ខេត្តក្រចេះ ៖ លោក ទ្រី សុភក្ត្រ័ អតីតនាយខណ្ឌរដ្ឋបាលព្រៃឈើក្រចេះ ត្រូវបានប្រកាសឲ្យចូលកាន់ មុខតំណែង ជាប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តក្រចេះ ជំនួសលោក គុយ ហ៊ួត ដែលត្រូវបានប្ដូរទៅបំពេញការងារថ្មី នៅរាជធានីភ្នំពេញ។
ពិធីប្រកាសនេះ បានធ្វើឡើងក្រោមអធិបតីភាពឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងមានការចូលរួមពីឯកឧត្តម នូ ភឿង ប្រធានក្រុមប្រឹក្សាខេត្ត និងឯកឧត្តម វ៉ា ថន អភិបាលខេត្តក្រចេះ និងវត្តមានចូលរួមពីលោក លោកស្រី ប្រធាន អនុប្រធានមន្ទីរ ស្ថាប័ន ពាក់ព័ន្ធនានាជុំវិញខេត្តក្រចេះ នាព្រឹកថ្ងៃទី២៩ ខែមករា ឆ្នាំ២០១៩។
ឯកឧត្តម វ៉ា ថន អភិបាលខេត្តក្រចេះ បានថ្លែងថា វិស័យកសិកម្ម ពី១ឆ្នាំទៅ១ឆ្នាំ ផ្ទៃដីបង្កបង្កើនផល ដែលបានពង្រីកនិងបរិមាណស្រូវដែលទទួលបានមានកំណើនគួរឲ្យកត់សម្គាល់ ទោះបីឆ្នាំ២០១៨កន្លងទៅនេះខេត្តក្រចេះ ទទួលរងគ្រោះដោយទឹកជំនន់ទន្លេមេគង្គ និងទឹកភ្លៀងដែលបណ្ដាលឲ្យប៉ះពាល់ដល់ស្រូវវស្សាប្រមាណជា ៣,៩៨១ហិកតា និងខូចខាតប្រមាណ ៣,២០១ហិកតា ប៉ុន្តែត្រូវស្ដារឡើងវិញ ១,៩២២ហិកតា បន្ទាប់ទទួលបានការឧបត្ថម្ភស្រូវពូជពីរាជរដ្ឋាភិបាលចំនួន ៣រយតោន។ ទន្ទឹននឹងនោះ ខេត្តក្រចេះ មានក្រុមហ៊ុនវិនិយោគដីសម្បទានសេដ្ឋកិច្ចចំនួន ៤៩ក្រុមហ៊ុន លើដំណាំ កៅស៊ូ ស្វាយចន្ទី ដំឡូងមី ម៉ៃសាក់ និងចេក ជាដើម។
ថ្លែងក្នុងឱកាសនោះ ឯកឧត្តម វេង សាខុន ក៏បានណែនាំឲ្យលោក ទ្រី សុភក្ត្រ័ ជាប្រធានមន្ទីរ កសិកម្ម រុក្ខាប្រមាញ់ និងនេសាទខេត្តក្រចេះ ដែលទើបនឹងចូលកាន់តំណែង ឲ្យមានការ ខិតខំប្រឹងប្រែងបន្ថែមទៀត ពាក់ព័ន្ធលើការងារវិស័យកសិកម្មនេះ ពោលគឺត្រូវខិតខំ ជួយប្រជាពលរដ្ឋលើការដាំដុះ និងត្រូវខិតខំគិតគូររកទីផ្សារឲ្យពួកគាត់ផងដែរ។
ដោយឡែកការងារគ្រប់គ្រង នៅក្នុងអង្គភាព ឯកឧត្តមរដ្ឋមន្ត្រី បានណែនាំឲ្យលោក ប្រធានមន្ទីរកសិកម្ម ដែលទើបតែចូលកាន់មុខតំណែងនេះ ធ្វើកិច្ចការសហការគ្នា សាមគ្គីគ្នា ឲ្យបានល្អប្រសើរ និងត្រូវចេះមើលទៅលើ ឥរិយាបថការងាររបស់មន្ត្រីរបស់ខ្លួន ម្យ៉ាងទៀតបើសិនជាមន្ត្រីរបស់ខ្លួន គាត់ធ្វើកិច្ចការបានល្អ ប្រធានមន្ទីរ ត្រូវជួយជ្រោមជ្រែងគាត់ បណ្ដុះបណ្ដាលគាត់ លើកទឹកចិត្តគាត់ ជំរុញគាត់ឲ្យក្លាយទៅ ជាអ្នកដឹកនាំបន្តវេននោះ ទើបជាការប្រសើរ៕
