កំពង់ឆ្នាំង ៖ ប្រភពពីមន្ត្រីរាជការ នៅក្នុងសាលាស្រុកកំពង់ត្រឡាចដែលមិនសប្បាយចិត្ត បានទម្លាយអោយដឹងថា៖ ថ្មីៗនេះ ដីផ្នែកខាងក្រោយជាប់អាគារសាលាស្រុកកំពង់ត្រឡាចដែលមានប្លង់រឹងនិងជាដីស្ថិនៅក្នុងបញ្ជីរទ្រព្យរដ្ឋ មានទំហំ៣ហិចតា ក្រៅពីដីផ្នែកសឹករងស្រុក នៅក្នុងផ្ទៃដីសរុបជិត ៨ ហិកតារបស់សាលាស្រុកកំពង់ត្រឡាចត្រូវបានមន្ត្រីទន្សោងគោ ព្រៃ នៅក្នុងសាលាស្រុក និងនៅក្នុងរដ្ឋបាលខេត្តកំពង់ឆ្នាំង ឃុបឃិតគ្នាពុះជាឡូត៍លក់ធ្វើព្រងើយ។
ដើមហេតុគឺពួកគេបានសុំសម្តេចក្រឡាហោម ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សុំកាត់ដីផ្នែកខាងក្រោយនោះ២ ហិកតា ដើម្បីធ្វើទីតាំងផ្នែកសឹករងស្រុកកំពង់ត្រឡាច ។ ប៉ុន្តែធាតុពិតគឺគេបានឃុបឃិតគ្នាកាត់ដីចេញពីប្លង់សាលាស្រុកកំពង់ត្រឡាចរហូតដល់ទៅចំនួន៥ហិកតា គឺ២ហិកតាធ្វើជាទីតាំងយោធាស្រុក និង៣ហិកតាទៀតទុកពុះជាឡូត៍លក់ចែកលុយគ្នា ។
ដីមានចំនួនប្រមាណ៣ហិកតាដែលលួចកាត់លើសសំណើរ បានលក់ទៅឲ្យក្រុមហ៊ុនឯកជនពុះធ្វើជាដីឡូត៍មកដល់ថ្ងៃនេះក្នុងមួយឡូៗ ទំហំ 5m×22m មានតំលៃចាប់ពី 5000$ ទៅ7000$, គឺបានធ្វើឯកសារជូនអ្នកទិញ មានត្រឹមតែចុះហត្ថលេខាពីលោកមេភូមិដើមពពេល មេឃុំថ្មឥដ្ឋ និងអភិបាលស្រុកតែប៉ុណ្ណោះ។
នៅក្នុងរឿងនេះ លោក ឈឹម វុទ្ធា អភិបាលស្រុកកំពង់ត្រឡាច បានឆ្លើយតាមទូរសព្ទ័យ៉ាងខ្លីប្រាប់ក្រុមអ្នកកាសែតថា៖ បើចង់ដឹងច្បាប់ទៅសួរ លោក ធន ធឿន ទៅ លោកមិនដឹងទេ….!!? ។ ចំណែកលោកឧត្តមសេនីយ៍ ទោ ធន ធឿន មេបញ្ជាការតំបន់ប្រតិបត្តិការសឹករងកំពង់ឆ្នាំង វិញបានបញ្ជាក់ប្រាប់ថា៖ ពិតជាមានការស្នើសុំទៅក្រសួងមហាផ្ទៃពិតមែន ហើយក្រសួងមហាផ្ទៃក៍បានអនុញ្ញាតឲ្យដីរបស់សាលាស្រុកកំពង់ត្រឡាចចំនួន២ ហិកតា មកធ្វើជាមូលដ្ឋានតំបន់ប្រតិបត្តិការផ្នែកសឹករងកំពង់ត្រឡាច ។ ដោយពេលនេគឺបានធ្វើរបងព័ទ្ធជុំវិញនឹងបានសង់អគាររួចរាល់ហើយដែរ។ ចំពោះរឿងដីផ្សេងទៀត លោកមិនបានដឹងនោះទេពីព្រោះមិនមែនជាការងាររបស់លោក។
