ត្បូងឃ្មុំ ៖ មានការកត់សម្គាល់ថាបន្ទាប់ពីគេហទំព័រផ្សេងៗជាច្រើន បានចេញផ្សាយព្រោងព្រាតស្តីអំពីសកម្មភាពនៃការ បើកបនល្បែងស៊ីសងគ្រប់ប្រភេទ ១កន្លែង ស្ថិតនៅក្នុងភូមិអន្លង់ជ្រៃ ឃុំកក់ ស្រុកពញាក្រែក ខេត្តត្បូងឃុំ មកប្រជាពលរដ្ឋរាយការណ៍អោយដឹងថា សព្វថ្ងៃទីតាំងនោះបាននឹងកំពុងបើកដំណើរការលេងល្បែងស៊ីសងយ៉ាងគគ្រឹកគគ្រេង មានចម្ងាយ ប្រហែលជាង១៥០ម៉ែត្រពីផ្លូជាតិលេខ៨ ក្បែរភូមិគ្រឹះ សម្តេចពញាចក្រី ហេង សំរិនប៉ុណ្ណោះ ដោយមានឈ្មោះស្រ៊ុនជាអ្នកគ្រប់ គ្រង និងមានមេការធំឈ្មោះណាង ជាអ្នកចេញមុខកាងបនល្បែងដ៏ធំនេះ ។
ប្រជាពលរដ្ឋបានបញ្ជាក់ថា៖ ទីតាំងល្បែងស៊ីសងខាងលើនេះមានលេងអាប៉ោង បៀរ និងខ្លាំងជាងគេ គឺល្បែងជល់មាន់។ក្នង១ថ្ងៃៗមានអ្នកញៀនល្បែងមានទាំងឧកញ៉ាៗ មន្ត្រីរាជការធំៗ ,ទាហាន ប៉ូលិសខ្មែរយើង ជិះសុទ្ធតែឡានទំនើបៗចូលទៅលេងនៅក្នុងបនល្បែង ចាក់ភ្នាល់ស៊ីសង ចាញ់ឈ្នះរាប់រយ រាប់ ពាន់ដុល្លារអាមេរិក ស្រែកហ៊ោរកញ្ជ្រាវកងរំពងយ៉ាងអនាធិបតេយ្យ ដោយគ្មានការរំខានពីសមត្ថកិច្ច នៅទីនោះឡើយ ។
ប្រភពពីអ្នក ធ្លាប់ទៅលេង ល្បែងជល់មាន់នៅទីនោះម្នាក់ សុំមិនបញ្ចេញឈ្មោះ បានប្រាប់ អោយដឹងថា តាមដែលគាត់ធ្លាប់ចូលទៅលេង គឺខាងម្ចាស់សៃវៀនមាន់នៅអន្លង់ ជ្រៃឈ្មោះ ស្រ៊ុន ដែលគេស្គាល់ និងដឹងថាជាសាច់ញាតិរបស់លោកអភិបាលរងខេត្តត្បូងឃ្មុំ ឈ្មោះ គន់ សុភា និងឈ្មោះណាង ជាមេការបានប្រាប់ថា សូមកុំព្រួយបារម្ភពីការចុះចាប់ ឬបង្ក្រាបពីសមត្ថកិច្ចអី ព្រោះទីតាំងគាត់បានចំណាយលុយរត់ការបង់អោយសមត្ថកិច្ច និងអាជ្ញាធរដែនដីគ្រប់លំដាប់ថ្នាក់អស់ហើយ ១ខែៗអស់រាប់ ម៉ឺន ដុល្លារ ដូច្នេះសុំកុំព្រួយបារម្ភនោះ ។
ជុំវិញសេចក្តីរាយការណ៍ពីប្រជាពលរដ្ឋអំពីករណី ទីតាំងល្បែងសុីសងខុសច្បាប់ខាងលើនេះ លោក ប្រាក់ ប៊ុនណុន ស្នងការស្តីទីនៃស្នងការដ្ឋាននគរបាលខេត្តត្បូងឃ្មុំ (លោក បែន រ័ត្ន ស្នងការ ជាប់បេសកកម្មក្រៅប្រទេស) បានបំភ្លឺបញ្ជាក់យ៉ាងខ្លីថា៖ ខាងសមត្ថកិច្ចរបស់លោកមិនមានសិទ្ធិអាទិ ភាពទៅលើកាស៊ីណូហ្នុងទេ គឺមានតែខាងនាយកដ្ឋានគ្រប់គ្រងបនល្បែង និងថ្នាក់ខេត្តជាអ្នកសម្រេច ឯខាងកម្លាំង សមត្ថកិច្ចចាំតែទទួលបញ្ជា និង អនុវត្តប៉ុណ្ណោះ? ។
សហភាតរៈយើងខ្ញុំបានបញ្ជូនព័ត៌មានស្តីអំពីទីតាំងបនល្បែងនេះ និងស្នើសុំការបំភ្លឺបញ្ជាក់លំអិត អំពីច្បាប់អាជីវកម្ម កាស៊ីណូ និង ចំណាត់ការរបស់អាជ្ញាធរខេត្តចំពោះគោលនយោ បាយភូមិ ឃុំ មានសុវត្ថិភាព តាមរយៈ whatsApp ទៅលោក គន់ សុភា អភិបាលរងខេត្ត ត្បូងឃ្មុំដែរ ប៉ុន្តែពុំមានការឆ្លើយតបពន្យល់ឡើយ ។
