ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោក វ៉ាង វិនធៀន (Wang Wentian) ឯកអគ្គរដ្ឋទូតចិន ប្រចាំនៅកម្ពុជានៅព្រឹកថ្ងៃចន្ទ ៩កើត ខែបុស្ស ឆ្នាំច ព.ស២៥៦២ ត្រូវនឹងថ្ងៃទី១៤ ខែមករា ឆ្នាំ២០១៩នេះ បានអញ្ជើញបើកការដ្ឋានសាងសង់ផ្លូវក្រវ៉ាត់ក្រុងទី៣ ប្រវែង៥២.៩៨៣គីឡូម៉ែត្រ(ជាង៥២គីឡូម៉ែត្រ)ឆ្លងកាត់រាជធានីភ្នំពេញ និងខេត្តកណ្តាល ត្រូវចំណាយថវិកាសាងសង់ប្រមាណ ២៧៣លានដុល្លារអាមេរិក ដែលជាលុយរដ្ឋាភិបាលចិន និងថវិការបដិភាគរបស់រាជរដ្ឋាភិបាលកម្ពុជា។
គម្រោងសាងសង់ផ្លូវក្រវាត់ក្រុងខ្សែទី៣នេះ ឆ្លងកាត់ភូមិសាស្ត្ររាជធានីភ្នំពេញជាង ១៥គីឡូម៉ែត្រ និងឆ្លងកាត់ភូមិសាស្ត្រខេត្តកណ្តាលប្រវែងជិត ៣៨គីឡូម៉ែត្រ ដែលមានចំណុចចាប់ផ្តើមពីគីឡូម៉ែត្រ ១៤+១០៥ នៃផ្លូវជាតិលេខ៤ និងចំណុចចុងបញ្ចប់នៅគីឡូម៉ែត្រ ២៤+៨៤០ នៃផ្លូវជាតិលេខ១។ ទំហំទទឹងផ្លូវរហូតដល់ទៅ ២៧ម៉ែត្រសម្រាប់ទីប្រជុំជន សម្រាប់ក្រៅទីប្រជុំជនវិញមានទំហំទទឹងផ្លូវ ២៥ម៉ែត្រ មានដាក់អំពូលបំភ្លឺផ្លូវសម្រាប់កំណាត់ផ្លូវក្នុងក្រុង និងដើមឈើលម្អសម្រាប់កំណាត់ផ្លូវក្រៅក្រុង។
សម្តេចតេជោ ហ៊ុន សែន បានថ្លែងឲ្យដឹងថា នាពេលខាងមុខនេះ កម្ពុជានឹងធ្វើស្ពានអាកាស ៤កន្លែងទៀត ដើម្បីបំពេញតម្រូវការ ពលរដ្ឋក្នុងការធ្វើដំណើរ ខណៈស្ពានអាកាស៥កន្លែង កំពុងដាក់ឲ្យប្រើប្រាស់ ។សម្តេចបានថ្លែងទៀតថា “តិចទៀតនឹងធ្វើផ្លូវក្រោមទឹក ដោយមិនបាច់ធ្វើស្ពានឆ្លងទន្លេទៀតទេ ពេលនោះ យើងអួតទៀតហើយ ដល់ពេលមានច្រើនលែងអួតហើយ”។
ក្រៅពីផែនការធ្វើស្ពានអាកាសថែមសម្ដេចបានថ្លែងថា “លូវធ្វើស្ពានដែលជាខ្សែក្រវ៉ាត់ក្រុង ឆ្លងកាត់កោះអន្លង់ចិន រវាងម្ខាងត្រើយខាងកើតនិងត្រើយខាងលិច ប៉ុន្តែត្រូវទម្លាក់ខ្លួន ទៅកោះអន្លង់ចិន ដែលធ្វើឲ្យអ្នកអន្លង់ចិន ធ្លាប់ពឹងពាក់ទៅលើជីវិតរត់ទូកដនិងជីវិតអ្នករត់ទូកដរនៅកោះអន្លង់ចិន និងត្រូវបញ្ចប់នៅឆ្នាំ២០២១” ។
សម្ដេចបន្តថា អ្នកទូកដទាំងឡាយ សូមផ្ទេរពីអ្នករត់ទូកដរឬរត់សាឡាង ទៅធ្វើមុខរបរផ្សេងទៅ ប៉ុន្តែជំនួសមកវិញដោយស្ពានបេតុងរហូតដល់ទទឹង២៥ម៉ែត្រ កុំឲ្យវាទៅជាកោះដ គឺត្រូវកសាងនូវស្ពាន នៅកោះអន្លង់ចិន គ្រាន់តែសាច់លាតគឺចំនួន ៩៩៦ម៉ែត្រ ខាងកើត៦៣០ម៉ែត្រនិងខាងលិច៣៦៦ម៉ែត្រ ដែលចាត់ទុកថាជាស្ពានដែលធំហើយវាបម្រើដល់ប្រព័ន្ធដឹកជញ្ជូន និងការធ្វើដំណើររបស់ប្រជាពលរដ្ឋ ដែលកាត់បន្ថយការកកស្ទះ និងបង្កើតភាពចំណេញសម្រាប់ប្រជាពលរដ្ឋរបស់យើង។
សម្តេចតេជោ បានមានប្រសាសន៍បញ្ជាក់ថា ការកសាង និងអភិវឌ្ឍន៍ប្រទេសកម្ពុជា គឺបានចាប់ផ្តើមពីការអនុវត្តនូវយុទ្ធសាស្ត្រចតុកោណតាំងពី ៣២ឆ្នាំមុន ដែលបានផ្តោតទៅលើ ផ្លូវ, ទឹក, ភ្លើង និង មនុស្ស ប៉ុន្តែចាប់ពីឆ្នាំ២០១៣ មក យើងបានប្តូរមកយក មនុស្ស, ផ្លូវ, ទឹក, និងភ្លើងវិញ ដោយយើងបានប្តូរយកធនធានមនុស្សជាវិស័យអាទិភាពមុខគេ។
