ភ្នំពេញ៖ ក្រសួងពាណិជ្ជកម្មកម្ពុជាបាន ប្រកាសថា នឹងតវ៉ាតាមច្បាប់ពាណិជ្ជកម្មអន្តរជាតិប្រឆាំងនឹងការតម្លើងពន្ធ នាំអង្ករកម្ពុជាចូលទៅកាន់ទ្វីបអឺរ៉ុប ។ នៅក្នុងសេចក្តីថ្លែងការណ៍ឆ្លើយតបវិធានការរបស់សហភាពអឺរ៉ុបនៅយប់ថ្ងៃទី១៧ ខែមករា ឆ្នាំ២០១៩ ក្រសួងពាណិជ្ជកម្ម បានលើកឡើងថា ការសម្រេចរបស់សហភាពអឺរ៉ុបនេះ មិនបានឆ្លុះបញ្ចាំងទាំងស្រុងលើទិដ្ឋភាពច្បាប់ពាណិជ្ជកម្មអន្តរជាតិ បទដ្ឋានបច្ចេកទេស និងសច្ចភាព ព្រមទាំងកិច្ចសហប្រតិបត្តិការដ៏ល្អកន្លងមករវាងរាជរដ្ឋាភិបាល វិស័យឯកជនរបស់កម្ពុជា និងសហគមន៍អឺរ៉ុបនោះឡើយ។
ក្រសួងពាណិជ្ជកម្មបានចាត់ទុកវិធានការនេះថា «ជាអាវុធសម្លាប់កសិករខ្មែរ និងបានប្រកាសតវ៉ាជាមួយសេចក្តីសម្រេចនេះ ទៅតាមទិដ្ឋភាពច្បាប់ និងវិធានពាណិជ្ជកម្មអន្តរជាតិ»។
សេចក្តីថ្លែងការណ៍បានគូសបញ្ជាក់ថា សេចក្តីសម្រេច នេះប្រៀបបាននឹងអាវុធសម្លាប់កសិករខ្មែរ និងគ្រួសារ ដែលកំពុងជាប់បំណុលស្ថាប័នឥណទាន។ ក្នុងសេចក្តីថ្លែងការណ៍បានគូសបញ្ជាក់ យ៉ាងដូច្នេះ «ការសម្រេចដាក់វិធានការការពារទីផ្សារដោយ សហភាពអឺរ៉ុបមកលើអង្ករ (Indica Rice) ដែលមានប្រភពដើមមកពីកម្ពុជា មានឥទ្ធិពលគ្រប់គ្រាន់ សម្រាប់ដកហូតចំណូលរបស់ប្រជាកសិករក្រីក្រកម្ពុជា និងជាអាវុធសម្រាប់ធ្វើឃាតពួកគាត់ និងក្រុមគ្រួសារ ដែលកំពុងជាប់បំណុលជាមួយស្ថាប័នឥណទាន ដែលបានផ្តល់ប្រាក់កម្ចីដល់ពួកគាត់»។
ក្រសួងពាណិជ្ជកម្មបានអំពាវនាវឲ្យគណៈកម្មការអឺរ៉ុបពិនិត្យឡើងវិញនូវការសម្រេចរបស់ខ្លួន ដោយផ្អែកលើវិធានពាណិជ្ជកម្មអន្តរជាតិ និងចំណងកិច្ចសហប្រតិបត្តិការល្អជាប្រពៃណីរវាងកម្ពុជា និងសហភាពអឺរ៉ុប។
