បន្ទាប់ពីមានសារពត៌មានក្នុងស្រុកជាច្រើនបានផ្សាយនូវពត៌មានមួយពាក់ព័ន្ធជាមួយនឹងនឹងទំនាស់ គរុភ័ណវត្តព្រះធម្មត្រ័យជាមួយលោក ប៊ុន ម៉េង និងប្រពន្ធឈ្មោះ លឹម សុខហៀង ឥឡូវនេះលេចចេញនូវពត៌មានការពិតជាច្រើន ។
តាមសម្តីលោក មួង សាម៉ន អតីតមេឃុំព្រៃស និងបច្ចុប្បបន្នជាគណៈកម្មការវត្តព្រះធម្មត្រ័យបាន អោយដឹងថា ចាប់តាំងពីឆ្នាំ១៩៧៩ រហូតដល់ឆ្នាំ២០០០ រូបលោកគឺជាមេឃុំព្រៃស ចំពោះដីទំនាស់ដែលលោក ប៊ុន ម៉េង បានទិញពីលោកស្រី ចាន់ ណាវី នោះគឺជាដីរបស់វត្តព្រះធម្មត្រ័យ ព្រោះដីនេះ (ដីទំនាស់គរុភ័ណ្ឌវត្ត ព្រះធម្មត្រ័យ) កាលពីឆ្នាំ១៩៨៩ រូបលោក (លោក មួង សាម៉ន) បានបែងចែកអោយមកវត្តធ្វើជាដីរបស់វត្តដោយអោយលោកអាចារ្យ អៀង ឃួន ដាក់ពាក្យស្នើសុំកាន់កាប់ដែលមានទទឹង ១៧៥ម៉ែត្រ និងបណ្តោយ ៤០០ម៉ែត្រ ហើយបានវាស់វែងត្រឹមត្រូវដោយមានរូបខ្ញុំជាមេឃុំព្រៃស លោក ឌុល ខុន ប្រធានភូមិធម្មត្រ័យ បច្ចុប្បន្នជាអាចារ្យវត្តព្រះធម្មត្រ័យ ក៏ជាអ្នកចូលរួមវាស់វែងដីនេះអោយវត្តដែរ។ ដោយឡែកចំពោះថាទីតាំងដី នេះនៅខាងក្រៅរបងវត្ត ឬស្ថិតនៅភូមិ២៤ នោះគឺថាកាលពីជំនាន់ឆ្នាំ១៩៨៩ និងឆ្នាំ១៩៩០ គឺមិនទាន់មាន ភូមិ២៤នេះដែរ ។ ហើយចំពោះដីដែលមានទំនាស់នេះវិញ ខ្ញុំហ៊ានភ្នាល់ដាក់ជីវិត បើមិនមែនជាដីរបស់វត្តបើមិនជឿទេ សូមលោកក្មួយជាអ្នកសារពត៌មានទាំងអស់ ដើរសួរប្រជាជន ឬទៅសួរលោក ក្រូច ផាន ជាអតីតចៅហ្វាយ ខណ្ឌដង្កោដែលជាអ្នកស៊ីញ៉េលើលិខិតផ្ទេរសិទ្ធិដីវត្តនោះទៅដឹងហើយ ។
តាមប្រភពពត៌មានពីមន្ត្រីនៅក្រសួងធម្មការ និងសាសនាបានអោយដឹងថាចំពោះរឿងទំនាស់ដីវត្តនេះ កន្លងមកកាលពីជំនាន់ ឯកឧត្តម ទេសរដ្ឋមន្ត្រី ឃុន ហាំងនៅធ្វើជារដ្ឋមន្ត្រីក្រសួងធម្មការ និងសាសនា ពួកខ្ញុំ (ប្រភពខាងលើ) ក៏ធ្លាប់បានធ្វើជាប្រតិភូចុះស្រាវជ្រាវរឿងនេះដែរ ហើយលទ្ធផលដីនោះគឺជាដីរបស់វត្ត ប៉ុន្តែវា គ្រាន់តែប្រទាំងប្រទើសជាមួយអាជ្ញាធរបន្តិច ព្រោះអាជ្ញាធរជាអ្នកលក់ដីវត្ត មិនមែនលោកស្រី ចាន់ ណាវី ទេ។