ដូច្នេះបើផ្អែកតាមសេច ក្តីរាយការណ៍ របស់ប្រជាពលរដ្ឋ ដែលព្រួយបារម្ភពីសុវត្ថិភាព និង សន្តិសុខក្នុងការរស់នៅក្នុងមូលដ្ឋានព្រោះថា កាលណាមានបនល្បែង គឺ ចោរកម្ម កើតឡើងនៅគ្រប់ទីកន្លែង ពួកគាត់ សូមសំណួមពរដល់ថ្នាក់ដឹកនាំខេត្តត្បូងឃ្មុំ មេត្តាជួយចាត់វិធានការបំបិទទីតាំងល្បែងសុីសងរបស់លោកស្រ៊ុន និង មេការឈ្មោះណាង ជ្រកក្រោមស្លាកកាស៊ីណូ ភូមិយើង នៅអន្លង់ជ្រៃ ស្រុកពញាក្រែក ខេត្តត្បូងឃ្មុំនេះចោលទៅ ។ ប៉ុន្តែ នៅថ្ងៃទី១៧ មករា ២០១៩ ការិយាល័យនិពន្ធយើង ទទួល បានការរាយការណ៍ តាមទូរស័ព្ទពីមន្ត្រីរាជការតូចតាចម្នាក់នៅសាលាខេត្ត ត្បូងឃ្មុំ សុំមិនបញ្ចេញឈ្មោះ បានប្រាប់ថា ទាំង ចៅហ្វាយខេត្ត ចៅហ្វាយខេត្តរង មេប៉េអឺម មេប៉ូលីសខេត្ត ត្បូងឃ្មុំ និងម្ចាស់ទីតាំងបនល្បែងស៊ីសងដែលមានឈ្មោះ ស្រ៊ុន និងមេការឈ្មោះណាង គឺពួកគេមិនភ្ញាក់ផ្អើល ឬ ព្រួយ បារម្ភអ្វីទេ ។
ប្រភពបន្តទៀតថា មន្ត្រីថ្នាក់ឡូសក្នុងខេត្តជា ច្រើនាក់និយាយបែបចំអកអោយក្រុមអ្នកកាសែត និងគេហ ទំព័រនានាដែលផ្សព្វផ្សាយអំពីល្បែងជល់មាន់នៅក្នុងទឹកដី ខេត្តត្បូងឃ្មុំ គឺពួកអ្នកកាសែតទាំងនោះអត់ស្គាល់ និងយល់ដឹងស៊ីជំរៅថា ទឺកដីត្បូងឃ្មុំ អ្នកដឹកនាំភាគច្រើនពោរពេញ ទៅដោយសែស្រឡាយ សាច់ញាតិ សម្តេច និង សាច់ញាតិមន្ត្រី ជាន់ខ្ពស់ក្នុងជួររាជរដ្ឋាភិបាល ចឹងហើយទីតាំងបនល្បែងស៊ីសង ជល់មាន់នោះទៀតសោតក៏ស្ថិតក្នុងដីរបស់កុង្សីយ៍ក្រសួងសង្គមកិច្ច ជាប់ខ្សែស្រឡាយសម្តេចពញាចក្រីថែមទៀត ដូច្នេះត្រឹមថ្នាក់ចៅហ្វាយខេត្ត ម៉េចហ៊ានបង្ក្រាបចេះតែលំៗ យករួចខ្លួនម៉ាគ្រាៗទៅកុំខ្វល់រឿងកាសែតផ្សាយច្រើនពេក។
ចឹងមែននោះបើពុំមានបទបញ្ជាពី លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ និងសម្តេចក្រឡាហោម ស ខេង ដាក់ចេញវិធានការក្តៅដើម្បីចាត់ការទៅលើបនល្បែងស៊ីសង ជល់មាន់ដ៏កក្រើកនៅអន្លង់ជ្រៃ ស្រុកពញាក្រែក ខេត្តត្បូងឃ្មុំ ទេ គឺគ្មានអ្នកណាហ៊ានប៉ះពាល់សៃវៀនមាន់ជល់លោក ស្រ៊ុន និង មេការឈ្មោះណាងនេះទរ Sic! ។
ពិតជាមិនធម្មតាមែន លោកស្រ៊ុន បើកសង្វៀនមាន់ជល់បានខ្លាំងជាងសៃវៀនមាន់របស់លោក ហ៊ុន ជា ក្មួយសម្តេចតេជោនៅអរិយក្សត្រ ស្រុក ល្វាឯម ខេត្តកណ្តាលដែលត្រូវសមត្ថកិច្ចខេត្តកណ្តាល ចេញ មុខបង្ក្រាបឈូសបំផ្លាញចោលទីតាំងតុលាការ កាត់ទោសមាន់ជល់ ដោយកាត់ក្បាល ហើយសម្តេចតេជោបញ្ជាអោយតាមចាប់បងថ្លៃ លោក ហ៊ុន ជា ដាក់គុកទៀត ។ ចាំមើលថា តើលោកនាយឧត្តម សេនិយ៍ នេត សាវឿន និងសម្តេចក្រឡាហោម ស ខេង លោកទាំងពីរសម្ងំស្ងៀម ឬ រង់ចាំបញ្ជាពីសម្តេចតេជោ ហ៊ុន សែន ដាក់ចេញទើបចាត់ការ? ។ ការិយាល័យនិពន្ធយើង មិនអាចអាចសុំការបំភ្លឺពីលោកស្រ៊ុន និង លោក ណាងបានទេ ព្រោះពុំមានលេខទូរស័ព្ទ ៕
