ខេត្តកំពត៖ កាលពីល្ងាចថ្ងៃទី០៣ ខែកុម្ភះ ឆ្នាំ២០១៩ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពតបានបង្ហាញមុខ ជនសង្ស័យ ដែលជាប់ពាក់ព័ន្ធករណីឃាតកម្មលើលោក អ៊ួន វណ្ណា បានចំនួន០៦នាក់ជូនប្រជាពលរដ្ឋចំនួនជាង១០០នាក់ និង ក្រុមគ្រួសារសពលោក អ៊ួន វណ្ណា ដែលត្រូវបានឃាត.កសម្លាប់យ៉ាងសាហាវព្រៃផ្សៃបំផុត កាលពីវេលាម៉ោង២០និង៣០នាទីយប់ ថ្ងៃទី៣១ ខែមករា ឆ្នាំ២០១៩កន្លងមកនេះ ។
សមត្ថកិច្ចឲ្យដឹងថា៖ ជនទាំង០៦នាក់ បានធ្វើសកម្មភាពហឹង្សាជាបន្តបន្ទាប់នៅតំបន់ដីទំនាស់ដ៏រ៉ាំរ៉ៃ ដែលស្ថិតក្នុងភូមិព្រៃពាយ ឃុំត្រពាំងភ្លាំង ស្រុកឈូក មិនក្រោមពី១០ករណីនោះទេ ដែលមានពាក្យបណ្តឹងមកដល់ស្នងការដ្ឋាននគរបាលខេត្តកំពត។ បន្ទាប់ពីធ្វើសកម្មភាពករណីឃាតកម្មហើយ បក្ខពួកជនដៃដល់ខាងលើ បានបន្ត ធ្វើសកម្មភាពរារាំងសាច់ញ្ញាតិជនរងគ្រោះមិនអោយដឹកសាកសពមកធ្វើបុណ្យតាមប្រពៃណី ទៀត។
ប្រជាពលរដ្ឋទាំង១០០នាក់ជាងបាន មកពិនិត្យមើលមុខសញ្ញាជនសង្ស័យទាំង០៦នាក់នេះ ថាតើពិតជាជនដែលជាប់ពាក់ព័ន្ធប្រើអំពើហឹង្សាកន្លងមកដែរឬអត់?។ ជនសង្ស័យទាំង០៦នាក់ខាងលើ គឺទី១ឈ្មោះ សឿន បុល ភេទប្រុស ទី២ឈ្មោះ មឿន វាសនាហៅខ្នា ភេទប្រុស ទី៣ឈ្មោះ ព្រីង ប់នួន ភេទប្រុស ទី៤ឈ្មោះ ង៉ែត ផុន ភេទប្រុស អ្នកទាំង៤រស់នៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត។
ទី៥ឈ្មោះហៀន ចាន់ ហៅចាន់ស្រម៉ូម ភេទប្រុស ទី៦ឈ្មោះតូច សារុំ ភេទប្រុស ២នាក់នេះគឺរស់នៅភូមិកំពុកចិន ឃុំស្ទឹងកែវ ស្រុកទឹកឈូ ខេត្តកំពត។
ចំពោះមុខសមត្ថកិច្ចប្រជាពលរដ្ឋជាង១០០នាក់បានបញ្ជាក់ថា ជនដែលឃាត់ខ្លួនទាំង០៦នាក់នេះ គឺជាកម្មករលោក អាំង ផល្លីន និងអ្នកស្រី ហ៊ាង សុគន្ធី ។ក្នុងចំណោមជនដៃដល់ គឺនៅមានមេការម្នាក់ទៀត ឈ្មោះ ចេក ជាបងប្អូនអ្នកស្រី ហ៊ាង សុគន្ធី កន្លងមកបានធ្វើសកម្មភាពយ៉ាងព្រៃផ្សៃ មកលើពួកគាត់ ព្រមទាំងកាប់បំផ្លាញដំពាំ ខ្ទមចំការ ផ្ទះសំបែង ដែលពួកគាត់រស់នៅអាស្រ័យផលនៅតំបន់ វាលវែង. វាលស្តៅ. ស្រែព្រៃ. ចំណោតផ្តាច់ព្រលឹង. ។
កន្លងមកមានប្រជាពលរដ្ឋខ្លះទៀតធ្លាក់ខ្លួនពិការភាព គឺដោយសារជនបង្កខាងលើធ្វើសកម្មភាពវាយដំយ៉ាងធ្ងន់ធ្ងរ ដែលពួកគាត់មិនព្រមប្រគល់ដីរបស់ខ្លួនអោយទៅក្រុមឈ្មួញរៀបចំដីគឺលោកអាំង ផល្លីន អ្នកស្រីហ៊ាង សុគន្ធី ដែលស្ថិតក្នុងភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត។
សូមរំលឹកថា ករណីឃាតកម្មកាលពីថ្ងៃទី៣១ ខែមករា កន្លងមកនេះ ជនរងគ្រោះគឺមានឈ្មោះ អ៊ួន វណ្ណា ភេទប្រុសអាយុ៤៨ឆ្នាំ បច្ចុប្បន្នស្នាក់នៅភូមិ ឃុំ កើតហេតុខាងលើ ។ការស្រាវជ្រាវ និងពិនិត្យកោសលវិច្ច័យឃើញថា៖ នៅលើសាកសព មានស្នាមរបួស បែកក្បាលពីក្រោយ ជាច្រើនកន្លែង និង រហែកមាត់ខាងឆ្វេងយ៉ាងអាណោច អាធម ។
ករណីឃាតកម្មខាងលើនេះ គឺជនរងគ្រោះស្នាក់នៅក្នុងចំការដីរបស់ខ្លួននៅតំបន់ស្រែព្រៃ ដែលជាដីទំនាស់ដ៏រ៉ាំរ៉ៃយូមកហើយ ដែលកន្លងមកពុំទាន់មានដំណោះស្រាយស្របច្បាប់នៅឡើយទេជាតំបន់ដីទំនាស់ដាច់ស្រយ៉ាល ភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត។