កំពង់ឆ្នាំង ៖ ប្រជាពលរដ្ឋឃុំស្វាយជ្រុំជាច្រើនគ្រួសារបាននាំគ្នាចេញមកធ្វើការតវ៉ាជាថ្មីម្តងទៀតនៅរសៀលថ្ងៃទី២៧ ខែមករា ឆ្នាំ២០១៩ នៅសាលាឃុំស្វាយជ្រុំ ស្រុករលាប្អៀរ ដោយសារមេការក្រុមហ៊ុនរបស់លោក សុខ ប៊ុន(អតីតឧកញ៉ាដែលមានជម្លោះជាមួយកញ្ញាសាសា) នៅតែបន្តធ្វើបាបប្រជាពលរដ្ឋ យកកំលាំងកងរាជអាវុធហត្ថខេត្តមកចាប់ត្រាក់ទ័រពួកគាត់ដែលជួលគេយកមកធ្វើការភ្ជួររាស់លើដីស្រែរបស់ពួគគាត់ទៀតផង។
ប្រជាពលរដ្ឋឲ្យដឹងថា ៖ ប៉ុន្មានថ្ងៃមុននេះ មេការរបស់លោកឩកញ៉ាម្នាក់នោះ បានដឹកនាំនិងបញ្ជាអោយមន្ត្រី កងរាជអាវុធហត្ថខេត្ត ធ្វើការចាប់ខ្លួនឃាត់ខ្លួនប្រជាពលរដ្ឋ២នាក់ រួមនិងត្រាក់ទ័រ មួយគ្រឿង ដែលពួកគាត់បានជួលរួចយកទៅឈូសឆាយលើដីស្រែរបស់គាត់ទៀតផង ។ អាជ្ញាធរឃុំស្វាយជ្រុំបានចាត់ទុកថាវា ជាអំពើសាហាវព្រៃផ្សៃចាប់ជំរិតមកលើប្រជាពលរដ្ឋស្លូតត្រង់ ក្នុងឃុំរបស់គាត់ ។
ស្ត្រីម្នាក់ឈ្មោះ កែវ ផល្លា មានទីលំនៅឃុំស្វាយជ្រុំ ស្រុករលាប្អៀរ បាននិយាយអះអាងថា គាត់បានទិញដីនៅ ចំណុចអូររំដេញ ស្ថិត ក្នុងភូមិស្វាយចេក ឃុំស្វាយជ្រុំ ស្រុករលាប្អៀរ តាំងពីឆ្នាំ២០០៨មកម្ល៉េះ ក្រោយមកដោយការខ្វះខាតជីវភាពគាត់បានលក់ដីនេះបន្តទៅឲ្យស្ត្រីម្នាក់នៅរាជធានីភ្នំពេញ ក្រោយមកស្ត្រីជាម្ចាស់ដី បានអោយគាត់ជួលត្រាក់ទ័រ ទៅឈូសពង្រៀបដីនោះដើម្បីធ្វើស្រែ ព្រោះមានក្រសួងអភិវឌ្ឍន៍ជនបទបានជីកប្រឡាយទឹក ជិតដីរបស់ពួកគាត់នៅថ្ងៃទី ២៦ ខែមករាឆ្នាំ ២០១៩។ ពេលត្រាក់ទ័រ កំពុងឈូសពង្រាបដីស្រែ ស្រាប់តែឈ្មោះ លន់ ឡន ហៅឡុង បាននាំមន្ត្រីកងរាជអាវុធហត្ថ ទៅចាប់ទាំងមនុស្ស និងត្រាក់ទ័រ យកមកទីបញ្ជាការដ្ឋាន កងរាជអាវុធហត្ថខេត្ត ដែលមកដល់ពេលនេះទើបតែត្រូវបានដោះលែងអ្នកបើកត្រាក់ទ័រ ពីរនាក់ប៉ុន្តែត្រាក់ទ័រនៅមិនទាន់ដោះលែងអោយមកវិញនោះឡើយ។
ប្រជាពលរដ្ឋ អោយដឹងថា កន្លងមកឈ្មោះ លន់ ឡន ហៅឡុង ដើរបំផុសប្រជាពលរដ្ឋអោយលក់ដីឲ្យក្រុមហ៊ុនទៅក្រុមហ៊ុនពី៣០០ទៅ៤០០ដុល្លារគេនឹងបង្កើតរោងចក្រសាលារៀនមន្ទីពេទ្យនៅជិតផ្ទះ ដោយមិនបាច់អោយកូនទៅធ្វើការនៅក្រៅប្រទេសនិងទៅរៀននៅទីឆ្ងាយៗពិសេសមិនបាច់ទៅព្យាបាលឆ្ងាយនោះទេ ។
