ខេត្តក្រចេះ៖ ហេតុការណ៍ដ៏ភ្ញាក់ផ្អើលនេះបានកើតឡើងកាលពីវេលាម៉ោង ១១:៣០នាទី ថ្ងៃទី១៦ ខែមករា ឆ្នាំ២០១៩ ស្ថិតនៅការដ្ឋានសំណង់ ក្នុងបរិវេណមន្ទីរប្រៃសណីខេត្ត ដែលស្ថិតក្នុងភូមិក្រចេះ សង្កាត់ក្រចេះ ក្រុងក្រចេះ ខេត្តក្រចេះ។
សមត្ថកិច្ច បានឲ្យដឹងថា បន្ទាប់ពីទទួលបានពត៌មានថាមានករណីមនុស្សដេកស្លាប់ សមត្ថកិច្ចបានចុះទៅដល់កន្លែងកើតហេតុ ធ្វើការពិនិត្យលើសាកសព និងប្រមូលពត៌មានជុំវិញរឿងហេតុដឹងថា៖ សពបុរសខាងលើឈ្មោះ ឡុង ម៉ុន ភេទប្រុស អាយុ ២៩ឆ្នាំ ស្នាក់នៅបណ្តោះអាសន្នក្នុងភូមិកាប៉ូ សង្កាត់អូរឬស្សី ក្រុងក្រចេះ ខេត្តក្រចេះ បានដេកស្លាប់ មូលហេតុដោយសារ ខ្យល់គរ នៅចន្លោះម៉ោង៣ទៀបភ្លឺ ថ្ងៃទី១៦ ខែមករា ឆ្នាំ២០១៩។
តាមសម្តីកម្មករធ្វើការជាមួយគ្នា បានឲ្យដឹងថា កាលពីល្ងាចថ្ងៃទី១៥ ពួកគេបាននាំគ្នាផឹកស្រាតាំងពីម៉ោង ៦ល្ងាច រហូតមកដល់ម៉ោង ៣ទៀបភ្លឺ ថ្ងៃទី១៦ ទេីបចូលសម្រាក។
សមត្ថកិច្ច បានបញ្ជាក់ថា លទ្ធផលនៃការពិនិត្យ សាកសព គឺពុំមានបន្សល់ទុកនៅរបួសស្នាមអ្វីគួរអោយកត់សំគាល់ឡើយ។ ក្រោយពីធ្វើការពិនិត្យសពរួច សមត្ថកិច្ចយើងបានប្រគល់សពអោយទៅក្រុមគ្រួសារយកធ្វើបុណ្យតាមប្រពៃណី ៕
ដោយ កិះខន
