ភ្នំពេញ ៖ មន្ត្រីនគរបាលចំនួន៥រូប ក្នុងនោះ មានថ្នាក់ឧត្តមសេនីយ៍ត្រី (ផ្កាយ១) ម្នាក់ និង៤រូបទៀត សុទ្ធតែពាក់ស័ក្តិ៣ និងស័ក្តិ៤ ទាំងកណ្តាលថ្ងៃត្រូវបានកម្លាំងសមត្តកិច្ចនៃតម្រួតបទបញ្ជាចុះទៅចាប់ក្រៀក នៅលើដងផ្លូវ ទាំងកំពុងគ្រងឯកសណ្ឋាន កាលពីរសៀលថ្ងៃទី១០ ខែមករា ឆ្នាំ២០១៩ នៅក្នុងទឹកដីខណ្ឌសែនសុខ ។
ការពិតមន្ត្រីនគរបាលចំនួន៥រូប ដែលត្រូវបានឃាត់ ខ្លួននោះ សុទ្ធតែជាកម្លាំងរបស់គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម (គ.ប.ផ.ក) ក្រសួងមហាផ្ទៃ។មូលហេតុត្រូវបានឃាត់ខ្លួនដោយសារតែពួកគេចុះទៅឆែកទំនិញក្នុងឃ្លាំងដ៏ធំមួយ គ្មានបទបញ្ជាពីថ្នាក់លើ គ្មានការដឹកនាំពីព្រះរាជអាជ្ញា និងពុំបានសុំកិច្ចសហការជាមួយសមត្ថកិច្ចមូលដ្ឋាន?!។
ប្រភពពីមន្ត្រីស្នងការនគរបាលរាជធានីភ្នំពេញ បានឱ្យដឹងថា ក្រុមមន្ត្រីនគរបាលដែលត្រូវបានឃាត់ខ្លួនខាងលើនេះ ដំបូងឡើយ បានបើករថយន្ត២គ្រឿង ទៅឈប់នៅមុខឃ្លាំងស្តុកទំនិញដ៏ធំមួយ ស្ថិតនៅលើផ្លូវ១០១៩ សង្កាត់ទឹកថ្លា ខណ្ឌសែនសុខ ក្នុងគោលបំណងចូលទៅឆែកឆេរ ប៉ុន្តែសកម្មភាពទាំងនេះ ធ្វើឡើងដោយខុសច្បាប់ ដោយសារតែ ទី១-គ្មានលិខិតបេសកកម្ម និងបទបញ្ជាពីថ្នាក់ដឹកនាំរបស់ខ្លួន ទី២-មិនមានព្រះរាជអាជ្ញាចូលរួមដឹកនាំកម្លាំង និងទី៣-កម្លាំងទាំងនេះមិនបានចូលរួមសហការជាមួយកម្លាំងមូលដ្ឋាននោះឡើយ។
នៅមុន ពេលកើតហេតុ ពួកគេទាំង៥នាក់ មុនដំបូងឡើយ ស្លៀកពាក់ស៊ីវិល ដោយសម្លៀកបំពាក់ជាឯកសណ្ឋាននគរបាល ត្រូវបានដាក់នៅក្នុងរថយន្តទាំងអស់ ប៉ុន្តែនៅពេលយករថយន្តទៅឈប់ចតមុខឃ្លាំងទំនិញ ដែលគេដឹងថា មានម្ចាស់ជាឧកញ៉ាម្នាក់ផងនោះ ក៏បានធ្វើការសួរនាំថា កម្លាំងមកពីខាងណា? ប៉ុន្តែពួកគេមិនប្រាប់ ហើយពេលសុំលេខទូរស័ព្ទ ក៏មិនឱ្យ ហើយអញ្ជើញឱ្យចូលក្នុង ក៏មិនព្រមចូល ហេតុដូច្នេះហើយ ទើបម្ចាស់ឃ្លាំងបានសុំអន្តរាគមន៍ទៅថ្នាក់លើ រហូតបញ្ជាឱ្យកម្លាំងតម្រួតបញ្ជា ចេញទៅឃាត់ខ្លួនពួកគេតែម្តង។
លោកឧត្តមសេនីយ៍ទោទូចយុទ្ធាអនុប្រធាន គណៈកម្មាធិការប្រយុទ្ធប្រឆាំងផលិតផលក្លែងក្លាយបានអះអាងថា «កម្លាំងរបស់លោកធ្វើការដោយឆន្ទៈពិតប្រាកដ ហើយមានការឯកភាពពីព្រះរាជអាជ្ញា និងតាមរថយន្តដឹកបារីក្លែងក្លាយមួយគ្រឿង មិនមែនចេះតែធ្វើសកម្មភាព ខុសច្បាប់នោះឡើយ ហេតុដូច្នេះទើប ឯកឧត្តម អគ្គស្នងការនគរបាលជាតិ បានធ្វើការសម្របសម្រួលឲ្យមានការអនុញ្ញាតឲ្យត្រឡប់ទៅវិញ ហើយបើធ្វើខុសមែននោះ ឯកឧត្តម អគ្គស្នងការ ក៏មិនឲ្យទៅវិញដែរ»។
ក្រោយពីដឹងថា ឧកញ៉ារាយការណ៍រកកម្លាំងអន្តរាគមន៍ពួគេក៏ស្ទុះមករកឯកសណ្ឋានវិញទៅ ។ នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានថ្លែងបញ្ជាក់ថា ពិតជាមានការឃាត់ខ្លួនមន្ត្រីនគរបាលទាំងនោះមែន ដែលពួកគេនៅខាងប្រឆាំងទំនិញក្លែងក្លាយ ប៉ុន្តែក្រោយការសួរនាំ ក៏ឱ្យត្រឡប់ទៅវិញតែម្តង។ប្រសិនបើមានច្បាប់ទម្លាប់មែន រឿងហ្នឹងច្បាស់ជាត្រូវជម្រះបញ្ជីរជាមួយគ្នានៅពេលក្រោយទៀតហើយ !៕
