ខេត្តព្រះសីហនុ ៖ ព្រោះរឿងដីធ្លីបុរសម្នាក់ រងរបួសយ៉ាងធ្ងន់ធ្ងរដោយគ្រាប់កាំភ្លើង និងជាច្រើននាក់ទៀត ត្រូវចាប់ខ្លួនកាលពីថ្ងៃទី២៤មករាឆ្នាំ២០១៧។
អង្គការ LICADHOនៅថ្ងៃទី២៦មករា បានរាយការណ៍ថា៖ក្នុងយុទ្ធនាការដណ្តើមយកដីនៅភូមិគគីរ ខេត្តព្រះសីហនុ្ឧកញ៉ា មានកងកម្លាំងនគរបាល កងរាជអាវុធហត្ថនិងយោធា ប្រមាណជាង១០០នាក់ បានបើកការបាញ់ប្រហារ ដើម្បីអនុវត្តសាលដីការបស់តុលាការកំពូល ដែលបានសម្រេចផ្តល់ដីទំនាស់នេះ ទៅឱ្យប្រជាពលរដ្ឋចំនួន៩គ្រួសារ។
ជនរងគ្រោះដោយគ្រាប់កាំភ្លើង អាយុ ២៨ ឆ្នាំ ឈ្មោះលោក ពៅ សារ័ត្ន ។ គ្រាប់កាំភ្លើង បានបាញ់ចូលទៅក្នុងស្មា ពីផ្នែកខាងក្រោយជាប់នឹងឆ្អឹងខ្នង។លោក សារ័ត្នដែលជាកម្មករសំណង់ ត្រូវបានទុកចោលមួយរយៈពេលទាំងនៅហូរឈាម មុនពេលបញ្ជូនទៅកាន់មន្ទីរពេទ្យបង្អែកខេត្តព្រះសីហនុ។ ភាពធ្ងន់ធ្ងរនៅមុខរបួស ធ្វើឲ្យគ្រូពេទ្យសម្រេចចិត្តបញ្ជូនលោកទៅកាន់មន្ទីរពេទ្យនៅរាជធានីភ្នំពេញ ជាកន្លែងដែលលោកត្រូវបានដាក់នៅក្នុងបន្ទប់សង្គ្រោះបន្ទាន់ដើម្បីរង់ចាំការវះកាត់។ យ៉ាងតិចណាស់ មានប្រជាពលរដ្ឋចំនួន៤នាក់ទៀត ត្រូវបានចាប់ខ្លួន ប៉ុន្តែក្រោយមកដោះលែងវិញ។
ការតវ៉ាកើតមានឡើងដោយសារសាលដីកា របស់តុលាការកំពូលចុះថ្ងៃទី២១ ខែវិច្ឆិកា ឆ្នាំ២០១៧ ដែលបានសម្រេចផ្តល់ដីទំនាស់ចំនួន ៧១ ហិកតាទៅប្រជាពលរដ្ឋចំនួន ៩ គ្រួសារ ដែលតំណាងដោយដើមបណ្តឹងឈ្មោះ ឆាយ ណារិន និង គង់ វណ្ណា។
សូមបញ្ជាក់ថា៖ដីតំបន់នៅជុំវិញនោះជាកម្មសិទ្ធរបស់ឧកញ៉ាគង់ទ្រីវនិងប្រពន្ធតែមានសេចក្តីរាយការណ៍ថាមានឧកញ៉ាផ្សឹង ដែលមានឥទ្ធិពលខាងនយោបាយនិងសេដ្ឋកិច្ច ទិញយកបាត់ហើយទើបមានឥទ្ធីពលបញ្ជាកងកម្លាំងបែបនេះដែលធ្វើឲ្យមានភាពមិនច្បាស់លាស់ ថាតើគ្រួសារទាំងនោះ ជាអ្នកទទួលយកដីនោះពិតប្រាកដឬយ៉ាងណា។ព្រោះមានពតិមានថាសូម្បីម្ចាស់ដីផ្សេងដែលមានប្លង់កម្មសិទ្ធនិងមានបង្អែករឹងមាំដែរពេលទៅមើលដីរបស់ខ្លួនពេលគេអនុវ្តន៍សាលក្រមនោះក៏ត្រូវបានប៉េអឹមចាប់ខ្លួនហើយបង្ខំឲ្យចុះហត្ថលេខាប្រគល់ដីខ្លួនឲ្យគេថែមទៀតទើបដោះលែងវិញក្រោមរូបភាពដោះលែងជាបណ្តោះអាសន្ន?។
សូមបញ្ជាក់ដែរថាដីតំបន់ស្រុកព្រៃនប់ ក៏ធ្លាប់មានប្រវត្តិជម្លោះហិង្សា ដែលកើតឡើងដោយការរំលោភយកដីធ្លីផងដែរ។ នៅឆ្នាំ ២០០៧ កងកម្លាំងចម្រុះ បានដុតផ្ទះសំបែង និងបណ្ដេញប្រជាពលរដ្ឋចេញដោយបង្ខំ ចំនួន ១០៥ គ្រួសារ ពីសហគមន៍ស្ពានឆេះ ។ នៅឆ្នាំ២០១៧ថ្មីៗនេះ ប្រជាពលរដ្ឋចំនួន ២៦គ្រួសារ បានប៉ះទង្គិចជាមួយកងកម្លាំងសន្តិសុខ ប្រមាណ ៥០០ ម៉ែត្រ ពីទីតាំងជម្លោះនាម្សិលមិញនេះ។