ភ្នំពេញ ៖ នៅរាត្រីថ្ងៃអាទិត្យ ទី០៣ ខែកុម្ភៈ ឆ្នាំ២០១៩ក្នុងវគ្គផ្តាច់ព្រ័ត្រ កម្មវិធីចុងភៅឯកខ្មែរ MasterChef Khmer រដូវកាលទី១ របស់ស្ថានីយទូរទស្សន៍ CTN បានរកឃើញ
កំពូលចុងភៅឯកMaster Chef Khmer ជាមួយនឹងរង្វាន់ជាទឹកប្រាក់ ៥ម៉ឺនដុល្លារសហរដ្ឋអាមេរិកហើយ។
មានបេក្ខជន កំពូលចំនួន៣រូប បានធ្វើការ ប្រកួតប្រជែងគ្នា នៅទីបំផុតក្នុងចំណោមបេក្ខជនទាំងបី បេក្ខជនដារ៉ាដែលជាមន្ត្រីប៉េអឹម បានយកឈ្នះបេក្ខជនឆ្មោះ ហុក និងឈ្មោះ ផានីន ។ សូមជម្រាបថា ដារ៉ា ជាបេក្ខជនម្នាក់ដែលយើងសង្កេតឃើញថា មានបេក្ខជនជាច្រើនតែងតែចង់ប្រកួតប្រជែងជាមួយគាត់យ៉ាងខ្លាំង ដោយសារតែគាត់ ជាបេក្ខជនម្នាក់ដែលមានស្នាដៃលេចធ្លោក្នុងការច្នៃមុខម្ហូបដ៏ល្អ ដែលអាចទាក់ទាញចិត្តគណៈកម្មការទាំង ៣ ។ កន្លងមក ដារ៉ា ក៏ធា្លប់ជាមេក្រុម ដែលបានដឹកនាំក្រុម អោយទទួលបានជ័យជំនះ ក្នុងការប្រកួតជាក្រុមទៀតផង។
ឯ បេក្ខជន២នាក់ទៀត គឺ ហុក ជាបេក្ខជនម្នាក់ ដែលមានស្នាដៃចំអិនម្ហូបមិនសូវល្អ ។ចាប់ផ្តើមកម្មពីកម្មវិធីដំបូង គាត់សឹងតែដើរចេញពីកម្មវិធីជាច្រើនសប្តាហ៍បន្តបន្ទាប់គ្នា ។ ប៉ុន្តែ ដោយភាពខិតខំប្រឹងប្រែងរបស់គាត់ បានធ្វើអោយគាត់ មានការរីកចម្រើនគួរកត់សម្គាល់ពីមួយសប្តាហ៍ ទៅមួយសប្តាហ៍ ។
លោក ហុក ក៏ធ្លាប់ជាប្រធានក្រុមម្នាក់ ដែលបានលះបង់នូវសិទ្ធិទទួលបានសុវត្ថភាព អោយទៅកូនក្រុម ជំនួស នៅពេលដែលគាត់មិនបានដឹងនាំក្រុមអោយទទួលបានជ័យជំនះ ក្នុងវគ្គប្រកួតជាក្រុម ។
ឈ្មោះផានីន ជាបេក្ខជនជើងខ្លាំងមួយរូប ក្នុងចំណោមបេក្ខជនទាំង ២៥រូប ដោយសារតែគាត់ ធ្លាប់ទទួលបានជ័យលាភីល្អ ក្នុងវិញ្ញាសារប្រអប់អាថ៌កំបាំង ហើយអាចចូលទៅក្នុងបន្ទប់ដាក់គ្រឿងផ្សំ ដើម្បីជ្រើសរើសវិញ្ញាសារអោយបេក្ខជនដទៃ ។ ទោះបីជាពេលខ្លះ ពេលធ្វើជាប្រធានក្រុម មិនទទួលបានជ័យជំនះញឹកញាប់ក៏ដោយ ក៏គាត់ នៅតែជាបេក្ខជនមួយរូប ដែលមានភាពប៉ិនប្រសព្វ ក្នុងការច្នៃម្ហូបខ្មែរ អាស៊ី និង អឺរ៉ុប យ៉ាងស្ទាត់ជំនាញ។គេមិនដឹងថាតើបេក្ខជនលេខ២និងលេខ៣នឹងទទួលបានអ្វីជាការលើកទឹកចិត្តនោះទេ!។
