កោះកុង ៖ មន្ត្រីស្នាក់ការច្រកទ្វារអន្តរជាតិចាំយាម ខេត្តកោះកុង បានឲ្យថា នៅព្រឹកថ្ងៃទី២៤ខែមករាឆ្នាំ២០១៩អាជ្ញាធរមានសមត្ថកិច្ចថៃ មកពីទីក្រុងបាងកក បានចុះបង្ក្រាបមុខទំនិញមួយចំនួនមានដូចជា ស្រា បារីនិងសម្ភារៈប្រើប្រាស់ផ្សេងៗដែលពលរដ្ឋខ្មែរយើងនាំចូលទៅលក់នៅផ្សារហាតឡេក ក្នុងស្រុកខ្លងយ៉ៃ ខេត្តត្រាត ប្រទេសថៃទល់មុខនិងច្រកទ្វារអន្តរជាតិចាំយាម ខេត្តកោះកុង ប្រទេសកម្ពុជា។
ការចុះបង្ក្រាបយូរៗម្តងនេះ បាន បង្កឲ្យមានភាពភ្ញាក់ផ្អើលឆោរឡោ ដល់ពលរដ្ឋខ្មែរ ដែលនាំចូលទំនិញទៅលក់នៅទីនោះ។គេឃើញមាន ក្រុមមន្ត្រីសមត្ថកិច្ចខ្មែរដែលឈរជើងនៅមាត់ច្រកចុះទៅសម្របសម្រួលនិងអន្តរាគមន៍ភ្លាមៗផងដែរ។
លោក សុវណ្ណ ប៊ុនធឿន ប្រធានស្នាក់ការច្រកទ្វារអន្តរជាតិចាំយាមបានឲ្យដឹងថា ក្នុងការចុះបង្ក្រាបខាងលើ សមត្ថកិច្ចថៃបានធ្វើការដកហូតនិងឃាត់ខ្លួនម្ចាស់ទំនិញមួយចំនួន ដែលគេអះអាងថា៖ជាទំនិញហាមឃាត់នាំចូលទៅលក់នៅឯទីផ្សារក្នុងប្រទេសគេដោយខុសច្បាប់ ។ ប៉ុន្តែភ្លាមៗ ដោយមានកិច្ចសម្របសម្រួលនិងអន្តរាគមន៍ទាន់ពេលវេលាពីសំណាក់ក្រុមមន្ត្រីអាជ្ញាធរមានសមត្ថកិច្ចខ្មែរយើង ខាងថៃបានយល់ព្រមដោះលែងនិងប្រគល់ទំនិញដែលបានចាប់ឲ្យមកវិញ។
លោកប្រធានស្នាក់ការបានបញ្ជាក់ថា ក្រោយពីសមត្ថកិច្ចខ្មែរនិងថៃ បានជួបសម្រុះសម្រួលគ្នារួចមក ស្ថានភាពលក់ដូររបស់ពលរដ្ឋ នៅចំណុច្រកព្រំដែនខាងលើ បាន ដំណើរការជាធម្មតាឡើងវិញហើយនៅព្រឹកថ្ងៃដដែលនេះ ។ ចឹងបានថាដកដង្ហើមតាមគេវាលំបាកចឹង!៕
