ប៉ៃលិន៖ ក្មេងស្រីស្រស់ស្អាតម្នាក់ ដាច់ចិត្តយកខ្សែទៅចងក ធ្វើអត្តឃាតខ្លួនឯង ដោយសារតែពិបាកចិត្ត ខណៈឃើញឪពុកម្តាយក្រីក្រធ្វើចម្ការជំ ពាក់បំណុលគេជាច្រើន លុះក្រោយមកដាច់ចិត្តឈប់បន្តការសិក្សាដើម្បីធ្វើការរកលុយជួយសងជំពាក់ប្រាក់គេ។ហេតុការណ៍ក្មេងស្រីស្រស់ស្អាតចងក.ធ្វើអត្តឃាតខ្លួនឯងខាងលើនេះ បង្កឱ្យមានការភ្ញក់ផ្អើលកាលពីវេលាម៉ោង០៦ និង១០នាទីព្រឹកថ្ងៃទី១៨ ខែកក្កដា ឆ្នាំ២០១៦ នៅចំណុចក្នុងបន្ទប់លើផ្ទះរបស់ខ្លួន ខាងក្រោយភ្នំយ៉ាត ស្ថិតក្នុងភូមិវត្ត សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
ក្មេងស្រីរងគ្រោះ ឈ្មោះ ម៉ៅ វិជួន ភេទស្រី អាយុ១៧ឆ្នាំ ជាកសិករ ឈប់រៀនត្រឹមថ្នាក់ទី៨ រស់នៅភូមិកើតហេតុខាងលើ មានបងប្អូនប្រុសស្រីចំនួន៩នាក់ ប្រុស៣ស្រី៦ រូបគេជាកូនទី៦ ។
ប្រភពព័ត៌មានពីកន្លែងកើតហេតុ បានឱ្យដឹងថា ជារៀងរាល់ថ្ងៃ មុនពេលកើតហេតុ ក្មេងស្រីរងគ្រោះតែង តែទៅធ្វើការស៊ីឈ្នួលដាំពោត និងដំឡូងមីឱ្យគេ ជាមួយបងប្អូន និងឪពុកម្តាយរបស់ខ្លួន ហើយក៏តែងតែពោលប្រាប់អ៊ុំពូមីងរបស់ខ្លួនថា រូបគេមានការលំបាកក្នុងចិត្តយ៉ាងខ្លាំង ដោយសាររៀនសូត្រមិនបានជ្រៅជ្រះនឹងគេ ។ ម្យ៉ាងវិញទៀត ងាកបែរមកមើលក្រុមគ្រួសារមានបងប្អូនច្រើនរហូតដល់៩នាក់ ដោយឪពុកម្តាយធ្វើចម្ការដាំដំឡូងមីពីមួយឆ្នាំទៅមួយឆ្នាំ បន្ទាប់ពីប្រមូលផលរួច លក់ឱ្យឈ្មួញមានតម្លៃថោក ហើយខាតលុយកាក់ ជំពាក់បំ ណុលគេអស់ជាច្រើន ។
ប្រភពបន្តទៀតថា ពេលត្រឡប់មកដល់ផ្ទះវិញ គេសង្កេតឃើញនាងនិយាយថា ឃ្លានហូបសាច់គោអាំង ស្រាប់តែឪពុកម្តាយបានឱ្យលុយយកទៅទិញនាំបងប្អូនហូបទាំងអស់គ្នា រួចក៏នាំគ្នាងូតទឹកចូលទៅដេកនៅលើផ្ទះរៀងៗខ្លួន ។ រហូតដល់ព្រឹកថ្ងៃកើតហេតុ ដោយសារឃើញកូនស្រីម្នាក់នេះ ដេកយូរពេក ឪពុកក៏ប្រើឱ្យម្តាយទៅដាស់កូន ដើម្បីទៅស៊ីឈ្នួលដាំពោតឱ្យគេបន្តដូចសព្វមួយដង លុះចូលទៅដល់មុខបន្ទប់ ក៏ឃើញកូនស្រីចងក.ធ្វើអត្តឃាតស្លាប់បាត់ទៅហើយ រួចក៏នាំគ្នាស្រែកយំបង្កការភ្ញាក់ផ្អើល រួចប្តឹងឱ្យអាជ្ញាធរ និងសមត្ថកិច្ចចុះទៅពិនិត្យតែម្តង ។
តាមប្រភពព័ត៌មានពីសមត្ថកិច្ចជំនាញបានឱ្យដឹងថា បន្ទាប់ពីធ្វើការពិនិត្យសាកសពរួចមកបានបញ្ជាក់ឱ្យដឹងថា យុវតីរងគ្រោះបានធ្វើអត្តឃាតដោយសារមានជំងឺផ្លូវចិត្ត និងតូចចិត្តឪពុក ម្តាយជំពាក់បំណុលគេពិតប្រាកដមែន មិនមានករណីឃាតកម្មឬអំពើណាមួយកើតឡើង នោះឡើយ ។ ទោះបីជាយ៉ាងណាក៏ដោយ បច្ចុប្បន្នសមត្ថកិច្ចជំនាញ បានធ្វើកំណត់ហេតុនិងប្រគល់សាកសពជូនអាណាព្យាបាល ដើម្បីធ្វើបុណ្យតាមប្រពៃណី ៕ អត្ថបទ ទូច សុខន (ប៉ៃលិន)