ខេត្តពោធិ៍សាត់ ៖ ប្រភពពីសមត្ថកិច្ចសូមមិនបញ្ចេញឈ្មោះបានអះអាងថា៖កាលពីវេលាម៉ោង១យប់រំលងអាទ្រាធឈានចូលថ្ងៃទី១៥ ខែមករា ឆ្នាំ២០១៩ មានសមត្ថកិច្ចមួយចំនួនតូចនៅលើដងផ្លូវជាតិលេខ៥ ក្នុងខេត្តកំពង់ឆ្នាំងនិងខេត្តកណ្ដាល នាំគ្នាខ្វែងដែ ខ្វែងជើងរត់ការមើលផ្លូវឲ្យ ក្បួនរថយន្តវ៉េអង់ដឹងឈើរបស់ លោក រត្ឋ សម្បត្តិ ដែលគេរាយការណ៍ថាជាបងប្អូនជីដូនមួយ របស់លោក ម៉ៅ ធនិន ចៅហ្វាយខេត្តពោធិ៍សាត់។
ក្រៅពីពត៍មាននេះវាក៏មានពត៍មានមួយនិយាយថាលោកចៅហ្វាយខេត្តពោធិ៍សាត់មានរថយន្តដឹកឈើធុនវ៉េអង់ចំនួន៥គ្រឿង។ក្នុងនោះមានពាក់ស្លាកលេខ, 0887, 4780, 1154, និងពីរគ្រឿងទៀតមិនទាន់ស្គាល់ស្លាកលេខនៅឡើយ។ឡានធុនយក្សទាំងនេះបាន ធ្វើសកម្មភាពដឹកជញ្ជូនឈើចេញពីស្រុកវាលវែង យកទៅលក់នៅប្រទេសវៀតណាម ជារាងរាល់ថ្ងៃគឺវិលជុំតែម្ដង! ។
ប្រភពខ្សឹបថាក្នុងចំណោមរថយន្តវ៉េអង់៥គ្រឿងនោះមានចំនួន២គ្រឿង ពណ៍ក្រហម ពាក់ស្លាកលេខ 1145 និង1154ជា របស់លោក រត្ឋ សម្បត្តិដែល ជាបងប្អូនជីដូនមួយរបស់លោក ម៉ៅ ធនិននោះកាលពីវេលាម៉ោងប្រមាណជា១០យប់ថ្ងៃទី១៤ ខែមករា ឆ្នាំ២០១៩បានធ្វើសកម្មភាពដឹកឈើចេញពីស្រុកវាលវែង ឡើងមកផ្លូវជាតិលេខ៥ ត្រង់ចំណុចផ្លូវបំបែកលោកតាឧកញ៉ាឃ្លាំងមឿងស្ថិតក្នុងភូមិស្វាយអាត់ ឃុំស្វាយអាត់ ស្រុកសំពៅមាស ខេត្តពោធិ៍សាត់ និងបន្តដំណើរឆ្លងកាត់ខេត្តកំពង់ឆ្នាំងនៅវេលាម៉ោង១រំលងអាទ្រាធ។
បើតាមប្រភពរថយន្តយក្សធុនវ៉េអង់ដឹកឈើទាំង៥ នេះ គឺមានអ្នកចេញមុខរត់ការផ្លូវ ឈ្មោះលោកតាំង អៀង ដេលមាគោរម្យងារឧកញ៉ា ផង ។ទាក់ទងឈ្មោះតាំងអៀងនេះ
កាលពីកន្លងទៅថ្មីៗនេះប្រជាពលរដ្ឋបាននាំគ្នាធ្វើការតវ៉ាជាបន្តបន្ទាប់រហូតនាំគ្នាប្រតិកម្មបិទផ្លូវទៀតផង ដោយ ចោទប្រកាន់ថាមន្ត្រីសមត្ថកិច្ច ពាក់ព័ន្ធមួយចំនួនជាពិសេសអាជ្ញាធរខេត្តពោធិ៍សាត់ឃុបឃឹតជាមួយលោកឧកញ៉ា តាំង អ៊ាង ជ្រកក្រោមស្លាកឈ្មោះខ្មោចក្រុមហ៊ុនMDS របស់លោកឧកញ៉ា ទ្រី ភាពធ្វើការកាប់បំផ្លាញឈើនៅក្នុងព្រៃអភិរក្សនៃដែនដីអាណាចក្រនៃខេត្តពោធិ៍សាត់ ។
មានពត៍មានថា៖លោកឧកញ៉ា តាំង អ៊ាង បានចំណាយលុយអស់រាប់សែនដុល្លារក្នុងមួយខែ បិទត្រចៀក បិទភ្នែកមន្ត្រី មួយចំនួន ចាប់តាំងពីថ្នាក់ខេត្ត ថ្នាក់ក្រសួងពាក់ព័ន្ធ ទើបធ្វើឲ្យមេឈ្មួញឈ្មោះ តាំង អ៊ាង អាចធ្វើព្យុះ ធ្វើភ្លៀង តាមតែទំនើងចិត្ត ដូចជាប្រើប្រាស់ កងកម្លាំងប្រដាប់អាវុធ ដើរចាប់ឈើពីប្រជាពលរដ្ឋក្នុងតំបន់ ដែលពួកគាត់រកស៊ីដឹកជញ្ជូនឈើលក្ខណៈគ្រួសារតាមម៉ូតូ រទេះគោនិងក្របី ណាដែលមិនព្រមលក់ឲ្យក្រុមហ៊ុនក្នុងតម្លៃថោក។