សូមបញ្ជាក់ថាសហគមន៍អឺរ៉ុប បានសម្រេចគិតពន្ធលើការនាំចូលអង្កររបស់កម្ពុជា ចូលទៅកាន់ទីផ្សារអឺរ៉ុប រយៈពេល៣ឆ្នាំ ។ ក្រៅពីកម្ពុជា មីយ៉ាន់ម៉ា ក៏ជាប្រទេសដែលត្រូវបានគណៈកម្មការអឺរ៉ុប សម្រេចគិតពន្ធលើការនាំចេញអង្ករ ចូលទៅកាន់ទីផ្សារអឺរ៉ុប រយៈពេល៣ឆ្នាំដូចគ្នាផងដែរ។សេចក្តីប្រកាស របស់សហភាពអឺរ៉ុប នៅថ្ងៃទី១៦ ខែមករា បានបញ្ជាក់ថា ការគិតពន្ធនាំចូលអង្កររបស់កម្ពុជា ចាប់ផ្តើមអនុវត្តន៍ចាប់ពីថ្ងៃទី១៨ ខែមករា ឆ្នាំ២០១៩តទៅ ដោយឆ្នាំដំបូងតម្លៃពន្ធចំនួន១៧៥ផោន (ប្រហែលជាង២០០ដុល្លារ) ក្នុង១តោន, ឆ្នាំទី២ តម្លៃ១៥០ផោន (ជិត២០០ដុល្លារ) ក្នុង១តោន និងឆ្នាំទី៣ តម្លៃ១២៥ផោន (ប្រហែល១៦០ដុល្លារ) ក្នុង១តោន។
ការយកពន្ធលើកអង្ករកម្ពុជានេះ ដោយសារអឺរ៉ុបរកឃើញថា អង្កររបស់កម្ពុជា ដែលនាំចូលទៅអឺរ៉ុប បានធ្វើឲ្យប៉ះពាល់ដល់អ្នកផលិតអង្កររបស់ពួកគេ បន្ទាប់ពីមានបណ្តឹងតវ៉ាពីប្រទេសអ៊ីតាលី និងអេស្ប៉ាញ។
ទន្ទឹមនិងបញ្ហានេះប្រជាកសិករជាច្រើនគ្រួសារនៅស្រុកមង្គលបូរី ខេត្តបន្ទាយមានជ័យ ត្អូញត្អែរអំពីតម្លៃស្រូវចុះថោក ហើយលក់មិនបានប្រាក់កម្រៃសម្រាប់ដោះស្រាយជីវភាពគ្រួសារ។ ពួកគាត់ថា សព្វថ្ងៃស្រូវសែនក្រអូបចុះថោកមកនៅត្រឹមតែជាង ៦០០រៀលក្នុងមួយគីឡូក្រាម ។ កសិករនៅភូមិតាអ៊ិន ឃុំស្រះរាំង លោក ប៉ាត លួម បានប្រាប់វិទ្យុថាស្រូវសែនក្រអូប ប្រភេទស្រូវមិនសូវល្អ ឈ្មួញទិញក្នុងតម្លៃត្រឹមតែ ៧០០រៀលក្នុងមួយគីឡូក្រាម រីឯស្រូវសែនក្រអូបសុទ្ធស្អាតល្អ ឈ្មួញទិញតម្លៃប្រមាណ ៩០០រៀលក្នុងមួយគីឡូក្រាម ដែលខុសពីឆ្នាំកន្លងទៅតម្លៃជាង ១ពាន់រៀលក្នុងមួយគីឡូក្រាម៖
សូមបញ្ជាក់ថា៖ អង្ករកម្ពុជាប្រមាណជិត ២៧ម៉ឺនតោន ត្រូវបាននាំចូលទៅកាន់ទីផ្សារសហគមន៍អឺរ៉ុបកាលពីឆ្នាំ២០១៨កន្លងមក ដែលធ្វើឲ្យអឺរ៉ុបក្លាយជាទីផ្សារធំបំផុតទី២បន្ទាប់ពីប្រទេសចិនសម្រាប់អង្ករកម្ពុជាមានចំណែកដល់ទៅជាង ៤៣ភាគរយនៃតួលេខអង្ករកម្ពុជានាំចេញទៅទីផ្សារអន្តរជាតិ៕
