ខេត្តបន្ទាយមានជ័យ ៖ បុគ្គលឹកកាស៊ីណូក្រុមហ៊ុនកាស៊ីណូ ហ្គ្រែនដាយមិនស៊ីធី(Grand Diamond city)ជាច្រើននាក់បាននាំគ្នាធ្វើបាតុកម្មតវ៉ាក្រោយពីបុគ្គលឹកម្នាក់ត្រូវបានឃាត់ខ្លួនព្រោះចែកបៀរធ្វើឲ្យអ្នកលេងឈ្នះអស់ប្រាក់ប្រមាណ៣០ម៉ឺនបាតប្រាក់ថៃ។
សេចក្ដីរាយការណ៍បានឲ្យដឹងថា បុគ្គលឹកក្រុមហ៊ុនកាស៊ីណូមួយ ផ្នែកមើលអ្នកចែកបៀរ ឈ្មោះ ឈី ឆាឡែនភេទស្រី ត្រូវបានសន្តិសុខចាប់ខ្លួន កាលពីវេលាម៉ោង៥ល្ងាច ថ្ងៃទី២០ ខែមករា ឆ្នាំ២០១៩ ដោយបោទថា បានឃុបឃិតជាមួយភ្ញៀវ ដែលចូលមកលេងក្នុងកាស៊ីណូ។មូលហេតុដែលនាំឲ្យចាប់ខ្លួន បុគ្គលឹកខាងលើ គឺដោយសារតែមានភ្ញៀវ លេងឈ្នះក្រុមហ៊ុន ប្រហែលជា៣សែនបាតប្រាក់ថៃ ។
នៅព្រឹកថ្ងៃទី២១ ខែមករា ភាគីខាងក្រុមហ៊ុន ឲ្យនាងចូលខ្លួនសារជាថ្មី ដើម្បីសាកសួរនឹងដេញដោល ឈានទៅរកកំហុស ដាក់បន្ទុកនាងម្ដងទៀត។
សូមជំរាបថាកាស៊ីណូ ក្រុមហ៊ុនហ្គ្រែន ដាយមិន មានថៅកែជាជនជាតិថៃ ឈ្មោះ វឌ្ឍណា អាស្វាហាម អតីតជាអនុរដ្ឋមន្ត្រីក្រសួងមហាផ្ទៃ មានដើមកំណើតនៅខេត្ត សាមុទ្រ សាខន ប្រទេសថៃ។
បច្ចុប្បន្ន ថៅកែក្រុមហ៊ុនរូបនេះ មករស់នៅក្នុងទឹកដី នៃប្រទេសកម្ពុជា។ មកទល់ពេលនេះ បុគ្គលឹកដែលរងនូវការចាប់ខ្លួនខាងលើ ភាគីតំណាង តំណាងឲ្យក្រុមហ៊ុនកាស៊ីណូ មិនទាន់អាចទំនាក់ទំនងបាននៅឡើយទេ ។លោក ប៊ុន សុធី តំណាងឲ្យកម្មករ នៅក្រុងប៉ោយប៉ែត បានឲ្យដឹងថា បើក្រុមហ៊ុនមិនឃើញកំហុសទេនោះ ត្រូវតែដោះលែងនាងវិញជាបន្ទាន់ មិនគួរណាក្រុមហ៊ុន ប្រើវិធីបំបាក់ស្មារតី បុគ្គលឹកខ្លួនឯងនោះឡើយ៕
