ក្រចេះ៖ កាលពីថ្ងៃទី០១ ខែមករា ឆ្នាំ២០១៨ កម្លាំងសមត្ថកិច្ចនៃអធិការរដ្ឋាននគរបាលស្រុកចិត្របុរី ឃាត់ខ្លួនជនសង្ស័យម្នាក់ជាប្តី ក្រោយពីបង្កហិង្សាក្នុងគ្រួសារ រហូតបណ្តាលឲ្យស្ត្រីជាប្រពន្ធដេកស្លាប់នៅលើផ្ទះ។
សមត្ថកិច្ច បានឲ្យដឹងថា ជនសង្ស័យមានឈ្មោះ ស៊ន ឡា ត្រូវជាប្ដី អាយុ៥២ឆ្នាំ ជាតិខ្មែរ រីឯស្ត្រីរងគ្រោះមានឈ្មោះ សុខ ឌឿ ត្រូវជាប្រពន្ធ អាយុ៤៩ឆ្នាំ ជាតិខ្មែរ រស់នៅចំណុចច្រប់ ភូមិវាលសំបូរ ឃុំថ្មី ស្រុកចិត្របុរី ខេត្តក្រចេះ ។
សមត្ថកិច្ច បន្តថា អ្នកទាំងពីរជាកសិកររស់នៅភូមិ ឃុំ កើតហេតុខាងលើ ។ កាលពីវេលាម៉ោង ២០ និង០០នាទី ថ្ងៃ៣០ ខែធ្នូ ឆ្នាំ២០១៨ ឈ្មោះ ស៊ន ឡា បានវាយប្រពន្ធចំនួនពីរដៃ ចំកញ្ចឹងករ ដួលផ្កាប់មុខទៅលើថ្មចង្ក្រានបាយ បណ្ដាលអោយបែកមាត់ បាក់ធ្មេញ និងរយះថ្ងាស់របួសធ្ងន់ធ្ងរ រួចបុរសជាប្តីក៏បានលើកប្រពន្ធយកទៅដាក់កន្លែងដេក។ លុះដល់ម៉ោង ០១និង០០នាទី ឈានចូលថ្ងៃទី៣១ ខែធ្នូ ឈ្មោះ សុខ ឌឿ (ស្ត្រីរងគ្រោះ) បានដេកស្លាប់នៅលើផ្ទះតែម្ដង ។ សពស្ត្រីរងគ្រោះ ត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ។
ចំណែកជនសង្ស័យ (ស៊ន ឡា) សមត្ថកិច្ចកំពុងឃាត់ខ្លួនជាបណ្ដោះអាសន្ននៅអធិការរដ្ឋាននគរបាលស្រុកចិត្របុរី ដើម្បីកសាងសំនុំរឿងបញ្ជូនទៅការិយាល័យកណ្ដាលនគរបាលព្រហ្មទណ្ឌនៃស្នងការដ្ឋាននគរបាលខេត្តក្រចេះចាត់ការបន្ត៕ ដោយ កិះខន