សេចក្ដីរាយការណ៍បន្តថាសព្វថ្ងៃក្រុមឈ្មួញ កំពុងបង្កើនសកម្មកាប់បំផ្លាញព្រៃឈើក្នុងតំបន់អភិរក្សភ្នំសំកុស ដោយគ្មានការទប់ស្កាត់ ។ សូមបញ្ជាក់ថាដែនព្រៃអភិរក្សភ្នំសំកុស ស្ថិតនៅក្នុងស្រុកវាលវែង និងព្រៃអភិរក្សជួរភ្នំក្រវាញ ក្នុងស្រុកភ្នំក្រវ៉ា ។
តាមប្រជាពលរដ្ឋនិយាយថាគេឃើញមានអ្នកអារឈើរាប់សិបនាក់ ខ្លះប្រើប្រាស់គ្រឿងចក្រ មានរថយន្តបង្កុងនិង រថយន្តច្នៃជាច្រើនគ្រឿងចូលកាប់់និងដឹកជញ្ជូន ហើយ ឧកញ៉ា តាំង អ៊ាង បានប្រើមេការបស់ខ្លួនពីរនាក់ ឈរចាំប្រមូលទិញឈើនៅដេប៉ូធំៗចំនួនពីរទីតាំងខុសគ្នា ក្នុងក្រុមហ៊ុនអឹមឌីអេះ។ប្រភពអះអាងថា មេការធំមា្នក់ឈ្មោះ ង៉ូវ ទី ដែលត្រូវជាប្អូនប្រុសរបស់ឧកញ៉ា តាំង អ៊ាង បានបង្កើតដេប៉ូឈើយ៉ាងធំសម្បើម ឈរចាំទិញឈើខុសច្បាប់ក្នុងបរិវណក្រុមហ៊ុន MDS ស្ថិតនៅក្នុងឃុំអន្លង់រាប ស្រុកវាលវែង។
រីឯមេការធំម្នាក់ទៀតឈ្មោះ លីម ជាកូនប្រុសបង្កើតរបស់លោកឧកញ៉ា លាង ចាន់មុនី ដែលល្បីឈ្មោះខាងកាប់បំផ្លាញព្រៃឈើ និងជាមនុស្សជំនិតរបស់លោកឧកញ៉ា ទ្រី ភាព បានយកទីតាំងកែច្នៃឈើដ៏ធំ ស្ថិតនៅទល់មុខក្រុមហ៊ុន MDS ដំណាក់សុក្រំ ក្នុងឃុំសំរោង ស្រុកភ្នំក្រវាញ សម្រាប់ប្រមូលទិញឈើខុសច្បាប់និងស្ទួចដាក់រថយន្ត វេអង ដឹកចេញទៅកាន់រាជធានីភ្នំពេញ ជាប្រចាំ ។តើសកម្មភាពទាំងនេះមិនមែនជាអំពើពុករលួយឬយ៉ាងណា?ដែលមន្ត្រីជំនាញជាពិសេសអភិបាលខេត្តទទួលបានកញ្ចប់ថវិការពីការកាប់ឈើដឹកលក់ធ្វើអាជីកម្មជារៀងរាលថ្ងៃ។
ប្រភពផ្ទៃក្នុងបានអោយដឹងថាលោក តាំង អៀង បានបញ្ជាអោយមេការដឹកឈើចេញពីព្រៃយកមកលក់ឲ្យក្រុមហ៊ុន ហើយដើម្បីបានជ្រកក្រោមស្លាកក្រុមហ៊ុនMDSនោះ លោកឧកញ៉ា តាំង អ៊ាង បានចំណាយលុយម្លៃ៣៥០ដុល្លារក្នុង១ម៉ែត្រគូប បង់ឲ្យឧកញ៉ា ទ្រី ភាព ដោយមានប្រធានតំបន់របស់ក្រុមហ៊ុនម្នាក់ ឈ្មោះជី វ័ន្ត ហៅ ពៅ ចាំសម្របសម្រួលឯកសារច្បាប់ដឹកជញ្ជូន ។
ឈើប្រណីតមួយចំនួនត្រូវបានគេដឹកជញ្ជូនយកទៅស្តុកទុកនៅក្នុងក្រុមហ៊ុនទ្រី ភាពគ្រុប ត្មាតពង និងមួយចំនួនទៀតដឹកយកទៅស្តុកក្នុងឃ្លាំងឈើមួយកន្លែងទៀត នៅខាងក្រោយទីតាំងរោងចក្រកាត់ដេរ ៦ជាន់ ផ្លូវវេងស្រេង មុននាំចេញយកទៅលក់នៅក្រៅប្រទេសនោះ។
ពាក់ព័ន្ធនឹងជំនួញលួចកាប់ឈើខុសច្បាប់ជាទ្រង់ទ្រាយធំ នេះ អង្គភាពសារព័ត៌មានយើង មិនទាន់អាចទំនាក់ទំនងសុំការបកស្រាយបាននៅឡើយទេ ពីសំណាក់ មន្ត្រីពាក់ព័ន្ធពិសេស លោកឧក ញ៉ា តាំង អ៊ាង និងលោក ម៉ៅ ធនិន អភិបាលខេត្ត ។សង្ឃឹមថានឹងមានការបកស្រាយពន្យល់អំពីសេចក្តីរាយការណ៍នេះជាមិនខាន៕