ត្បូងឃ្មុំ ៖ ពិតជាមានឥទ្ធិពលខ្លាំងមែនទែនឈ្មោះ ស្រ៊ុន ម្ចាស់សង្វៀនជល់មាន់ និងបើកល្បែងស៊ីសងគ្រប់ប្រភេទ នៅអន្លង់ជ្រៃ ស្រុកពញាក្រែកខេត្តត្បូងឃ្មុំ ព្រោះ គ្មានសមត្ថកិច្ច និងអាជ្ញាធរណាម្នាក់ហ៊ានចេញមុខរារាំង ឬបង្ក្រាប ដូចទីតាំងសង្វៀនមាន់នៅតាមបណ្តាខេត្តផ្សេងៗឡើយបើទោះជាបើកឲ្យខ្មែរចូលលេងខុសច្បាប់ក៏ដោយ។
កន្លងមកនេះសារព័ត៌មាន និង គេហទំព័រក្នុងស្រុកជាច្រើនបានផ្សព្វផ្សាយចង្អុលបង្ហាញប្រាប់ទីតាំងនិងសកម្មភាពបើកបនល្បែងស៊ីសងគ្រប់ប្រភេទ មាន បៀរ អាប៉ោង និងជាពិសេស ជល់មាន់និង បទល្មើសផ្សេងៗ កំពុងកើតមាន យ៉ាងគគ្រឹកគគ្រេងនៅក្នុងស្រុកពញាក្រែក ខេត្តត្បូងឃ្មុំ អាណាចក្រគ្រប់គ្រងដោយលោក ជាម ចាន់សោភ័ណ្ឌ តែគ្មានការយកចិត្តទុកដាក់ ទប់ស្កាត់ បង្ក្រាបសោះឡើយ គឺសម្ងំស្ងៀមឈឹង ធ្វើមិនដឹង មិនឮ ចំពោះព័ត៌មាន ផ្សព្វផ្សាយអំពីបនល្បែងនៅអន្លង់ជ្រៃនេះសោះឡើយ។
ទោះបីជាហៅកាសែតទៅផឹកស៊ីកាលពីថ្ងៃ៣០មករាក៏លោកជាមសោភណ្ឌ័ធើមិនដឹងរឿងហ្នឹងដែរ។
ប្រជាពលរដ្ឋបានរាយការណ៍អោយដឹងថា បនល្បែង ស៊ីសងខុសច្បាប់ ភ្នាល់ជល់មាន់ ក្រោយផ្ទះសំណាក់ ភូមិយើង នៅអន្លង់ជ្រៃ ស្រុកពញាក្រែក ខេត្តត្បូងឃ្មុំ សព្វថ្ងៃបាននឹងកំពុងបើកដំណើរការលេងស៊ីសងមានចម្ងាយ ប្រហែលជា ១៥០ម៉ែត្រពីផ្លូជាតិលេខ៨ ក្បែរភូមិគ្រឹះ សម្តេចពញាចក្រី ហេង សំរិន ដោយមានឈ្មោះស្រ៊ុនជាអ្នកគ្រប់ គ្រង និងមានមេការធំឈ្មោះណាន ជាអ្នកចេញមុខកាងបនល្បែងដ៏ធំនេះឲ្យថ្នាក់លើ? ។
តាមការរាយការណ៍តាមទូរស័ព្ទពី ប្រជាពលរដ្ឋបានបញ្ជាក់ថា ទីតាំងល្បែងស៊ីសងខាងលើនេះមានលេងអាប៉ោង បៀរ និងខ្លាំងជាងគេ គឺល្បែងជល់មាន់ ដែលក្នង១ថ្ងៃៗមានអ្នកញៀនល្បែងមានទាំងឧកញ៉ាៗ មន្ត្រីរាជការធំៗ ,មានទាហាន ប៉ូលិសខ្មែរ ជិះសុទ្ធតែឡានទំនើបៗចូលទៅលេងនៅក្នុងបនល្បែង ចាក់ភ្នាល់ស៊ីសង ចាញ់ឈ្នះរាប់រយ រាប់ ពាន់ដុល្លារអាមេរិក ស្រែកហ៊ោរកញ្ជ្រាវកងរំពងយ៉ាងអនាធិបតេយ្យ គ្មានការរំខានពីសមត្ថកិច្ចនគរបាលប៉េអឹម នៅទីនោះឡើយ ។
អ្នក ធ្លាប់ទៅលេង ល្បែងជល់មាន់នៅទីនោះម្នាក់ សុំមិនបញ្ចេញឈ្មោះ បានប្រាប់ អោយដឹងថា តាមដែលគាត់ធ្លាប់ចូលទៅលេង គឺខាងម្ចាស់សៃវៀនមាន់នៅអន្លង់ ជ្រៃឈ្មោះ ស្រ៊ុន ដែលគេស្គាល់ និងដឹងថាជាសាច់ញាតិរបស់លោកអភិបាលរងខេត្តត្បូងឃ្មុំ ឈ្មោះ គន់ សុភា និងឈ្មោះ ណាន ជាមេការបានប្រាប់ថា សូមកុំព្រួយបារម្ភពីការចុះចាប់ ឬបង្ក្រាបពីសមត្ថកិច្ចអី ព្រោះទីតាំងគាត់បានចំណាយលុយរត់ការបង់អោយសមត្ថកិច្ច និងអាជ្ញាធរដែនដីគ្រប់លំដាប់ថ្នាក់អស់ហើយ ១ខែៗអស់រាប់ ម៉ឺន ដុល្លារ កុំព្រួយ! ។ បើផ្អែកតាមសេច ក្តីរាយការណ៍ របស់ប្រជាពលរដ្ឋ ដែលព្រួយបារម្ភពីសុវត្ថិភាព និង សន្តិសុខក្នុងការរស់នៅក្នុងមូលដ្ឋានព្រោះថា កាលណាមានបនល្បែង គឺ ចោរកម្ម កើតឡើងនៅគ្រប់ទីកន្លែង ពួកគាត់ សូមសំណួមពរដល់ថ្នាក់ដឹកនាំខេត្តត្បូងឃ្មុំ មេត្តាជួយចាត់វិធានការបំបិទទីតាំងល្បែងស៊ីសងរបស់លោកស្រ៊ុន និង មេការឈ្មោះណាង ជ្រកក្រោមស្លាកកាស៊ីណូ ភូមិយើង នៅអន្លង់ជ្រៃ ស្រុកពញាក្រែក ខេត្តត្បូងឃ្មុំនេះផង ។
កាលពីថ្ងៃទី១៧ មករា ២០១៩ ការិយាល័យនិពន្ធយើង ទទួល បានការរាយការណ៍ តាមទូរស័ព្ទពីមន្ត្រីរាជការតូចតាចម្នាក់នៅសាលាខេត្ត ត្បូងឃ្មុំ សុំមិនបញ្ចេញឈ្មោះ បានប្រាប់ថា ទាំង ចៅហ្វាយខេត្ត ចៅហ្វាយខេត្តរង មេប៉េអឺម មេប៉ូលីសខេត្ត ត្បូងឃ្មុំ និងម្ចាស់ទីតាំងបនល្បែងស៊ីសងដែលមានឈ្មោះ ស្រ៊ុន និងមេការឈ្មោះណាង គឺពួកគេមិនភ្ញាក់ផ្អើល ឬ ព្រួយ បារម្ភអ្វីទេ ។ ប្រភពបន្តទៀតថា មន្ត្រីថ្នាក់ឡូសក្នុងខេត្តជា ច្រើនាក់និយាយបែបចំអកអោយក្រុមអ្នកកាសែត និងគេហ ទំព័រនានាដែលផ្សព្វផ្សាយអំពីល្បែងជល់មាន់នៅក្នុងទឹកដី ខេត្តត្បូងឃ្មុំ គឺពួកអ្នកកាសែតទាំងនោះអត់ស្គាល់ និងយល់ដឹងស៊ីជំរៅថា ទឺកដីត្បូងឃ្មុំ អ្នកដឹកនាំភាគច្រើនពោរពេញ ទៅដោយសែស្រឡាយ សាច់ញាតិ សម្តេច និង សាច់ញាតិមន្ត្រី ជាន់ខ្ពស់ក្នុងជួររាជរដ្ឋាភិបាលទេមើលទៅ?។
ជាក់ស្តែងទីតាំងបនល្បែងស៊ីសង ជល់មាន់នោះទៀតសោតក៏ស្ថិតក្នុងដីរបស់កុង្សីយ៍ក្រសួងសង្គមកិច្ច ជាប់ខ្សែស្រឡាយសម្តេចពញាចក្រីថែមទៀត ដូច្មេះត្រឹមថ្នាក់ចៅហ្វាយខេត្ត ម៉េចហ៊ានបង្ក្រាបចេះតែលំៗ យករួចខ្លួនម៉ាគ្រាៗទៅកុំខ្វល់រឿងកាសែតផ្សាយច្រើនពេក។ ប្រហែលជាចឹងហើយបានជាមិនឃើញ លោកនាយឧត្តមសេនិយ៍ នេត សាវឿន អគ្គស្នងការនគរបាលជាតិ និងសម្តេចក្រឡាហោម ស ខេង ដាក់ចេញវិធានការក្តៅដើម្បីចាត់ការទៅលើបនល្បែងស៊ីសង ជល់មាន់ដ៏កក្រើកនៅអន្លង់ជ្រៃ ស្រុកពញាក្រែក ខេត្តត្បូងឃ្មុំ។
ពិតជាមិនធម្មតាមែន លោកស្រ៊ុន បើកសង្វៀនមាន់ជល់បានខ្លាំងជាងសង្វៀនមាន់របស់លោក ហ៊ុន ជា ក្មួយសម្តេចតេជោនៅអរិយក្សត្រ ស្រុក ល្វាឯម ខេត្តកណ្តាលដែលត្រូវសមត្ថកិច្ចខេត្តកណ្តាល ចេញ មុខបង្ក្រាបឈូសបំផ្លាញចោលទីតាំង កាត់ទោសមាន់ជល់ ដោយកាត់ក្បាល ហើយសម្តេចតេជោបញ្ជាអោយតាមចាប់ លោក ហ៊ុន ជានិងកូនប្រសារលោកហ៊ុនសាន ដាក់គុកទៀត ។ តើលោកនាយឧត្តម សេនិយ៍ នេត សាវឿន និងសម្តេចក្រឡាហោម ស ខេង លោកទាំងពីរសម្ងំស្ងៀម ឬ រង់ចាំបញ្ជាពីសម្តេចតេជោ ហ៊ុន សែន ដាក់ចេញទើបចាត់ការ? ៕
