ខេត្តឧត្តរមានជ័យៈ ប្រជាពលរដ្ឋ មានការសារទរជាខ្លាំង ចំពោះការប្ដេជ្ញាចិត្ត របស់នាយឧត្ដមសេនីយ៍ គៀត ចន្ទ័ថារិទ្ធក្រោយបានទទួលតំណែងថ្មី ជា អគ្គយក នៃអគ្គនាយកដ្ឋានអន្តោប្រវេសន៍ដែល បានប្ដេជ្ញាយ៉ាងមុតមាំថា នឹង គ្រប់គ្រងការហូរចូល របស់ជនបរទេស មកកម្ពុជា អោយបានត្រឹមត្រូវដូចច្បាប់ដែលបានកំណត់ ដើម្បីប្រែក្លាយការជឿទុកចិត្ត របស់ថ្នាក់ដឹក នាំទៅជាប្រយោជន៍របស់ប្រទេជាតិទាំងមូល។
ការប្ដេជ្ញា របស់ នាយឧត្ដមសេនីយ៍ គៀត ចន្ទថារិទ្ធ វាជាមោទនភាព និងជាស្នាដៃល្អ របស់ប្រទេសជាតិ ថ្នាក់ដឹកនាំ និងពលរដ្ឋនៅទូទាំងនគរ ។ ប៉ុន្តែទន្ទឹមនឹងការប្តេជ្ញាចិត្តនេះ ប្រជាពលរដ្ឋមានការខកចិត្តជាខ្លាំង ចំពោះ សកម្មភាពគាបសង្កត់ប្រព្រឹត្ត អំពើ ពុករលួយយ៉ាងធ្ងន់ធ្ងរ របៀបធ្វើស្រែលើខ្នងរាស្ដ្រ ពីសំណាក់លោក ឧត្ដមសេនីយ៍ត្រី ខួង ទីន មេប៉ុស្ដិ៍នគបាលអន្តោ ប្រវេសន៍ច្រកអន្តរជាតិអូស្មាច់ ដែលល្បីថាជាប់សាច់ឈាមឧកញ៉ាមហាសេដ្ឋីដ៏ល្បីល្បាយទាំងក្នុងនិងក្រៅប្រទេស និងលោកវរៈសេនីយ៍ឯក ជា ព្រឿង។
ពួកគេ បាននិងកំពុងប្រើប្រាស់ស្ថាបន័អន្តោប្រវេសន៍របៀបជិះសេះលែងដៃ មិនខ្វល់ធ្វើដឹង ធ្វើឮ ពីការប្តេជ្ញាចិត្ត របស់លោកនាយឧត្តម សេនីយ៍ គៀត ចន្ទថារិទ្ធ ឡើយដើម្បី ប្រមូលប្រាក់គ្មានសៀវភៅបន្ទុក របស់ក្រសួងសេដ្ឋកិច្ច និងហិរញ្ញវត្ថុ រាប់សឹបលានរៀលក្នុងមួយខែៗ តាម រយៈការប្រថាប់ត្រាលើសៀវភៅឆ្លងដែន និងពលរដ្ឋ និងអាជីវករបានដឹកទំនិញចេញចូល ដោយមានការដាក់ប៉ុស្ដិ៍ ទារប្រាក់រហូតដល់ទៅបីកន្លែងនៅក្នុងច្រកទ្វាអន្តរជាតិ តែមួយ ខុសពីច្រកទ្វាអន្តរជាតិផ្សេងៗនៅក្នុងប្រទេសកម្ពុជាទាំងមូល ។ ប្រជាពលរដ្ឋរស់នៅក្នុងខេត្តឧត្តរមានជ័យបានលើកឡើងថា ការបោះត្រាលើសៀវភៅឆ្លងដែនមន្ដ្រីប្រចាំនៅច្រកទ្វាអន្តរជាតិអូរស្មាច់តម្រូវអោយបង់ប្រាក់ ក្នុងមួយនាក់មួយម៉ឺនរៀល និងទំនិញតាមរថយន្ដចេញចូលទាមទារ តាមទំហ៊ុំគ្មានដែនកំណត់ ។
តើប្រាក់ទាំងអស់ដែលលោកឧត្ដមសេនីយ៍ត្រី ខួង ទីន មេប៉ុស្ដិ៍នគបាលអន្តោប្រវេសន៍ និងលោកវរៈសេនីយ៍ឯកជា ព្រឿង រងប៉ុស្ដិ៍ ប្រមូលប្រាក់ទាំងនោះយកទៅណា បើគ្មានបង្កាន់ដៃនិងគល់បញ្ជីរបស់ក្រសួងសេដ្ឋកិច្ច និងហិរញ្ញវត្ថុផងហ្នឹង?។ ជុំវិញករណីខាងលើនេះ តើលោកនាយឧត្ដមសេនីយ៍ គៀត ចន្ទថារិទ្ធ អគ្គនាយកនៃនាយកដ្ឋាន អន្តោប្រវេសន៍ដែលទើបឡើងថ្មី បានជ្រាប ឬសើមខ្លះដែទេ ? ហើយតើគួរលើកយកមកពិចារណាដែរឺទេ! ឬទុក អោយនគបាលអន្តោរប្រវេសន៍ប្រចាំនៅតាមច្រកទ្វាអន្តរជាតិនៅតាម បន្ទាត់ព្រំដែន អុរស្មាច់ធ្វើស្រែលើខ្នងរាស្ដ្ររហូតទៅ ? ។
ទាក់ទិននឹងសេចក្តីរាយការណ៍របស់ប្រជាពលរដ្ឋ ខាងលើនេះ អង្គភាពយើងខ្ញុំមិនទាន់អាចរកការបំភ្លឺពីលោកឧត្ដមសេនីយ៍ត្រី ខួង ទីន មេប៉ុស្ត៍អន្តោប្រវេសន៍ច្រកអន្តរជាតិអូរស្មាច់ និងលោក ជា ព្រឿង បានទេ ព្រោះពុំមានលេខទូរស័ព្ទ ។ ការិយាល័យនិពន្ធយើងរីករាយ នឹងរង់ចាំ ទទួលបំភ្លឺការបកស្រាយរបស់លោកគ្រប់ពេល ៕
