សេចក្តីរាយការណ៍ពីប្រជាពលរដ្ឋ បានអោយដឹងថាបទល្មើសព្រៃឈើ និង សិប្បកម្មកែច្នៃឈើ ក្នុងតំបន់បំណក់ ឃុំឈើតុំស្រុកក្រគរ ខេត្តពោធិសាត់ កើតមានយ៉ាងគគ្រឹកគគ្រេង គ្មានជំនាញរដ្ឋបាលព្រៃឈើ និង សមត្ថកិច្ចពាក់ព័ន្ធណាមួយបង្ក្រាបអោយមានប្រសិទ្ធភាពឡើយ ។ មន្ត្រីបរិស្ថានដែនជំរកសត្វព្រៃឱរ៉ាល់ ដែលមានស្នាក់ការនៅភ្នំយ៉ោក ក្នុងឃុំឈើតុំ ស្រុកក្រគរខេត្តពោធិសាត់ បានបើកដៃអោយក្រុមឈ្មួញយករណាយន្តចូលកាប់ឈើ និងអារឈើនៅក្នុងដែនជំរកលាន់លឺទ្រហឹងអឺងកងពេញព្រៃ និងក្រុមឈ្មួញកាប់អារឈើប្រណិតដឹកតាមគោយន្តកន្រ្តៃ ម៉ូតូ រទេះគោ និងរទេះក្របី ចូលមកលក់នៅក្នុងតំបន់បំណក់ និងមួយចំនួនទៀត ដឹកចូលមកកែច្នៃនៅក្នុងសិប្បកម្មអត់ច្បាប់ ចំនួនប្រមាណ៣៧កន្លែង ដោយថ្នូរនិងទឹកប្រាក់ធ្វើដេកលក់បិទភ្នែកមើលមិនឃើញ ។
លើសពីនេះទៅទៀតនោះ មន្ត្រីសង្កាត់រដ្ឋបាលព្រៃឈើ នៅតំបន់បំណក់ ក្នុងឃុំឈើតុំ ក៍កំពុងតែត្រូវប៉ាន់ សើមមាត់ សើមក ដោយសារតែបើកដៃ ស៊ីញ៉ូភ្លើង អោយឈ្មួញរកស៊ីឈើប្រណិតឈ្មោះ ម៉ៅ មានទីលំនៅ ក្នុងស្រុកក្រគរ ខេត្តពោធិសាត់ ទិញផ្តាច់មុខនៅតំបន់ខាងលើនេះ ឈ្មួញឈើរូបនេះប្រមូលទិញឈើប្រណិតបានច្រើនដឹកតាមរថយន្តនីសាន់ ឬរថយន្តស៊េរីទំនើបដូចជា រថយន្តកាមរីពណ៌សំបកឳឡឹក បាឡែនពណ៌ខ្មៅ ឡិស៊ីស RX300 ពណ៌ស្ក ដោយដឹកចេញពីឃុំឈើតុំ ឡើងផ្លូវជាតើលេខ៥ ចំណុចផ្សារក្រគរ ក្បែរស្នាក់ការផ្នែករដ្ឋបាលព្រៃឈើក្រគរ ឆ្ពោះទៅកាន់រាជធានីភ្នំពេញ ឬព្រំប្រទល់វៀតណាម ដោយឆ្លងកាត់ទឹកដីខេត្តកំពង់ឆ្នាំង ។
ប្រភពបានបន្តអោយដឹងថា ឈ្មោះម៉ៅ បានទិញរថយន្តបាឡែនមួយគ្រឿងពណ៌ទឹកប្រាក់ អោយ លោក សុខ ពិសិទ្ធ ជិះដើម្បីជាថ្នូរនិងការមិនបង្រ្កាប ព្រមទាំងអោយឈ្មោះ សុខ ពិសិទ្ធនេះនៅពីក្រោយខ្នងក្នុងការចរាចរណ៍ឈើប្រណិតជាប្រចាំនិងការពារមិន អោយមានឈ្មួញឈើណាផ្សេងទិញឈើប្រណិត