ភ្នំពេញ ៖ ថ្មីៗលេចធ្លាយបំរាមមួយរបស់ក្រសួងទេសចរណ៍ដែលហាមមានការ ហៅមុខម្ហូបមួយឈ្មោះ “ព្រះផ្លោះជញ្ជាំងស៊ុប“។
ក្នុងសរាចរមួយចុះថ្ងៃទី១៦ ខែកញ្ញា ឆ្នាំ២០១៨ក្រសួងទេសចរណ៍ បានឲ្យដឹងថា កន្លងមក សង្កេតឃើញថាមានអាជីវកម្ម ភោជនីយដ្ឋាន អាហារដ្ឋានមួយចំនួន បានប្រើប្រាស់បញ្ជីមុខម្ហូបឈ្មោះ ព្រះផ្លោះជញ្ជាំងស៊ុប ។
ក្រសួងទេសចរណ៍ សូមអំពាវនាវដល់ម្ចាស់អាជីវកម្មទាំងអស់ បញ្ឈប់ការប្រើប្រាស់ឈ្មោះនេះជាបន្ទាន់។មិនមែនតែម្ហូបមួយមុខនេះទេគឺមិនត្រូវប្រើប្រាស់នូវឈ្មោះមុខម្ហូបទាំងឡាយណា ដែលដែលនាំឱ្យប៉ះពាល់ដល់សាសនា ក៏ដូចជាប៉ះបាល់ដល់សីលធម៌ក្នុងសង្គមកម្ពុជាផង។
ក្រសួងទេសចរណ៍មិនបានពន្យល់ថាម្ហូបឈ្មោះ“ព្រះផ្លោះជញ្ជាំងស៊ុប“មានធាតុផ្សំស្អីខ្លះនោះទេ។
ក្នុងករណីល្មើសនឹងសារាចរណែនាំនេះ អាជីវកម្មនោះ នឹងទទួលរងនូវការពិន័យតាមប្រកាសរួមស្ដីពី ការពិន័យអន្តរការណ៍ជាប្រាក់ ចំពោះអ្នកប្រព្រឹត្តល្មើសនឹងច្បាប់ និងលិខិតបទដ្ឋានគតិយុត្តស្ដីពីទេសចរណ៍៕
