កំពង់ឆ្នាំង÷នាព្រឹកថ្ងៃទី១៤ខែធ្នូ/២០១៨ ឯកឧត្តម ស សុខា រដ្ឋលេខាធិការក្រសួងអប់រំយុវជននិងកីឡា និង ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង បានចុះពិនិត្យទីតាំងទីលានបាលទាត់ទាំង២ទីតាំងក្រោយពីមានពត៍ស្តីពីការបិទនិងចោទប្រកាន់ថាអាជ្ញាធរខេត្តនិងក្រសួងបានលក់។
ទីតាំងទី១នៅខាងមុខសាលាខេត្តនិងទីតាំងទី២នៅស្តាតចាស់នៅជិតវត្តធម្មយុត្តិនិង បើកកិច្ចប្រជុំមួយនៅមន្ទីរអប់រំយុវជននិងកីឡាដោយមានការចូលរួមពីប្រធានមន្ទីរអនុប្រធានមន្ទីរ សមត្ថកិច្ច គ្រប់លំដាប់ថ្នាក់ក្នុងខេត្តកំពង់ឆ្នាំង លោកនាយក លោកស្រីនាយិកា គ្រប់សាលា ទូទាំងខេត្ត កំពង់ឆ្នាំង ។
លទ្ធផលនៃកិច្ចប្រជុំបានបញ្ជាក់យ៉ាងច្បាស់ថាតារាងបាល់ទាត់មុខសាលាខេត្តកំពង់ឆ្នាំងគឺថែរក្សានៅដដែលនិងថែមទាំងត្រូវរៀបចំឱ្យមានសោភ័ណកាន់តែល្អប្រសើរជាងមុនថែមទៀត។ (សូមមហាជនកុំមានការភាន់ច្រឡំចំពោះ រដ្ឋបាលខេត្តកំពង់ឆ្នាំងតទៅទៀត) តែចំពោះការប្រកួតកីឡាវិញទាន់តែមានការប្រកួតធំៗទើបអាចប្រកួតបាននៅទីនោះ ។
ចំពោះការហាត់លេងជាលក្ខណៈធម្មតាគឺមិនអាចលេងបាននោះទេតែអាចទៅលេងនៅស្តាតស្តាតចាស់ជិតវត្តធម្មយុត្តិបានដោយសេរី។ លើសពីនេះទៅទៀតឯកឧត្តម ស សុខា បានបញ្ជាក់ថាចំពោះលោកគ្រូអ្នកគ្រូនៅ ក្នុងខេត្តកំពង់ឆ្នាំង ដែលបង្ហាត់បង្រៀនបានល្អទាំងសីលធម៌និងការអប់រំ ក្រសួងនិងផ្ដល់រង្វាន់ម៉ូតូមួយគ្រឿងជាការលើកទឹកចិត្តបន្ថែមទៀតផងដែរ៕
