ព្រៃវែង ៖ លោកឧត្តមសេនីយ៍ត្រី ព្រុំ សន្ធរ ត្រូវបានតែងតាំងនិងប្រកាសឲ្យចូលកាន់តំណែងជាស្នងការនគរបាលខេត្តព្រៃវែង ជំនួសលោកឧត្តមសេនីយ៍ទោ ស្រេង ជា ដែលត្រូវចូលនិវត្តន៍ហើយនៅព្រឹកថ្ងៃទី០១ ខែកុម្ភៈ ឆ្នាំ២០១៩មុនចូលឆ្នាំចិន៣ថ្ងៃប៉ុណ្ណោះសម្រាប់ការចូលអបអរសាទរពីឈ្មួញនៅខេត្តព្រៃវែង។
លោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងលោក ជា សុមេធី អភិបាលខេត្តព្រៃវែង បានអញ្ជើញជាអធីបតី ក្នុងពិធីប្រកាសផ្ទេរភារកិច្ច និងតែងតាំងមុខតំណែងស្នងការនគរបាលខេត្តព្រៃវែងថ្មីនេះ។
សូមបញ្ជាក់ថា៖លោកឧត្តមសេនីយ៍ត្រី ព្រុំ សន្ធរដែលជាអតីតស្នងការរងរាជធានីភ្នំពេញ ត្រូវជាកូនប្រុសរបស់លោក ព្រុំ សុខា រដ្ឋលេខាធិការក្រសួងមុខងារសាធារណៈ(អតីតរដ្ឋលេខាធិការក្រសួងមហាផ្ទៃ) ។
ថ្មីៗនេះមានស្នងការនគរបាលខេត្តចំនួន០៣រូប ត្រូវបានដាក់ឲ្យចូលនិវត្តន៍រួម មាន៖ ១. លោកឧត្តមសេនីយ៍ទោ ស្រេង ជា ស្នងការនគរបាលខេត្តព្រៃវែង។ ទី២. លោកឧត្តមសេនីយ៍ទោ ជា ចាន់ឌិន ស្នងការនគរបាលខេត្តប៉ៃលិន និងទី៣. លោកឧត្តមសេនីយ៍ ឡុច វណ្ណារ៉ា ស្នងការនគរបាលខេត្តកំពង់ឆ្នាំង។ នេះបើយោងតាមព្រះរាជក្រឹត្យ ចុះថ្ងៃទី២៩ ខែកញ្ញា ឆ្នាំ២០១៨៕
