ខេត្តស្ទឹងត្រែង ៖ អ្នកយកព័ត៌មានចំនួន៧ នាក់ត្រូវបានកម្លាំងនគរបាលខេត្តស្ទឹងត្រែង ចុះទៅណែនាំ ដោយចោទថាមិនគោរពវិជ្ជាជីវៈ ចតរថយន្តនៅតាមដងផ្លូវចាំថតឡានដឹកឈើល្មើសច្បាប់? ។
សមត្តកិច្ចបានប្រាប់ថាគេធ្វើនេះគឺតាមបញ្ជារបស់ លោក ម៉ុម សារឿនអភិបាលខេត្តស្ទឹងត្រែងឲ្យដឹកនាំកម្លាំង ចុះប្រតិបត្តិការនៅយប់ថ្ងៃទី២៤ ខែមករាឆ្នាំ២០១៩ នៅតាមដងផ្លូវជាតិលេខ៧ និងផ្លូវជាតិលេខ៧៨ ត្រង់ចំណុចពងមាន់ស្ថិតក្នុងភូមិរាជានុកូលសង្កាត់ ក្រុង ខេត្តស្ទឹងត្រែងដើម្បីណែនាំក្រុមអ្នកយកព័ត៌មាន ចំនួន៧ដែលមិនបានគោរពវិជ្ជាជីវៈ ចតឡានតាមដងផ្លូវ ធ្វើឲ្យបាត់បង់សណ្ដាប់ធ្នាប់ តាមផ្លូវសាធារណៈក្នុងខេត្ត។
លោកវរសេនីយ៍ឯកវ៉ា សុផាន់ នាយការិយាល័យប្រឆាំងបទល្មើស បានប្រាប់ថា អ្នកកាសែតត្រូវគោរពវិជ្ជាជីវៈ អ្នកដែលចូលមកយកព័ត៌មាន ក្នុងខេត្តត្រូវតែយកប័ណ្ណព័ត៌មាន ចុះបញ្ជីនៅក្នុងមន្ទីរព័ត៌មាន ឲ្យបានដឹងថា ចុះមកយកព័ត៌មាន នៅក្នុងខេត្តដើម្បីងាយស្រួល ក្នុងការគ្រប់គ្រង ចុះយកព័ត៌មាន ក្នុងខេត្តក្នុងការអភិវឌ្ឍ និងការរីកចម្រើនរបស់រាជរដ្ឋាភិបាល និងយកព័ត៌មាន កែតម្រូវស្ថាបនា នៅចំណុចខ្វះខាតណាមួយ ដែលត្រូវធ្វើការផ្សព្វផ្សាយ ដើម្បីអោយរីកចម្រើន មិនមែនចុះមកយកព័ត៌មាន ចតឡាននៅតាមដងផ្លូវចាំតែដេញរថយន្តនោះទេ។
លោកអះអាងថា “លោកមិនហាមឃាត់ក្នុងការយកព័ត៌មាននោះទេ តែព័ត៌មានដែលត្រូវយកនោះ គឺអ្វីដែលមានហេតុការណ៍កើតឡើងត្រូវតែចុះទៅយកព័ត៌មាន មិនមែនគ្មានហេតុការណ៍ហើយនាំគ្នា ចតឡានតាមដងផ្លូវសាធារណៈរង់ចាំយកព័ត៌មានទេ តែបើធ្វើបែបនេះ ធ្វើឲ្យប៉ះពាល់ដល់សណ្ដាប់ធ្នាប់សាធារណ:ជាខ្លាំង”។
សូមបញ្ជាក់ថានៅក្នុងអាណាចក្រខេត្តស្ទឹងត្រែងមានសេចក្តីរាយការណ៍អំពីការកើតឡើងនៅការប្រព្រឹត្តបទល្មើសព្រៃឈើជាច្រើនតែមិនដេលឃើញមានសមត្តកិច្ចខេត្តបង្ក្រាបបានម្តងឡើងផ្ទុយទៅវិញបែជាមានការបញ្ជាឲ្យបង្ក្រាបអ្នកកាសែតទៅវិញ?។ស្រុកខ្មែរសេរីភាពសារពតិមាននៅខេត្តស្ទឹងត្រែងគ្មានទេបើចងយកពតិមានពីបទល្មើសព្រៃឈើ?៕