ដែលប្រជាពលរដ្ឋកាប់ពីក្នុងព្រៃក្រៅពីឈ្មោះម៉ៅនេះឡើយ មិនតែប៉ុណ្ណោះ ឈ្មោះ សុខ ពិសិទ្ធ នេះបានកាង និងការពារមិនអោយមានឈើប្រណិត ចេញពីតំបន់បំណក់ទៅខាងពេជ្រជោ ឬតំបន់ក្តុល ដែលជាទឹកដីខេត្តកំពង់ឆ្នាំង នោះដែរ បើសិនជាជាអ្នកណាហ៊ានដឹកឈើប្រណិតចេញ ទៅខាងទឹកដី ខេត្តកំពង់ឆ្នាំង ឈ្មោះ សុខ ពិសិទ្ធនេះ និងចាប់ ហើយបើដឹកទៅទឹកដីស្រុកក្រគរ គឺគេមិនចាប់ឡើយគ្រាន់តែប្រមូលលុយដាក់ហោប៉ៅ តែប៉ុណ្ណោះ ហើយក្នុងមួយយប់ៗឈ្មួញរកស៊ីឈើ បានដឹកចេញបន្តគ្នាដូចហែរកឋិន មិនមានសមត្ថកិច្ចជំនាញ ឬសមត្ថកិច្ចពាក់ព័ន្ធដូចជា ប៉ូលីសប៉ុស្តិ៍ ប៉េអឹម បរិស្ថាន បង្ក្រាបបានមួយករណីណាឡើយ ។
ពាក់ព័ន្ធនិងករណី លោក សុខ ពិសិទ្ធ នាយសង្កាត់រដ្ឋបាលព្រៃឈើបំណក់ បានប្រាប់អោយដឹងថាចំពោះរថយន្តបាឡែន ពណ៌ទឹកប្រាក់ដែលល្បីថា ឈ្មោះ ម៉ៅ ទិញអោយនោះ គឺមិនពិតទេ តាមពិតរថយន្តបាឡែននេះ គឺគាត់បានដូរ រថយន្តរ៉េវហ្វ័ររបស់គាត់ជាមួយប្អូនថែម ជាមួយប្អូន ហើយរថយន្តនេះ គាត់ក៍បានលក់ទៅអោយឈ្មោះ បារាំង បាត់ទៅហើយ ហើយគាត់បានជិះរថយន្តម៉ាកបាឡែនពណ៌ខ្មៅវិញម្តង ។
បើយោងតាមប្រភពពត៌មានពីអ្នករកស៊ីដឹកឈើតាមរទេះគោ-ក្របីនៅតំបន់នោះបានអោច ដឹងថា ពួកគាត់អាចធ្វើសកម្មភាពដឹកជញ្ជូនឈើ បានយ៉ាងរលូនបែបនេះ ព្រោះពួកគាត់បានរត់ការបង់លុយអោយនាយសង្កាត់រដ្ឋបាលព្រៃឈើបំណក់ គឺ លោក សិទ្ធ ក្នុងមួយរទេះពី១០ម៉ឺន ទៅ១៥ម៉ឺនរៀល រីឯសិប្បកម្មទាំងអស់ក្នុងតំបន់បំណក់ក៍បានបង់ខែ អោយនាយសង្កាត់រដ្ឋបាលព្រៃឈើខាងលើនេះផងដែរ ។
ប្រជាពលរដ្ឋរស់នៅតំបន់នោះ បានរិះគន់ថា លោក សុខ ពិសិទ្ធមិនមានវិធានការបង្ក្រាប និងទប់ស្កាត់បទល្មើសព្រៃឈើកើតឡើងក្នុងដែន សមត្ថកិច្ចរបស់ខ្លួនគ្រប់គ្រងអោយស្របតាមបទបញ្ជា និងអនុសាសន៍ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឡើយ ៕
