សៀមរាប៖ព្រឹកមិញថ្ងៃទី១មករានៅព្រលានយន្តហោះខេត្តសៀមរាបមានករណីយ៍បុរសជនជាតិខ្មែរម្នាក់បានស្លាប់ភ្លាមៗ ដោយសាពីធ្លាក់ចេញពីគម្របកង់យន្តហោះពេលដែលហោះចេញពីព្រលានអន្តរជាតិខេត្តសៀមរាបនៅម៉ោង១០និង២០នាទីពេលយន្តហោះ ហោះឡើងកម្ពស់ប្រហែល៣០ម៉ែត្រ ។
លោក ភឹង ចិន្តាវេទ ស្នងការរងនគរបាលខេត្តសៀមរាបទទួលបន្ទុកផែនព្រហ្មទណ្ឌ បានប្រាប់ឲ្យកាសែតដឹងថា ជនរងគ្រោះគឺជាមនុស្សវិកលចរិក។ តាមរូបភាពពីកាមេរ៉ាសុវត្តថិភាព បុរសជនជាតិខ្មែរដែលស្លាប់នោះមានកម្ពស់១,៦៨ម៉ែត្រ បានលួចហែករបងព្រលានយន្តហោះខេត្តសៀមរាបចូលទៅនៅម៉ោង៥និង០៣នាទីព្រឹកថ្ងៃទី៣១ធ្នូ។ បន្ទាប់មកបានដើរទៅរកយន្តហោះមួយគ្រឿងប្រភេទ ស្កាយនិង បន្តដើរទៅរក ប្រភេទ JC និងទៅកាន់យន្តហោះកើតហេតុប្រភេទ ឡានម៉ី។
លោក ភឹង ចិន្តាវេទនិយាយថាជនរងគ្រោះរូបនោះទំនងចូលដេកក្នុងគម្របកង់យន្តហោះ។ ពេលយន្តហោះ ហោះឡើងកម្ពស់ប្រហែល៣០ម៉ែត្រ ស្រាប់តែឃើញមានមនុស្សម្នាក់ធ្លាក់ពីកង់យន្តហោះផ្នែកខាងក្រោយតែម្តង។យ៉ាងណាក៏ដោយយន្តហោះនោះ មិនបានចុះចតឡើយ គឺបន្តហោះទៅតាមគោលបន្តទៀត។
សាក្សីឈ្មោះ លឿម រុំ ភេទប្រុស បានអោយដឹងថា នៅវេលាម៉ោងប្រហែល១០និង២០នាទីថ្ងៃទី៣១ ពេលខ្លួនកំពុងធ្វេីការក៏បានឃើញយន្តហោះដែលកំពុងតែហោះហើរ មានកំពស់ប្រហែល៣០ម៉ែត្រ ស្រាប់តែឃើញមានមនុស្សម្នាក់ធ្លាក់ពីកង់យន្តហោះ ដែលមានចំងាយពីខ្លួនប្រហែល២០០ម៉ែត្រ ហើយយន្តហោះនោះក៏ហោះហើរបាត់ទៅ ។
តាមការពនិត្យរបស់ជំនាញបច្ចេកទេស សាកសពស្លាប់មានសភាព បាក់ដៃជើងរយះភ្លៅ ។ សាកសពមិនទាន់កំណត់អត្តសញ្ញាណបាននោះទេ សមត្តកិច្ចកំពុងបន្តស្វែងរកសាច់ញាតិ។ សាកសពជនរងគ្រោះដែលមិនទាន់ដឹងអត្តសញ្ញាណត្រូវបានគេដឹកចេញភ្លាមៗយកទៅតម្កល់ទុកនៅក្នុងមន្ទីរពេទ្យបង្អែកខេត្តសៀមរាប ដែលមិនទាន់ស្គាល់អត្តសញ្ញាណនៅឡើយ ។
ករណីមួយនេះបង្ហាញច្បាស់អំពីចំណុចខ្សោយនៃក្រុមការពារសន្តិសុខនៅព្រលានយន្តហោះខេត្តសៀមរាប។សំណាងហើយជនរងគ្រោះគ្រាន់តែចូលទៅពួនប្រុងលួចចេញទៅបរទេសចុះបើជាភេរវករវិញគិតល្ម៉េចទៅ?៕