ដោយឡែកលោក ឈួរ ច័ន្ទឌឿន អភិបាលខេត្តកំពង់ឆ្នាំង បានបញ្ជាក់ប្រាប់ក្រុមអ្នកកាសែត កាលពីម៉ោង២ រសៀលថ្ងៃទី២៥ធ្នូឆ្នាំ២០១៨កន្លងមកថា៖ សូមទៅពិនិត្យមើលបញ្ជីគ្រប់គ្រង់អចលនទ្រព្យ បច្ចុប្បន្នភាពនិងទៅបានត្រូវ ថាតើដីសាលាស្រុកកំពង់ត្រឡាចមានប៉ុន្មានហិកតា និងតំបន់ប្រតិបត្តការសឹករងកំពង់ត្រឡាច មានប៉ុន្មានហិចតាបូកសរុបទៅដឹងហើយ។ បើមើលតាមប្លង់ពីមុនក្រែងវាខុស ពីព្រោះឥឡូវយើងមិនត្រូវនិយាយរឿងដីសាលាស្រុកពីមុនមានប៉ុន្នាទៀតទេ?!(ស៊ិក)។ សំខាន់បច្ចុប្បន្នភាពឃើញប៉ុណ្ណា គឺប៉ុណ្ណឹង ហើយ ។លោកអភិបាលខេត្តមានប្រសាសន៍ថាលោកក៍មិនដឹងថាដីសាលាស្រុកនោះពីមុនមានទំហំប៉ុណ្ណាដែរ? ។
ទាក់ទិននឹងការបំភ្លឺរបស់អាជ្ញាធរនិងមន្ត្រីពាក់ព័ន្ធខាងលើនេះ ត្រូវបានប្រជាពលរដ្ឋរិះគន់និងដាក់ការសង្ស័ថា៖ បើពួកមន្ត្រីពាក់ព័ន្ធខាងលើនេះមិនលួចកេងបន្លំបំភ័នភ្នែកថ្នាក់លើ តើពួកគេបានដីពីណានៅខាងក្រោយសាលាស្រុកនេះមកពុះជាឡូត៍លក់? ។
បើចង់មានតម្លាភាពនោះ សូមអោយអាជ្ញាធរនិងមន្ត្រីពាក់ព័ន្ធយកឯកសារកាត់ដីទាំងអស់នោះមកបិតបង្ហាញប្រជាពលរដ្ឋជាសារណៈនៅសាលាស្រុកកំពង់ត្រឡាចទៅ នោះប្រជាពលរដ្ឋគាត់អស់សង្ស័យហើយ ។ បើមិនបានធ្វើតាមសំណូមពរខាងលើនេះទេ គឺពួកអស់លោកពិតជាឃុបឃិតគ្នាជាលក្ខណៈប្រពន្ធ័លួចដីរដ្ឋលក់ដូចដែលប្រជាពលរដ្ឋរិះគន់និងដាក់ការសង្ស័យនោះពិតប្រាដកហើយ ។
រឿងនេះប្រជាពលរដ្ឋសូមសំណូមពស្នើសុំសម្តេចតេជោនាយករដ្ឋមន្ត្រី សម្តេចក្រឡាហោម និងអង្គភាពប្រឆាំងអំពើពុករលួយ គួរបញ្ជូនអធិការរកិច្ចមកស្រាវជ្រាវ និងប្រកាសអោយប្រជាពលរដ្ឋបានដឹងផង ថាតើត្រូវចាត់ការមន្ត្រីស្អុយរលួយទាំងនោះបែបណា ដើម្បីរក្សាកិត្យនុកូលភាពនៃច្បាប់របស់ជាតិយើងអោយមានសុក្រិត្យភាព? ៕