ភ្នំពេញ ៖ លោកស្រី ហូវ ដាណេ ម្ចាស់មជ្ឈមណ្ឌលកែសម្ផស្ស ឌែម៉ូគ្លីនិក និងគ្រូពេទ្យដេរប្រដាប់របស់ខ្លួនឈ្មោះ ពៅ ស៊ីណាតត្រូវបានចៅក្រមស៊ើបសួរសម្រេចដោះលែងចេញពីពន្ធនាគារហើយកាលពីព្រលប់ថ្ងៃទី២៤មករាឆ្នាំ២០១បន្ទាប់ពីឃុំខ្លួនបាន២០ថ្ងៃ!។
តាមសេចក្តីរាយការណ៍ថា កាលពីព្រលប់ថ្ងៃទី២៤ មករា គេបានឃើញមេធាវីការពារក្តីឲ្យលោកស្រី ហូវ ដាណេដែលកំពុងសម្រាកនៅមន្ទីរពេទ្យរុស្ស៊ី(មានលុយ)និងគ្រូពេទ្យជំនាញដេរប្រដាប់ភេទ កាន់ដីកាចេញដោយចៅក្រមសាលាដំបូងរាជធានីភ្នំពេញ យកទៅជួបមន្ត្រីរដ្ឋបាលពន្ធនាគារប៉េហ្ស៊ីរាជធានីភ្នំពេញ ហើយបានដោះលែងអ្នកទាំងពីរខាងលើនេះ។
គួរបញ្ជាក់ថា កាលពីវេលាម៉ោង២ និង១៥នាទីរសៀល ថ្ងៃទី៥ មករា ២០១៩ លោក ម៉ុង មុនីសោភា ចៅក្រមស៊ើបសួរសាលាដំបូងរាជធានីភ្នំពេញ បានសម្រេចឃុំខ្លួនអ្នកស្រី ហូវ ដាណេ ថៅកែមជ្ឈមណ្ឌលកែសម្ផស្សឌែម៉ូគ្លីនិក និងស្ត្រីឈ្មោះ ពៅ ស៊ីណាត ជាអ្នកគ្រូពេទ្យ ដាក់ពន្ធនាគារ(ប៉េហ្ស៊ី)ជាបណ្តោះអាសន្ន។
ថៅកែមជ្ឈមណ្ឌលកែសម្ផស្សឌែម៉ូគ្លីនិកកាលពីវេលាម៉ោង១០ និង១០នាទីព្រឹក ថ្ងៃទី០៤ មករា ត្រូវបានកម្លាំង សមត្ថកិច្ចកងរាជអាវុធហត្ថលើផ្ទៃប្រទេស បញ្ជូនទៅកាន់សាលាដំបូងរាជធានីភ្នំពេញ ពាក់ព័ន្ធលើបណ្តឹងថា បានគំរាមបង្ហោះរូបភាពដេរប្រដាប់ភេទ អតិថិជនលើសង្គមហ្វេសប៊ុក ជាថ្នូរ នឹងការទាមទារប្រាក់រាប់ម៉ឺនដុល្លារអាមេរិក។ សំណុំរឿងនេះបានស្ថិតនៅដៃលោក សឿន មុនីរ័ត្ន ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ធ្វើការសាកសួរ។
តំណាងអយ្យការបានចោទប្រកាន់ អ្នកស្រី ហូវ ដាណេ ថៅកែមជ្ឈមណ្ឌលកែសម្ផស្សឌែម៉ូគ្លីនិក និងស្ត្រីឈ្មោះ ពៅ ស៊ីណាត ជាគ្រូពេទ្យជំនាញដេរប្រដាប់ភេទចំនួន៣បទល្មើស សុទ្ធតែជាបទល្មើសព្រហ្មទណ្ឌ។ បទល្មើសទី១.បទប៉ះពាល់ដល់សិទ្ធិខាងរូបភាព នៃបុគ្គល តាមមាត្រា៣០២ នៃក្រមព្រហ្មទណ្ឌ បទល្មើសទី២.បទកំហែងយក តាមមាត្រា៣៦៣ និងមាត្រា៣៦៤ នៃក្រមព្រហ្មទណ្ឌ និងបទល្មើសទី៣.បទការគំរាមកំហែងហែកកេរ្តិ៍ តាមមាត្រា២៧២ និងមាត្រា២៧៣ នៃក្រមព្រហ្មទណ្ឌ។
បើយោងលើមាត្រា៣០២ នៃក្រមព្រហ្មទណ្ឌបានចែងថា អំពើថតរូបភាព នៃបុគ្គលនៅទីកន្លែងឯកជន ដោយគ្មានការព្រមព្រៀងពីបុគ្គលនេះទេ ត្រូវផ្ដន្ទាទោសដាក់ពន្ធនាគារពី១ខែទៅ១ឆ្នាំ និងពិន័យជាប្រាក់ ពី១សែន ទៅ២លានរៀល លើកលែងតែករណីដែលច្បាប់អនុញ្ញាត ៕
