ព្រះវិហារ ៖ លោក ម៉ប់ សារិន ប្រធានក្រុមប្រឹក្សា តំណាងដ៏ខ្ពង់ខ្ពស់លោក ឃួង ស្រេង អភិបាលរាជធានីភ្នំពេញ ព្រមទាំងឯកឧត្តម លោកជំទាវ លោកឧកញ៉ា លោក លោកស្រីមន្ត្រីសាលាក្រុង អមដំណើរ បានអញ្ជើញចុះសាកសួរសុខទុក្ខ និងនាំយកអំណោយសម្តេចទាំងទ្វេ មកឧបត្ថម្ភដល់កម្លាំងប្រដាប់អាវុធសម្ព័ន្ធមេត្រីភាព កងពលធំអន្តរាគមន៍លេខ៣ កងពលតូចអន្តរាគមន៍លេខ៩ កងកម្លាំងនគរបាលជាតិការពារព្រំដែនគោកវរសេនាតូច៧៩៣ ។
ពិធីនេះបានធ្វើឡើង នាព្រឹកថ្ងៃទី២៥ ខែមករា ឆ្នាំ២០១៩ នៅអគារមហោស្រប ទីបញ្ជាការកងពលធំអន្តរាគមន៍លេខ៣ ឋិតក្នុងភូមិពាក់ស្បែក ឃុំយាង ស្រុកជាំក្សាន្ត ខេត្តព្រះវិហារដោយមានលោកឧត្តមសេនីយ៍ឯក ស្រី ឌឹក មេបញ្ជាការរងកងទ័ពជើងគោក ព្រមទាំងឯកឧត្តមមេបញ្ជាការ មេបញ្ជាការរង នាយសេនាធិការ នាយសេនាធិការរង តាមបណ្ដាការិយាល័យជំនាញ នាយនិងពលទាហានជាច្រើននាក់ផងដែរទទួលបដិសណ្ឋារកិច្ច។
មេបញ្ជាការរងកងទ័ពជើងគោក និងជាមេបញ្ជាការកងពលធំអន្តរាគមន៍លេខ៣ ឯកឧត្តម ឧត្តមសេនីយ៍ឯក ស្រី ឌឹក បានសន្យាថា កងកម្លាំងប្រដាប់អាវុធទាំងអស់នៅក្នុងទិសទី១ ត្រៀមខ្លួនរួចជាស្រេច ក្នុងការការពារអធិបតេយ្យភាពជាតិ រួមជាមួយកម្លាំងផ្សេងទៀត ដើម្បីរក្សាសន្តិភាពស្ថិរភាពនយោបាយ ចូលរួមនយោបាយភូមិឃុំមានសុវត្ថិភាព ក្នុងតម្លៃណាក៏ដោយ មិនអោយក្រុមណាបំផ្លាញសន្តិភាព ដែលយើងរកបានដោយលំបាកនោះទេ។
លោកឧត្តមសេនីយ៍អះអាងថា៖ជារួមរហូតមកដល់ពេលនេះយើងអនុវត្តបាននៅយុទ្ធសាស្ត្រ៣ សកម្មភាព១០ និងបទបញ្ជា១១ចំណុច របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញនាពេលកន្លងមក។
លោក ម៉ប់ សារិន ប្រធានក្រុមប្រឹក្សា រាជធានីភ្នំពេញ មានប្រសាសន៍ថារដ្ឋបាលរាជធានីភ្នំពេញ នៅតែប្តេជ្ញាចិត្តបន្តជួយឧបត្ថម្ភគាំទ្រជានិច្ច ចំពោះនាយទាហាន នាយទាហានរង និងពលទាហាន ព្រមទាំងបងប្អូនគ្រួសារកងទ័ព នៅសមរភូមិមុខ ក្រោមសម្ព័នមេត្រីភាព នៃអង្គភាពសមរភូមិក្រោយ។
លោកប្រធានក្រុប្រឹក្សាបានសម្តែងនូវការកោតសរសើ និងវាយតំលៃខ្ពស់ចំពោះវីរភាពអង់អាចក្លាហាន របស់នាយទាហាន នាយទាហានរង ពលទាហាន វរៈយុទ្ធជន យុទ្ធនារីទាំងអស់ ដែលបាននិងកំពុងបំពេញបេសកកម្ម ដ៍ឧត្តុងឧត្តម ក្នុងបុព្វហេតុការពារបូរណភាពទឹកដី ការពាររដ្ឋធម្មនុញ និងរាជរដ្ឋាភិបាលស្របច្បាប់ ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា និងថែរក្សាសុខសន្តិភាព ជូនប្រជាពលរដ្ឋ ព្រមទាំងការអភិវឌ្ឍន៍ប្រទេសបានរហូតមកដល់បច្ចុប្បន្ននេះ ៕
