ភ្នំពេញ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោកវេងសាខុន បានឲ្យដឹងអំពីការសម្រេចបង្កើតស្ថាប័នថ្មីមួយបន្ថែមទៀតរបស់រាជរដ្ឋាភិបាលសម្រាប់បង្ក្រាបបទល្មើសឈើប្រណិតមានឈ្មោះថា «លេខាធិការដ្ឋានអចិន្ត្រៃយ៍ថ្នាក់ជាតិ បង្ការ ទប់ស្កាត់ និងបង្ក្រាបការកាប់ ការដឹកជញ្ជូន ការប្រមូល ការស្តុកទុក និងការនាំចេញឈើគ្រញូង»។
លោក វេង សាខុន បានឲ្យកាសែតដឹងថា ការបង្កើតលេខាធិការដ្ឋានអចិន្ត្រៃយ៍ថ្នាក់ជាតិ ដើម្បីបង្ក្រាបការកាប់ឈើគ្រញូង ដោយសារឈើនេះ ជាសម្បត្តិដ៏កម្រមួយរបស់ប្រទេសកម្ពុជា។ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ដូច្នេះ «ការបង្កើតលេខាធិការដ្ឋានអចិន្ត្រៃយ៍ថ្នាក់ជាតិនេះ គឺដើម្បីអនុវត្តន៍បទបញ្ជារបស់រាជរដ្ឋាភិបាល ដែលបានចេញកាលពីថ្ងៃទី២២ ខែមករា ឆ្នាំ២០១៣។ ការបង្ក្រាបបទល្មើសព្រៃឈើមានជាបន្តបន្ទាប់មកហើយ តែយើងចង់បង្កើនប្រសិទ្ធភាពបន្ថែមទៀត លើការបង្ក្រាបបទល្មើសឈើគ្រញូង ដែលជាប្រភេទឈើកម្រនៅក្នុងប្រទេសរបស់យើង»។
សូមបញ្ជាក់ដែរថាកាលពីថ្ងៃទី១៥មករាឆ្នាំ២០១៣សម្តេចតេជោហ៊ុនសែននាយករដ្ឋមន្ត្រីអាណត្តិទី៥បានចេញអនុក្រឹត្យបង្កើតក្រមចំរុះថ្នាក់ជាតិបង្ក្រាបបទល្មើសព្រៃឈើនៅតំបន់ភូមិភាគឥសាន្តដឹកនាំដោយលោកនាយឧត្តមសេនីយ៍សៅសុខាមេបញ្ជាការកងរាជអាវុធហត្ថផ្ទៃប្រទេស។ក្រុមមួយនេះធ្វើសកម្មភាពគ្នុងអាណត្តិទី៥បានប្រហែលជា២ឆ្នាំចាប់បានឈើប្រណិតល្មើសច្បាប់ជាង៧ម៉ឺនម៉ែតគូបហើយក៏ក៏ស្ងាតឈឹងទៅវិញទៅដោយមិនឃើញចាប់បានឧក្រឹដ្ឋជនព្រៃឈើណាម្នាក់យកមកផ្តន្ទាទោសឡើយរហូតមានពាក្យនិយាយថាគេយកលុយបិទមាត់បាត់ទៅហើយ។អាឡូវចូលដល់អាណត្តិទី៦ស្រាប់តែឃើញក្រសួងកសិកម្មបង្កើតក្រុមបង្ក្រាបស្អីណាមួយទៀតទៅវិញ។?
ករណីយ៍នេះលោករដ្ឋមន្ត្រីវេងសុខុនបានអះអាងថា ក្រុមការងារនៃលេខាធិការដ្ឋាននេះ មិនមែនធ្វើការតែលើបទល្មើសឈើគ្រញូងមួយមុខទេ គឺអាចធ្វើការងារលើបទល្មើសឈើដទៃទៀតផងដែរ។ រឿងបង្ក្រាបបទល្មើសព្រៃឈើលោករដ្ឋមន្ត្រីទទួលស្គាល់ថា៖ បទល្មើសជួញដូរឈើប្រណិត រួមទាំងឈើក្រញូងមានបញ្ហាស្មុគស្មាញ ឈ្មួញមានល្បិចកិច្ចកលច្រើន។
លោករដ្ឋមន្ត្រី បានប្តេជ្ញាប្រឹងប្រែងទប់ស្កាត់បទល្មើសឈើក្រញូង ក៏ដូចជាឈើប្រណិតដទៃទៀត ឲ្យបានខ្លាំងក្លាបំផុត។ទោះជាយ៉ាងណាលោកវេងសុខុនមិនបញ្ជាក់ថាតើហេតុអ្វីបានជាក្រុមលោកនាយឧត្តមសេនីយ៍សៅសុខាបង្កើតដោយអនុក្រឹត្យនោះសំងំដេកឈឹងចឹងនោះឡើយ?។
សូមបញ្ជាក់ លេខាធិការដ្ឋានអចិន្ត្រៃយ៍ថ្នាក់ជាតិ បង្ការ ទប់ស្កាត់ និងបង្ក្រាបការកាប់ ការដឹកជញ្ជូន ការប្រមូល ការស្តុកទុក និងការនាំចេញឈើគ្រញូងដែលបង្កើតត្រឹមតែសេចក្តីសម្រេចរបស់ក្រសួងកសិកម្មនេះ មានសមាសភាពមកពីក្រសួងកសិកម្ម រុក្ខាប្រមាញ់ និងនេសាទ ក្រសួងការពារជាតិ ក្រសួងមហាផ្ទៃ ក្រសួងពាណិជ្ជកម្ម ក្រសួងបរិស្ថាន កងរាជអាវុធហត្ថលើផ្ទៃប្រទេស និងអភិបាលរាជធានី ខេត្តផងដែរ។
