ពោធិសាត់: លោក ជា ហ៊ាន ប្រធានអង្គការប្រឆាំងអំពើពុក រលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ ជាមួយក្រុមការងារចំនួនបីនាក់ទៀត ត្រូវបានមន្ត្រីបរិស្ថានខេត្តពោធិសាត់ឃាត់ខ្លួនមួយយប់តាមបញ្ជាចៅហ្វាយខេត្ត កាលពីយប់ថ្ងៃទី០៤ ខែមករា ឆ្នាំ២០១៩ នៅក្បែព្រំប្រទល់ខេត្តកំពង់ស្ពឺ ខណៈកំពុងធ្វើដំណើរល្បាតអង្គេតមើលបទល្មើសព្រៃឈើក្នុងដែនជម្រកសត្វព្រៃភ្នំឱរ៉ាល់តំបន់ពោធិសាត់ ក្នុងស្រុកវាលវែង ។
ក្រោយពីដោះ លែងមកវិញលោក ជា ហ៊ាន បានអោយដឹងថា មុននឹងលោកមុនចុះល្បាតនេះគឺលោកបានជូនលិខិតជម្រាបតំណឹងមួយច្បាប់មុនទៅក្រសួងបរិស្ថានរួចរាល់ហើយ ទើបចុះធ្វើការងារនេះបន្ទាប់ពីដឹងថា បទល្មើសកាប់ អារ និងដឹកជញ្ជូនឈើកំពុងកើតឡើងពេញបន្ទុកជាច្រើនទីតាំងនៅទីនោះ តែពេលដែលលោកធ្វើដំណើរទៅដល់ក្នុងដែន ជម្រកសត្វព្រៃភ្នំឱរ៉ាល់តំបន់ពោធិសាត់ក៏កំលាំងមន្ត្រីបរិស្ថានស្នាក់ការរងទី២ នៃដែនជម្រក សត្វព្រៃភ្នំឱរ៉ាល់តំបន់ពោធិសាត់ មកឃាត់ខ្លួននឹងដកទូរសព្ទលោកទុកមួយយប់ដោយបង្អត់ បាយធ្វើអោយលោកហួសចិត្តនឹងទង្វើរបស់លោក ប្រាក់ អ៊ីឡេង ប្រធានស្នាក់ការ ដែលគេដឹងថា ជាបក្សពួកដៃជើងរបស់លោក ប៊ុន ឌី ជាឈ្មួញធំកាប់នឹងអារឈើពីក្នុងដែនអភិរក្សនិងជាអ្នកកាងច្រកអូរត្រាវសម្រាប់ដឹកនឹងប្រមូលទិញឈើចូលមកស្រុកឱរ៉ាល់ ខេត្តកំពង់ស្ពឺ ។
លោក ជា ហ៊ាន បន្តទៀតថា ការចាប់ឃាត់ខ្លួនលោកនិងក្រុមការងារអង្គការនេះជាអំពើខុសច្បាប់ដែលមិនអាចអនុគ្រោះបានទេ ហើយលោកនឹងធ្វើពាក្យបណ្ដឹងទៅសមត្ថកិច្ចអោយចាត់វិធានការទៅតាមនីតិវិធីទៅលើបក្សពួកបំផ្លាញព្រៃឈើល្មើសច្បាប់ទាំងនោះ។
ទាក់ទងនឹងការលើកឡើងនេះដែរមន្ត្រីបរិស្ថានប្រចាំការនៅស្នាក់ការរងទី២ក្នុងដែនជម្រកសត្វព្រៃភ្នំឱរ៉ាល់តំបន់ពោធិសាត់បានអោយដឹងថា កម្លាំងបរិស្ថានឃាត់តាមការបញ្ជារបស់តាធំខេត្តពោធិសាត់(ចៅហ្វាយខេត្ត) កម្លាំងបរិស្ថានដឹងហើយថា អង្គការលោក ជា ហ៊ាន ចុះMOUជាមួយក្រសួងបរិស្ថាន នឹងមានលិខិតស្នាម តែតាធំខេត្តថា ខ្លួនមិនបានឃើញលិខិត សម្រាប់មន្ត្រីបរិស្ថានតូចតាចមិនហ៊ានទេ តែនេះជាបញ្ជាតាធំ(ម៉ៅ ធុនិន)។
ចំណែកឈ្មួញឈើលោក ណុប ឌី ដែលកំពុងរកស៊ីកាប់បំផ្លាញព្រៃឈើក្នុងដែនជម្រកសត្វព្រៃភ្នំឱរ៉ាល់តំបន់ពោធិសាត់យើងមិនទាន់អាចសុំការបញ្ជាក់បាននៅឡើយទេ ដោយទូរសព្ទលោកកាលពីវេលាម៉ោង១៤ ថ្ងៃទី០៥ ខែមករា ឆ្នាំ២០១៩ ខលមិនចូលជាច្រើនដង៕