ប្រភពដដែលបន្តថា ចំពោះលោកស្រី ចាន់ ណាវី ដែលជាភាគីអ្នកលក់ដីអោយទៅលោក ប៊ុន ម៉េង គឺប្រតិភូ ក្រសួងបានអញ្ជើញគាត់អោយមកបំភ្លឺ គឺគាត់បាននិយាយថា ចំពោះប្រវត្តិដី (ដីទំនាស់គរុភ័ណ្ឌវត្តព្រះធម្មត្រ័យ)គឺគាត់អត់បានដឹងថាជាដីរបស់វត្តទេ តែលោក ម៉ៃ សេង ចៅសង្កាត់រងសង្កាត់ព្រៃសគាត់ប្រាប់ថាដីនេះ គឺជាដី របស់លោក ចាន់ ថេតដែលបានទិញពីលោក លី ប៉ោយូ ថៅកែកាស៊ីណូ (នៅឯណានាងខ្ញុំអត់ដឹងទេ) ហើយ លោក ម៉ៃ សេង អោយខ្ញុំរកម៉ូយមកទិញ ព្រោះគេលក់ក្នុងតំលៃទាបបំផុត គឺ ៦០០០០$ ដីទំហំ ១៧៥០០ម៉ែត្រការ៉េ ហើយគេអោយកុំមីខ្យុង ៣% (បីភាគរយ) ស្មើនឹង ១៨០០$ ពេលនោះលោកស្រី ចាន់ ណាវី ក៏បានហៅ លោក ប៊ុន ម៉េង និងប្រពន្ធឈ្មោះ លឹម សុខហាង មកទិញដីនេះតែម្តង។ ប៉ុន្តែដល់ពេលធ្វើឯកសារផ្ទេរសិទ្ធិ អត់ មានអ្នកចេញមុខធ្វើជាអ្នកលក់ ទើបគេអោយលោកស្រី ចាន់ ណាវី ធ្វើជាអ្នកលក់ដោយគេកាត់ដីមួយផ្នែក ប្រគល់អោយទៅឈ្មោះ ចាន់ ណាវី ឯលោក ប៊ុន ម៉េង គឺបានដីទំហំ ១៣២៤៥ម៉ែត្រការ៉េ នៅសល់ផ្នែក ខាងជើងទំហំ ៤២៥៥ ម៉ែត្រការ៉េគឺប្រគល់អោយទៅលោកស្រី ចាន់ ណាវី ជាអ្នកគ្រប់គ្រង ទើបដីរបស់លោក ប៊ុន ម៉េងមានទំហំខុសពីដីដែលវត្តបានដាក់ពាក្យបណ្តឹង ។ ហើយចំពោះការចុះហត្ថលេខាលើលិខិតផ្ទេរសិទ្ធិ វិញ លោក ខាត់ សុខខៃ ចៅសង្កាត់ព្រៃស គាត់ឆ្លើយថាគាត់ស៊ីញ៉េក្រោយគេទេ ព្រោះគេស៊ីញ៉េលក់តគ្នា ប៉ុន្មានតហើយ ។ ប៉ុន្តែពេលស្រាវជ្រាវក្រុមប្រតិភូក្រសួងធម្មការរកអត់ឃើញឯកសារ ដែលពាក់ព័ន្ធការលក់ដូរពី មុនមកនោះទេ គឺឃើញតែជំនាន់លោក ខាត់ សុខខៃ ស៊ីញ៉េតែប៉ុណ្ណោះ ។ ដោយឡែកបើយើងពិនិត្យមើលលើ ស្នាមមេដៃប្រជាពលរដ្ឋបានដាក់ពាក្យបណ្តឹងក្នុងនោះក៏មានស្នាមមេដៃលោក ខាត់ សុខខៃ បានផ្តិតប្តឹងតវ៉ារឿង ដីវត្តនេះដែរ ដល់ពេលលោកឡើងធ្វើជាចៅសង្កាត់ លោកក៏បានស៊ីញ៉េលក់ដីវត្តទៅវិញ ។
តាមប្រសាសន៍របស់លោក ទូច អាង អតីតព្រះចៅអធិការវត្តព្រះធម្មត្រ័យបានអោយដឹងថា រឿងទំនាស់ដីវត្តព្រះធម្មត្រ័យនេះគឺបានកើតឡើងតាំងពីមុនជំនាន់លោកមកធ្វើជាចៅអធិការវត្តម្លេះ ប៉ុន្តែពិបាករក ស្ថាប័នណាដែលហ៊ានផ្តល់យុត្តិធម៌អោយវត្តណាស់ សូម្បីតែ ស.ជ.