អាមេរិក៖ លោកស្រី ឈុន វណ្ណា តារាចម្រៀងជើងចាស់តាំងពីទស្សវត្សរ៍ ទី៦០ដែលជា ម្ចាស់បទ «បឹងហ្គាវ៉ាន់សូឡូ ឬ ទន្លេសូឡូ» ដ៏ល្បីរន្ទឺនាសម័យសង្គមរាស្ត្រនិយម បានលាចាកលោកនេះហើយ នៅវេលាម៉ោង៦ ល្ងាច ថ្ងៃព្រហស្បត្តិ៍ ទី១៧ ខែមករា ឆ្នាំ២០១៩ ក្នុងជន្មាយុ៨០ឆ្នាំ ។
ទស្សនិកជន ដែលនិយមស្តាប់ចម្រៀងពីសង្គមចាស់ ខណៈអតីតតារាចម្រៀងជើងចាស់ តាំងពីទស្សវត្សរ៍ ៦០ គឺលោកស្រី ឈុន វណ្ណា ដែលជាម្ចាស់បទ «បឹងហ្គាវ៉ាន់សូឡូ» និងបទ «អូនស្រលាញ់តែបងម្នាក់» បានទទួលមរណភាព ដោយជរាពាធ ក្នុងជន្មាយុ៨០ឆ្នាំ នៅទីក្រុងស្តុកតុន រដ្ខកាលីហ្វ័រញ៉ា សហរដ្ឋអាមេរិក។សពត្រូវបានបូជាកាលពីថ្ងៃសុក្រ ទី២៥ ខែមករា ឆ្នាំ២០១៩ នៅស្តុកតុនសហរដ្ឋអាមេរិក ។
ដំណឹងដ៏ក្តុកក្តួលនេះ បានធ្វើឱ្យទស្សនិកជនដែលនិយម ស្តាប់ចម្រៀងលោកស្រី ជាច្រើនមានការសោកស្តាយ ដែលបានបាត់បង់តារាចម្រៀងជើងចាស់មួយរូប ដែលមានសមត្ថភាពខ្ពស់។
បើនិយាយពីបទចម្រៀងមរតកដើមមួយបទ មានចំណងជើងថា “ទន្លេសូឡូ” ឬ “បឹងហ្គាវ៉ាន់សូឡូ” ប្រិយមិត្តមួយចំនួន ប្រាកដជាស្គាល់ជាមិនខាននោះទេ ព្រោះបទចម្រៀងមួយបទនេះ ត្រូវបានតារាចម្រៀងជំនាន់ថ្មីជាច្រើនដួង យកមកច្រៀងម្តងទៀត ដែលធ្វើឲ្យបទនេះ នៅតែមានភាពល្បីល្បាញ មិនសាបសូន្យនោះឡើយ។
