ភ្នំពេញ៖ នៅថ្ងៃទី២០ ខែធ្នូ ឆ្នាំ២០១៨នេះគណបក្សប្រជាជនកម្ពុជា បានបញ្ចប់ សន្និបាត គណៈកម្មាធិការកណ្តាលរបស់ខ្លួនរយៈពេល៣ថ្ងៃ នៅមជ្ឈមណ្ឌលពិព័រណ៍ និងសន្និបាតកោះពេជ្រជាមួយជំហរប្តេជ្ញាមិនឱនក្បាល ចំពោះការដាក់សម្ពាធណាមួយ ពីមជ្ឈដ្ឋានខាងក្រៅឡើយ។
សេចក្តីប្រកាសលទ្ធផលដែលមាន១១ជំណុច បានបញ្ជាក់ ថា « (អង្គសន្និបាត) តម្កល់ខ្ពស់ស្មារតីស្នេហាជាតិដ៏បរិសុទ្ធ ការពារដាច់ខាតនូវឯករាជ្យ អធិបតេយ្យ និងបូរណភាពទឹកដី ប្រឆាំងការជ្រៀតជ្រែករបស់បរទេស ចូលកិច្ចការផ្ទៃក្នុងរបស់កម្ពុជា ការមួលបង្កាច់ភាពត្រឹមត្រូវ របស់នយោបាយ និងសកម្មភាពរបស់កម្ពុជា ដោយមិនឱនក្បាលចំពោះ ការដាក់សម្ពាធណាមួយពីខាងក្រៅ»។
អង្គសន្និបាតបានប្តេជ្ញាការពារ និងពង្រឹងដំណើរការប្រជាធិបតេយ្យ ឲ្យចាក់គ្រឹះកាន់តែរឹងមាំនៅកម្ពុជា លើមូលដ្ឋានធានានូវសន្តិភាព និងការអភិវឌ្ឍ និងត្រូវផ្សារភ្ជាប់ជាមួយ ការថែរក្សាអត្តសញ្ញាណជាតិ សេចក្តីថ្លៃថ្នូរ ប្រពៃណី ទំនៀមទម្លាប់ល្អរបស់ជាតិ និងការកសាងសុខដុមរមនា ក្នុងសង្គមកម្ពុជាផងដែរ។
នៅក្នុងសន្និបាតលើកនេះនេះគណបក្សប្រជាជនកម្ពុជាបានបញ្ចូលសមាជិកអចិន្ត្រៃយ៍ថ្មីចំនួន៧រូប ដែលធ្វើឱ្យសមាជិកអចិន្ត្រៃយ៍ដ៏មានអំណាចរបស់ គណបក្សចំណាស់មួយនេះ មានចំនួន៣៧រូប និងមានសមាជិកគណៈកម្មាធិការកណ្តាល ចំនួន៨៦៥រូប។
សមាជិកអចិន្ត្រៃយ៍ឬហៅថាមាជិកការិយាល័យនយោបាយមជ្ឈឹមបក្សចំនួន៧រូប ក្នុងនោះរួមមាន៖ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេសខ្មែរ , លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច , លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងដែនដី , លោក សៅ សុខា អគ្គមេបញ្ជាការរង កងយោពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស , លោក ឥត សារ៉ាត់ នាយសេនាធិការចម្រុះ កងយោធលខេមរភូមិន្ទ, លោក វង្ស ពិសេន អគ្គមេបញ្ជាការកងយោធពលខេមភូមិន្ទ និងលោក ហ៊ុន ម៉ាណែត អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការកងទ័ពជើងគោកដែលគេកត់សម្គាលថាជាមាជិកវ័យក្មេងជាងគេនិងជាបេក្ខជនត្រៀមបំរុងបន្តវេនពីឪពុក។
