើនបានសំណូមពរដល់ក្រសួងពាក់ព័ន្ធពិសេសក្រសួងមហាផ្ទៃសូមចុះមកធ្វើអធិការកិច្ច នៅអធិការដ្ឋាននគរបាល ស្រុកជលគីរីនេះផង ថាតើការដោះដូរបែបនេះជារឿងត្រឹមត្រូវដែរឬទេ? ៕