មេឃុំស្វាយជ្រុំលោក យីភួន បានបញ្ជាក់ថា ឈ្មោះ ឡុង ជាមេការរបស់ឧកញ៉ា សុខ ប៊ុន ដែលបានទិញដីជាង ១ ពាន់ហិកតា នៅក្នុងឃុំស្វាយជ្រុំ ។ ក៏ប៉ុន្តែមានប្រជាពលរដ្ឋជាច្រើនគ្រួសារដែលមិនទាន់បានលក់ទៅឱ្យឈ្មោះឡុងនេះដែរ ដែលមានផ្ទៃដីប្រមាណជាង ១៥០ហិកតា គឺនៅក្នុងរង្វង់គ្របដណ្តប់ពីលើ របស់ឈ្មោះឡុង ដែលជាមេការរបស់លោក ឧកញ៉ា ។ មេឃុំថាពេលប្រជាពលរដ្ឋទៅបង្ករបង្កើនផលគឺមិនបានទេ សូម្បីតែការលក់ដូរក៏មិនបានដែរ បើចង់លក់លុះត្រាតែលក់ អោយក្រុមហ៊ុន ។
ឈ្មោះឡុងនេះកាលពីរដូវទឹកឡើង ប្រជាពលរដ្ឋមកតវ៉ាបានសន្យាចំពោះមុខប្រជាពលរដ្ឋអ្នកសារព័ត៌មានថា៖ នៅពេលទឹកស្រក បងប្អូនប្រជាពលរដ្ឋ មានដីនៅចំណុចណា សូមទៅធ្វើស្រែជាធម្មតាចុះ ហើយរឿងដី ចង់លក់អោយអ្នកណាក៍បាន ក្រុមហ៊ុនមិនបង្ខំនោះទេ ។ តែធាតុពិត ពេលបងប្អូនទៅធ្វើស្រែ បែជាហៅ កងរាជអាវុធហត្ថ ទៅចាប់គ្នាទៅវិញ ពិតជាសាហាវព្រៃផ្សៃពេកហើយធ្វើមកលើប្រជាពលរដ្ឋ ។
ពេលនេះលោកទ្រាំលែងបានហើយដោយសារតែការធ្វើបាបប្រជាពលរដ្ឋខ្លាំងពេកនិងមានការគម្រាមមកលើលោកញយដងដោយមិនអោយចុះហត្ថលេខាអោយប្រជាពលរដ្ឋទិញឬលក់ដីក្នុងតំបន់នោះហើយក្នុងនាមលោកជាអាជ្ញាធរឃុំស្វាយជ្រុំ សូមធ្វើការអំពាវនាវដល់អាជ្ញាធរខេត្ត ពិសេសប្រមុខរាជ រដ្ឋាភិបាលសូមមេត្តាចាប់វិធានការក្តៅនិងជួយដោះស្រាយលើបញ្ហាមេការរបស់ក្រុមហ៊ុនលោកឩកញ៉ា សុខ ប៊ុន ដែលមានបុគ្គលឈ្មោះលន់ឡនហៅឡុងប្រើប្រាស់ចរឹកច្រងេងច្រងាងដែលតែងតែដើរគម្រាមកំហែងបំភិតបំភយ័បងប្អូនប្រជាពលរដ្ឋក្នុងឃុំរបស់លោកមិនឈប់មិនឈនិងបានធ្វើការរារាំងមិនអោយប្រជាពលរដ្ឋបានធ្វើស្រែលើដីរបស់ពួគគាត់នោះឡើយ ។
ឈ្មោះលន់ ឡន ហៅឡុង ដែលជាមេការក្រុមហ៊ុនដែល រងការចោទប្រកាន់ខាងលើបាននិយាយយ៉ាងខ្លីថា លោកមិនបានចាប់គ្រឿងចក្រនោះទេ គឺមន្ត្រីជំនាញនោះទេជាអ្នកចាប់ ហើយពេលនេះ គេដោះលែងវិញអស់ហើយ ប៉ុន្តែម្ចាស់គ្រឿងចក្រមិនមកយក ?។
លោក ងិន ហ៊ុន ប្រធានមន្ទីរកសិកម្មរុក្ខាប្រមាញ់និងនេសាទវិញបានប្រាប់ថា លោកមិនបានបញ្ជាឲ្យចាប់គ្រឿងចក្រនោះទេ ព្រោះពេលអោយមន្ត្រីជំនាញចុះទៅពិនិត្យឃើញថាៈ ដីនោះជាដីស្រែរបស់ប្រជាពលរដ្ឋ ធ្វើស្រែរាល់ឆ្នាំ មិនមែនជាដីព្រៃលិចទឹកទេ ហើយលោកក៏បានឲ្យដោះលែងមនុស្សនិងត្រាក់ទ័រទៅវិញ ប៉ុន្តែបើគេមិនដោះលែងជារឿងរបស់គេ ៕