ខេត្តត្បូងឃ្មុំ : ទីតាំងបនល្បែងស៊ីសង១កន្លែងស្ថិតនៅក្នុងភូមិអន្លង់ជ្រៃ ឃុំកក់ ស្រុកពញាក្រែក ខេត្តត្បូងឃុំ ត្រូវបានប្រជាពលរដ្ឋរាយការណ៍អោយដឹងថា៖ សព្វថ្ងៃបាននឹងកំពុងបើកដំណើរការលេងល្បែងស៊ីសងជាច្រើប្រភេទ យ៉ាងគគ្រឹកគគ្រេងនៅខាងក្រោយផ្ទះសំណាក់ មានស្លាកយីហោ ភូមិយើង ហើយមានឈ្មោះស្រ៊ុនជាអ្នកគ្រប់គ្រង និងមានមេការធំឈ្មោះណាន ជាអ្នកចេញមុខកាងបនល្បែងដ៏ធំនេះ ។
តាមការរាយការណ៍ បញ្ជាក់ថា ទីតាំងល្បែងស៊ីសងខាងលើនេះមានលេងអាប៉ោង បៀរ និងខ្លាំងជាងគេគឺល្បែងជល់មាន់ ដែលក្នង១ថ្ងៃៗមានអ្នកញៀនល្បែងមានកំរឹតឧកញ៉ាៗ មន្ត្រីរាជការធំៗ ,ទាហាន ប៉ូលិស ជិះសុទ្ធតែឡានទំនើបៗចូលទៅលេង ចាក់ភ្នាល់ស៊ីសង ចាញ់ឈ្នះរាប់រយ រាប់ពាន់ដុល្លារអាមេរិក ស្រែកហ៊ោរកញ្ជ្រាវកងរំពងយ៉ាងអនាធិបតេយ្យ ដោយគ្មានការរំខានពីសមត្ថកិច្ច នៅទីនោះឡើយ ។
ប្រភពពីអ្នក ធ្លាប់ទៅលេង ល្បែងជល់មាន់នៅទីនោះម្នាក់ សុំមិនបញ្ចេញឈ្មោះ បានប្រាប់ អោយដឹងថា តាមដែលគាត់ធ្លាប់ចូលទៅលេង គឺខាងម្ចាស់សៃវៀនមាន់នៅអន្លង់ ជ្រៃឈ្មោះ ស្រ៊ុន ដែលគេស្គាល់ និងដឹងថាជាសាច់ញាតិរបស់លោកអភិបាលរងខេត្តត្បូងឃ្មុំ ឈ្មោះ គន់ សុភា និងឈ្មោះណាង ជាមេការបានប្រាប់ថា សូមកុំព្រួយបារម្ភពីការចុះចាប់ ឬបង្ក្រាបពីសមត្ថកិច្ចអី ព្រោះទីតាំងគាត់បានចំណាយលុយរត់ការបង់អោយសមត្ថកិច្ច និងអាជ្ញាធរដែនដីគ្រប់លំដាប់ថ្នាក់អស់ហើយ ១ខែៗអស់រាប់ ម៉ឺន ដុល្លារអាមេរិកសុំកុំព្រួយបារម្ភ !?។
ជុំវិញសេចក្តីរាយការណ៍ពីប្រជាពលរដ្ឋអំពីករណី ទីតាំងល្បែងស៊ីសងខុសច្បាប់ខាងលើនេះ លោក ប្រាក់ ប៊ុនណុន ស្នងការស្តីទីនៃស្នងការដ្ឋាននគរបាលខេត្តត្បូងឃ្មុំ (លោក បែន រ័ត្ន ស្នងការ ជាប់បេសកកម្មក្រៅប្រទេស) បានបំភ្លឺបញ្ជាក់យ៉ាងខ្លីថា៖ ខាងសមត្ថកិច្ចរបស់លោកមិនមានសិទ្ធិអាទិ ភាពទៅលើកាស៊ីណូហ្នុងទេ គឺមានតែខាងនាយកដ្ឋានគ្រប់គ្រងបនល្បែង និងថ្នាក់ខេត្តជាអ្នកសម្រេច។ ឯខាងកម្លាំង សមត្ថកិច្ចចាំតែទទួលបញ្ជា និង អនុវត្តប៉ុណ្ណោះ?! ។
ឯខាងខេត្ត ការិយាល័យនិពន្ធ សហការីយើងខ្ញុំបានសុំការបំភ្លឺពីលោក ជៀម ច័ន្ទសោភ័ណ្ឌ អភិបាលខេត្តត្បូងឃ្មុំ តាមរយៈ whatsApp ប៉ុន្តែពុំមានការឆ្លើយតប ។ ដោយឡែកតាម ប្រភពព័ត៌មាន ពីមន្ត្រីរាជការបំរើការងារនៅក្នងរដ្ឋបាល សាលាខេត្តត្បូងឃ្មុំម្នាក់ សុំមិនបញ្ចេញឈ្មោះ បានប្រាប់តាម ទូរស័ព្ទ មកការិយាល័យយើងអោយដឹងថា រឿងអាជីវកម្មកាស៊ីណូ នៅតាមច្រកព្រំដែនក្នុងទឹកដីខេត្តត្បូងឃ្មុំ គឺមានតែសួរ លោក គន់ សុភា អភិបាលរងខេត្ត ដែលត្រូវជាប្អូនប្រុសឯកឧត្តម គន់ គីម ទេទើបអាដឹងច្បាស់ពីច្បាប់ទម្លាប់ ។
ការិយាល័យនិពន្ធយើង បានបញ្ជូនព័ត៌មានស្តីអំពីទីតាំងបនល្បែងនេះ និងស្នើសុំការបំភ្លឺបញ្ជាក់លំអិត អំពីច្បាប់អាជីវកម្ម កាស៊ីណូ និង ចំណាត់ការរបស់អាជ្ញាធរខេត្តចំពោះគោលនយោ បាយភូមិ ឃុំ មានសុវត្ថិភាព បែបណា តាមរយៈ whatsApp ដែរ ប៉ុន្តែពុំមានការឆ្លើយតប ។
ដូច្នេះបើផ្អែកតាមសេចក្តីរាយការណ៍ របស់ប្រជាពលរដ្ឋ ដែលព្រួយបារម្ភពីសុវត្ថិភាព និង សន្តិសុខក្នុងការរស់នៅក្នុងមូលដ្ឋានព្រោះថា កាលណាមានបនល្បែង គឺ ចោរកម្ម កើតឡើងនៅគ្រប់ទីកន្លែង ពួកគាត់ សូមសំណួមពរដល់ថ្នាក់ដឹកនាំខេត្តត្បូងឃ្មុំ មេត្តាជួយចាត់វិធានការបំបិទទីតាំងល្បែងស៊ីសងរបស់លោកស្រ៊ុន និង មេការឈ្មោះណាង ជ្រកក្រោមស្លាកកាស៊ីណូ ភូមិយើង នៅអន្លង់ជ្រៃ ស្រុកពញាក្រែក ខេត្តត្បូងឃ្មុំនេះចោលទៅ ។ ការិយាល័យយើងមិនអាចសុំការបំភ្លឺពីលោកស្រ៊ុន និង លោក ណាងបានទេ ព្រោះពុំមានលេខទូរស័ព្ទ ៕