ខេត្តកំពង់ឆ្នាំង ៖ពលរដ្ឋរស់នៅឃុំឆ្នុកទ្រូរិះគន់អាជ្ញាធរនិងឈ្មួញថាធ្វើចារឹកកន្ទេលធំបន្លំដេកដោយបណ្តយឲ្យ ក្រុមឈ្មួញជីកអណ្តូងយកទឹកលក់អោយប្រជាពលរដ្ឋ ដែលធ្វើបម្លាស់ទីពីក្នុងទឹកឡើងមករស់នៅលើគោកបន្លំលួចដី។
ប្រជាពលរដ្ឋប្រាប់ថា៖ឈ្មួញបាន ស្នើរសុំទៅអាជ្ញាធរស្រុកឈូសដីព្រៃលិចទឹកនៅក្នុងតំបន់៣ សម្រាប់ជីកអណ្តូងទំហំ២០ម៉ែត្របួនជ្រុងតែប៉ុណ្ណោះប៉ុន្តែនៅពេលនេះត្រូវបានគេមើលឃើញថា បានឈូសឆាយយកដីទំហំរហូតដល់ទៅរាប់ហិកតាហើយ។
ប្រជាពលរដ្ឋបានអោយដឹងថា ដីដែលឈ្មួញកំពុងធ្វើសកម្មភាពឈូសឆាយដោយគ្រឿងចក្រនេះ ជាដីព្រៃលិចទឹកស្ថិតក្នុងតំបន់៣ ក្នុងឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង។ ព្រឹកម៉ោង.៨.៤៩នាទីលោកឃួន សៅរុំ អភិបាលស្រុកបរិបូរណ៍ បានបញ្ជាក់ប្រាប់(សម្លេងអច្ឆរិយៈ)ដឹងថា ការឈូសឆាយនេះមិនមានច្បាប់ទេ តែក្រុុមការងារបម្លាស់ទីផ្ទះបណ្តែតទឹកបានឯកភាពអោយឈូសឆាយដីព្រៃលិចទឹកតែ២០ម៉ែត្របួនជ្រុងប៉ុណ្ណោះ ដើម្បីជីកអណ្តូងយកទឹកអោយប្រជាពលរដ្ឋប្រើប្រាស់ តែបើគេឈូសឆាយដីព្រៃលិចទឹកលើសចាំលោកត្រឡប់មកពីភ្នំពេញវិញ លោកនឹងចុះទៅពិនិត្យមើល។
ប្រជាពលរដ្ឋបានអោយដឹងថា គេជីកអណ្តូងនេះមិនមែនយកទឹកមកចែកព្រីអោយប្រជាពលរដ្ឋប្រើប្រាស់ទេ គឺលក់ពេញថ្លៃ ហើយនៅពេលនេះគេកំពុងប្រើគ្រឿងចក្រឈូសឆាយដីព្រៃលិចទឹកដែលជាជម្រកត្រីពងកូននៅរដូវវស្សាកាន់តែធំរហូតដល់ទៅរាប់ហិកតាដោយមិនមានការទប់ស្កាត់ឡើយ។
ហើយអ្នកដែលកំពុងតែឈូសឆាយព្រៃលិចទឹកល្មើសច្បាប់នេះគឺជាខ្សែរស្រឡាយលោកមេឃុំឆ្នុកទ្រូ សូមលោកអភិបាលខេត្តជួយមានវិធានការផង បើសិនជាមិនមានវិធានការអោយបានទាន់ពេលទេ ព្រៃលិចទឹកនៅក្នុងតំបន់នោះនឹងរលាយអស់ជាមិនខាន ដោយសារក្រុមកន្ទេលធំបន្លំដេក ។
