សីហនុ ៖ ការអះអាងរបស់លោក អ៊ី សុខឡេង ចៅហ្វាយក្រុងព្រះសីហនុបានធ្វើឡើងនាឱកាសចុះពិនិត្យការដ្ឋានសាងសង់អាងស្តុកចម្រោះទឹកស្អុយទាំង ៤កន្លែង កាលពីព្រឹកថ្ងៃទី២២ ខែមករា ឆ្នាំ២០១៩ ។
មន្ត្រីបច្ចេកទេសបានឲ្យដឹងថា អាងស្តុកចម្រោះទឹកស្អុយទាំង ៤កន្លែងនេះ ជាកន្លែងស្តុកទឹកស្អុយដែលហូចេញពីតំបន់នានាក្នុងក្រុងព្រះសីហនុ។ ក្នុងនោះក៏មានរៀបចំប្រពន្ធ័ធតភ្ជាប់ សម្រាប់បូមយកទឹកស្អុយ ពីអាងស្តុកចម្រោះទាំង ៤កន្លែងនេះ ទៅកាន់អាងចម្រោះទឹកស្អុយដែលមានទំហំ ១៦ហិកតា មានទីតាំងស្ថិតនៅចុងឆ្នេរអូរឈើទាល ដែលជាអាងប្រព្រឹត្តកម្មចម្រោះទឹកកខ្វក់ ក្នុងក្រុងព្រះសីហនុ ដើម្បីទប់ស្កាត់មិនឲ្យមានទឹកកខ្វក់ ហូចូលក្នុងសមុទ្រដោយមិនបានឆ្លងកាត់ អាងចម្រោះទឹកស្អុយទៀតទេ។
លោក អ៊ី សុខឡេង បន្តថា អាងស្តុកចម្រោះទឹកស្អុយខាងលើនេះ ស្ថាបនាឡើង ដើម្បីស្តុបទឹកស្អុយមិនអោយហូចូលសមុទ្រ ក្រោមការយកចិត្តទុកដាក់ពីគណៈកម្មាធិការជាតិគ្រប់គ្រងតំបន់ឆ្នេរ រួមមាន៖ ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់- ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន។
លោក អ៊ី សុខឡេង ថា ចំពោះថវិកាសម្រាប់សាងសង់អាងស្តុកចម្រោះទឹកស្អុយនេះ ក្រៅពីថវិកា របស់រដ្ឋ ក៏ទទួលបានថវិកាជំនួយបន្ថែមពី ឯកឧត្តមឧកញ៉ា លី យ៉ុងផាត់ ឯកឧត្តមឧកញ៉ា កុក អាន ឯកឧត្តមឧកញ៉ា សុខ គង់ លោកឧកញ៉ា អ៊ូ ឆាយ និងសប្បុរសជនមួយចំនួនទៀត។
