ខេត្តបាត់ដំបង ៖ លោក ហែម សុផុន នាយប៉ុស្ដិ៍ជ្រោយស្ដៅ ស្រុកថ្មគោល ខេត្តបាត់ដំបងត្រូវបានគេរាយការណ៍ថាធើការមិនស៊ីសង្វាក់គ្នាទេ។ ករណីយ៍នេះកើតឡើងកាលពីជាង១ខែមុនគឺលោកនាយប៉ុស្ដិ៍ជ្រោយស្ដៅ បានប្រើកាំភ្លើងAK៤៧ បាញ់មេឃជាច្រើនគ្រាប់ព្រោះតែខឹង លោកមេឃុំ មិនព្រមឲ្យបើកល្បែងស៊ីសងខុសច្បាប់។
លោកឧត្តមសេនីយ៍ត្រី ជេត វណ្ណនី ស្នងការរងនគរបាលខេត្តបាត់ដំបងទទួលស្គាល់ថាមានហើយ ថាករណីនេះកំពុងចាត់វិធានការតាមនីតិវិធីរបស់អង្គភាព។បើតាមមន្ត្រីមូលដ្ឋានឲ្យដឹងថាករណិយ៍លោកនាយប៉ុស្ដិ៍ជ្រោយស្ដៅបាញ់គំរាមលោកមេឃុំជ្រោយស្ដៅនេះបានកើតឡើងតាំងពីថ្ងៃទី១០ ខែធ្នូ ឆ្នាំ២០១៨ តែគេព្យាយាមបិទបាំង ។ ប្រភពព័ត៌មានបានឲ្យដឹងទៀតថា លោក ហែម សុផុន នាយប៉ុស្ដិ៍ជ្រោយស្ដៅដែលស្រវឹង បានប្រើប្រាស់ កាំភ្លើង បាញ់មេឃជាច្រើនគ្រាប់ គំរាមកំហែងដល់លោក ហ៊ីន ណាគ្រី មេឃុំជ្រោយ ។មូលហេតុដែលនាំឲ្យលោកនាយប៉ុស្ដិ៍ក្ដៅក្រហាយ រហូតឈានដល់បាញ់មេឃជាច្រើនគ្រាប់គំរាមលោកមេឃុំនេះត្រូវបានគេនិយាយថា ដោយសារតែខឹងលោកមេឃុំ «មិនអនុញាតឲ្យបើកល្បែងស៊ីសង» ។
លោកហ៊ីន ណាគ្រី មេឃុំជ្រោយស្ដៅ បានប្រាប់កសែតកាលពីថ្ងៃទី១០មករា ថា ពិតជាមានរឿងនេះកើតឡើងចំពោះរូបលោកមែន ។លោក ហ៊ីន ណាគ្រី បញ្ជាក់ថា លោក ហែម សុផុន បានគំរាមកំហែងនិងប្រមាថរូបលោកគ្រប់បែបយ៉ាង ដោយសារទំនាស់រឿងសុំបើកល្បែងស៊ីសង ។ លោក ហ៊ីន ណាគ្រី បានបញ្ជាក់បន្ថែមអំពីករណីនេះថា កន្លងមកនាយប៉ុស្ដិ៍រូបនេះតែងស្នើសុំបើកល្បែងស៊ីសងនៅក្នុងមូលដ្ឋាន តែលោកមិនអនុញ្ញាត ទើបធ្វើឲ្យលោកនាយប៉ុស្ដិ៍ឈានដល់ការប្រើប្រាស់អាវុធបាញ់មេឃគំរាមកំហែងលោកបែបនេះ ។ លោកបានដាក់ពាក្យបណ្ដឹងទៅគណៈបញ្ជាការឯកភាពស្រុក និងខេត្តរួចហើយ ដើម្បីឲ្យជួយអន្តរាគមន៍និងដោះស្រាយ។
លោកឧត្តមសេនីយ៍ត្រី ជេត វណ្ណនី បញ្ជាក់ថា ប្រសិនបើការផ្ទុះអាវុធរបស់លោកនាយប៉ុស្ដិ៍ជ្រោយស្ដៅដោយសារតែរឿងសុំបើកល្បែងស៊ីសងមែន វាជាកំហុសធ្ងន់ណាស់សម្រាប់លោកនាយប៉ុស្ដិ៍ ខណៈខ្លួនជាមន្ត្រីនគរបាលយុត្ដិធម៌ ។លោក ហ៊ីន ណាគ្រី មេឃុំជ្រោយស្ដៅ បានបញ្ជាក់អំពីជំហររបស់លោកថា លោកទាមទារឲ្យថ្នាក់ដឹកនាំត្រូវតែធ្វើការផ្លាស់ប្ដូរលោក ហែមសុផុន ចេញពីប៉ុស្ដិ៍ជ្រោយស្ដៅ ព្រោះលោកមិនអាចធ្វើការងារជាមួយមន្ត្រីរូបនេះបន្តទៀតបានទេ ។
