ក្រចេះ៖ បុរសម្នាក់ ត្រូវនគរបាលប៉ុស្ដិ៍រដ្ឋបាលជ្រោយបន្ទាយ ស្រុកព្រែកប្រសព្វ បាញ់ស្លាប់យ៉ាងវេទ្ទនាក្នុងថ្លុកឈាម គ្រាដែលជនរងគ្រោះបានប្រើអំពើហឹង្សាទៅលើអ្នកដទៃ និងចម្រុងប្រើហិង្សាលើសមត្ថកិច្ច។ ដោយករណីនេះ កើតឡើងកាលពីល្ងាចថ្ងៃទី១៦ ខែកក្ដដាឆ្នាំ២០១៦នេះ វេលាម៉ោង ១៧និង១៥នាទី នៅចំនុចភូមិល្អៀត ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ។
លោក អេង ហឿន នាយប៉ុស្ដិ៍នគរបាលជ្រោយបន្ទាយ បានឲ្យដឹងថា ជនរងគ្រោះឈ្មោះ អ៊ំ ស៊ីណា ភេទប្រុស អាយុ ២០ឆ្នាំ មានទីលំនៅក្នុងភូមិឃុំកើតហេតុខាងលើ។ ហេតុការណ៍នេះ កើតឡើង គឺបណ្ដាលមកពីជនរងគ្រោះឈ្មោះ អ៊ំ ស៊ីណា បានវាយទៅលើឈ្មោះ ភន ហ៊ី អាយុ ៣៤ឆ្នាំ ដែលជាប្រជាពលរដ្ឋ រស់នៅក្នុងភូមិជាមួយគ្នា បណ្ដាលអោយរងរបួសធ្ងន់ ចំក្បាលផ្នែកខាងក្រោយ ហើយក៏ត្រូវក្រុមគ្រួសារនាំយកឈ្មោះ ហ៊ី ទៅព្យាបាលនៅមន្ទីរពេទ្យបង្អែកខេត្ត។
ប្រជាពលរដ្ឋនៅកន្លែងកើតហេតុ បានបញ្ចាក់ថា ដំបូងឡើយ គេឃើញជនរងគ្រោះ ដែលសមត្ថកិច្ចបាញ់ស្លាប់នោះ បានដើរចូលតាមផ្ទះអ្នកភូមិ ទំនងជាញៀនថ្នាំ ក៏បានកាន់ដំបងទៅវាយបុរសម្នាក់ដែលកំពុងឈរបើកលុយនៅកន្លែងវេលុយ true money បណ្តាលអោយរងរបួសធ្ងន់ ត្រូវបានគេបញ្ចូនទៅសង្គ្រោះនៅមន្ទីពេទ្យបង្អែកខេត្ត ខណះនោះអ្នកភូមិបានរាយការណ៍ទៅនគរបាលមូលដ្ឋាន។ ពេលនោះសមត្ថកិច្ចចំនួន ៤នាក់ ក៏បានចុះដល់ទីតាំងកើតហេតុ ក៏បានឃើញជនបង្ករនោះកាន់ដំបងអូសតាមផ្លូវ ដើរត្រឡាប់ទៅផ្ទះ។ ខណះនោះសមត្ថកិច្ច ក៏បានសម្របសម្រួល ដោយអោយជននោះ បោះចោលដំបង ប៉ុន្តែរគេមិនបានបោះចោល និងបម្រុងស្ទុះទៅរកវៃសមត្ថកិច្ច ត្រូវចំកាំភ្លើង។ សមត្ថកិច្ចក៏បានបាញ់ឡើងលើមួយគ្រាប់ ក្រោយមកគេបន្តរស្ទុះមកទៀត សមត្ថកិច្ចក៏បាញ់ត្រូវចំប្រឡោះជើងមួយគ្រាប់ទៀត តែដោយសារគេបន្តរស្ទុះទៅវៃម្តងទៀតត្រូវចំដៃប៉ូលិសដដែល ក៏មានកាបាញ់គ្រាប់ទីបីត្រូវចំខាងក្រោមដោះ បណ្តាលអោយរងរបួសធ្ងន់ ហើយត្រូវបានស្លាប់ ប្រមាណជាកន្លះម៉ោងក្រោយកើតហេតុតែម្ដង ។
លោកនាយប៉ុស្ដិ៍ជ្រោយបន្ទាយ បានបញ្ជាក់ថា កម្លាំងនគរបាលមានគ្នាចំនួន ៤នាក់ បានមកឃាត់ខ្លួនជនរងគ្រោះ ហើយបានបាញ់សំឡុត ដោយគ្រាប់ទី ១បាញ់ឡើងលើ គ្រាប់ទី ២បាញ់ចុះក្រោម តែជនរងគ្រោះនៅតែដើរចូលមក ថែមទាំងមានប្រនុង១ បានវាយត្រូវដៃឈ្មោះ ទួន លីន ជាមន្ត្រីនគរបាល ទើបសមត្ថកិច្ច បាញ់គ្រាប់ទី៣ ផ្លាតត្រូវច្អឹងជំនីជនរងគ្រោះ បណ្ដាលឲ្យស្លាប់តែម្ដង ។
លោកនាយប៉ុស្ដិ៍ បានបញ្ជាក់ឲ្យដឹងបន្តថា មន្ត្រីនគរបាលរបស់លោកនោះ ក៏ត្រូវបានឃាត់ខ្លួន នៅអធិការរដ្ឋានស្រុកព្រែកប្រសព្វ ដើម្បីដោះស្រាយតាមនីតិវិធីច្បាប់ផងដែរ ក្រោយមានបញ្ជាភ្លាមៗ ពីលោកស្នងការខេត្ត ឧត្តមសេនីយ៍ត្រី លន់ សុផាត។
បច្ចុប្បន្ន មន្ត្រីនគរបាលជំនាញខេត្ត បានសហការជាមួយមន្ត្រីជំនាញនគរបាលខេត្ត កំពុងធ្វើការស្រាវជ្រាវស៊ើបអង្កេតជុំវិញរឿងហេតុខាងលើ នៅកន្លែងកើតហេតុ ចំណែកឯសាកសពជនរងគ្រោះ គឺត្រូវបានក្រុមគ្រួសារសាច់ញាតិយកទៅធ្វើបបុណ្យតាមប្រពៃណី៕
ដោយ ៖ កិះ ខន
