ភ្នំពេញ៖កាលពីយប់ថ្ងៃសៅរ៍ទី២២ធ្នូលោកសម រង្ស៊ី ប្រធានស្តីទីអតីតគណបក្សសង្គ្រោះជាតិ បានចេញមុខតាមហ្វេសប៊ុកអំពាវនាវសុំឲ្យអ្នកគាំទ្ររបស់ខ្លួលចូលរូមការពារជំហរសម រង្ស៊ី និងកឹម សុខា ឲ្យរឹងមាំដាច់ខាតកុំឲ្យគេប៉ះពាល់បានក្នុងពេលដែលគណបក្សកាន់អំណាចអះអាងថា “សម រង្ស៊ី និងកឹម សុខា ជាមនុស្សតែមួយ”នេះ គឺគ្រាន់តែជាពាក្យស្លោកប៉ុណ្ណោះដែលតាមការពិតបានបែកបាក់គ្នាទៅហើយ។
លោកសម រង្ស៊ី បានអំពាវនាវយ៉ាងដូច្នេះ ក្រោយពីលោកបានអះអាងថា លោកនាយករដ្ឋមន្ត្រី ហ៊ុន សែន កំពុងតែខិតខំបំបែករូបលោកពីលោកកឹម សុខា ហើយថា នៅពេលនេះ គណបក្សប្រជាជនកម្ពុជាកំពុងតែវាយប្រហារយ៉ាងខ្លាំងមកលើជំហរ និងពាក្យស្លោក“សម រង្ស៊ី និង កឹម សុខា ជាមនុស្សតែមួយ”ទៀត។
ប៉ុន្តែសម្រាប់គណបក្សប្រជាជនកម្ពុជាវិញ លោកសុខ ឥសាន ដែលជាអ្នកនាំពាក្យបានបរិហារថា ទំនាក់ទំនងរវាងលោកសម រង្សីនិងលោកកឹម សុខា បានឈានមកដល់ផ្លូវបំបែកហើយ។ ការលើករបស់លោកសុខ ឥសានគឺផ្អែកទៅតាមការអះអាងរបស់លោកគង់ គាំ ដែលជាទីប្រឹក្សាជាន់ខ្ពស់អតីតគណបក្សសង្គ្រោះជាតិ និងធ្លាប់ជាមនុស្សជំនិតរបស់លោកសម រង្ស៊ីផងដែរ។
លោកថាទំនាក់ទំនងរវាងលោកសម រង្ស៊ី និងលោកកឹម សុខា ប្រៀបដូចទឹកនិងប្រេងអ៊ីចឹង ហើយថាបើទោះបីលោកសម រង្សី នៅតែព្យាយាមនិយាយដដែលៗថា “សម រង្សីនិងកឹម សុខាជាមនុស្សតែមួយ”ក៏ដោយ ក៏ការពិតនៅតែបែងចែកគ្នាដដែល។
តាមរយៈបណ្ដាញទំនាក់ទំនង សង្គមតេឡេក្រាម នៅថ្ងៃទី២៣ខែធ្នូ ឆ្នាំ ២០១៨នេះលោក សុខ ឥសាន បានបកស្រាយមូលហេតុដែល សម រង្ស៊ីខិតខំការពារពាក្យស្លោកសម រង្សីនិងកឹម សុខាជាមនុស្សតែមួយថា តាមការជាក់ស្តែង បុគ្គលសម រង្ស៊ីនិង កឹម សុខា គឺជាមនុស្សពីរនាក់ ដាច់ដោយឡែកពីគ្នា។បើចង់ឲ្យមនុស្សទាំងពីរនាក់នេះ ក្លាយទៅជាមនុស្សមួយ លុះត្រាតែយកទាំងពីរនាក់នេះ ទៅដាក់ម៉ាស៊ីនក្រឡុកស៊ីម៉ង់តិ៍កិន ឲ្យល្អិតម៉ត់ចូលគ្នា ទើបបានទៅជាមនុស្សតែមួយបាន ។
មូលហេតុដែលទណ្ឌិតសម រង្ស៊ីចង់បានពាក្យសម រង្ស៊ីនិងកឹមសុខា ជាមនុស្សតែមួយ គឺចង់ផ្សារភ្ជាប់ខ្លួនទៅជាមួយកឹម សុខា ខ្លាចក្រែងកឹម សុខា ត្រូវបានដោះលែងតាមខ្លឹមសារវិសោធនកម្មនៃច្បាប់ស្តីពីគណបក្សនយោបាយ ដែលនឹងឈានមកដល់នាពេលឆាប់ៗខាងមុខនេះពីព្រោះខ្លួនឯងមិនមានឈ្មោះនៅក្នុងបញ្ជី១១៨នាក់ទេ។
តាមរយៈទំព័រហ្វេសប៊ុកកាលពីយប់ថ្ងៃសៅរ៍ដដែល លោកសម រង្ស៊ី បានអះអាងដោយខ្លួនឯងថា លោកកឹម សុខា ទំនងត្រូវលោកនាយករដ្ឋមន្ត្រីហ៊ុន សែន បង្ខំចិត្តដោះលែងក្នុងពេលឆាប់ៗខាងមុខនេះ ក្រោមសម្ពាធអន្តរជាតិ។ មានការកត់សម្គាល់ថា ទំនាក់ទំនងរវាងលោកសម រង្ស៊ី និងលោកកឹម សុខា ត្រូវបានគេនិយាយព្រោងព្រាត ក្រោយពីលោកសម រង្ស៊ី ត្រូវបានតែងតាំងជាប្រធានស្តីទីអតីតគណបក្សសង្គ្រោះជាតិក្នុងពេលដែលលោកកឹម សុខា និងអ្នកគាំទ្រលោកមិនគាំទ្រ។
ទោះជាយ៉ាងលោកសម រង្ស៊ី ក្នុងនាមជាប្រធានស្តីទីនៅតែធ្វើសកម្មភាពនានា ដើម្បីជំរុញឲ្យមានដំណោះស្រាយនយោបាយនៅកម្ពុជាក្នុងនោះ មានការទាមទារឲ្យដោះលែងលោកកឹម សុខាផងដែរ។