ណ របស់ទីស្តីការគណៈរដ្ឋមន្ត្រីក៏គេអត់ គោរពតាមដែរ ហើយបើនិយាយពីស្ថាប័នតុលាការវិញគឺមិនគួរទទួលយកពាក្យបណ្តឹងរឿងនេះមកដោះស្រាយដែរ ព្រោះដីនេះ មិនទាន់បានចុះបញ្ជីសុរិយោដីនៅឡើយ ហើយម្យ៉ាងវិញទៀត បើយើងពិនិត្យមើលឯកសាររបស់ ឯកឧត្តម ចាយ សាំងឃុនគឺមានន័យថា បើភាគីលោក ប៊ុន ម៉េង មានការកើតទុកមិនសុខចិត្តចំពោះស.ជ.ណដែលទីស្តីការគណៈរដ្ឋមន្ត្រីសម្រេច គឺប្តឹងទៅតុលាការ នោះគឺមានន័យថាមិនមែនអោយប្តឹងអាចារ្យ គណៈកម្មការវត្ត ទៅតុលាការទេ គឺប្តឹងអ្នកចេញ ស.ជ.ណ ទៅតុលាការ។ តែនេះអត់អញ្ចឹងទេ គឺលោកប៊ុន ម៉េង ប្តឹងអាចារ្យគណៈកម្មការវត្តពីបទបរិហាកេរ្តិ៍តាមឃោសនាស័ព្ទ ពីបទប្រើប្រាស់លិខិតក្លែង និងក្លែងលិខិតសាធារណៈទៅវិញ ។ បើលិខិតទាំងនោះក្លែងក្លាយមិនមែន ឯកឧត្តម ឧបនាយករដ្ឋមន្ត្រី ប៊ិន ឃិន គាត់ទទួលស្គាល់រហូតដល់ ហ៊ានសម្រេចប្រគល់ដីមកអោយវត្តវិញទេ ហើយបើលោកចៅក្រមតុលាការគាត់ថាលិខិតរបស់វត្តក្លែងក្លាយមាន ន័យថា ឯកឧត្តម ឧបនាយករដ្ឋមន្ត្រី ប៊ិន ឃិន មិនបានរៀនសូត្រខ្ពង់ខ្ពស់ទេ បានជាធ្វើការមិនដឹងថាលិខិតណាត្រឹមត្រូវ លិខិតណាខុស ។ លោក ទូច អាង បញ្ជាក់បន្ថែមថាចំពោះសំណុំរឿងនេះមិនមែនភាគីវត្តអត់បានដាក់ស្នើ សុំការជួយដោះស្រាយពីសម្តេចតេជោ នាយករដ្ឋមន្ត្រី នោះទេ គឺដាក់បីបួនលើកឯណោះ ប៉ុន្តែឯកសារទាំងនោះ ដាក់មិនដល់សូម្បីតែ ឯកឧត្តម យិន សុវណ្ណី ទីប្រឹក្សាសម្តេចផ្ទាល់ក៏ធ្លាប់កាន់យកទៅដាក់ដែរ តែមិនដឹងជាទើ ត្រឹមណា សូម្បីតែទូរទស្សន៍ កាសែត ក៏បានផ្សាយជាច្រើនដែរ ប៉ុន្តែមិនដឹងថា សម្តេច អគ្គមហាសេនាបតីតេជោ ហ៊ុន សែន បានដឹងបានឮ បានឃើញដែរ ឬអត់ទេ ។ ឬក៏ដឹងហើយគាត់ធ្វើជាមិនដឹងក៏យើងមិនដឹងដែរ ។ ប៉ុន្តែ ខ្ញុំ (លោក ទូច អាង)ជឿជាក់ សម្តេចតេជោនាយករដ្ឋមន្ត្រីនូវពេលដែលគាត់ទទួលដំណឹងថា ប្រជាពលរដ្ឋ ទទួលរងនូវភាពអយុត្តិធម៌បែបនេះគាត់ច្បាស់ជាមិននៅស្ងៀមនោះទេកុំថាឡើយដល់ ថ្នាក់ដីគរុភ័ណ្ឌរបស់វត្តយ៉ាងនេះ ព្រោះសម្តេចគោរពព្រះពុទ្ធសាសនា ។
តាមប្រភពពីមន្ត្រីនៅតុលាការបានអោយដឹងថាការដែលចៅក្រមហ៊ានទទួលពាក្យបណ្តឹងរបស់លោក ប៊ុន ម៉េង មកដោះស្រាយនោះគឺប្រហែលជានៅក្នុងពាក្យបណ្តឹងនោះមានឈ្មោះ លោកស្រី ឃី ជឺ ជាសហដើម បណ្តឹងផងមើលទៅ? ព្រោះកន្លងមកពាក្យបណ្តឹងរបស់លោក ប៊ុន ម៉េង បានដាក់ចូលមកសាលាដំបូងរាជធានីភ្នំពេញ ជាច្រើនលើកច្រើនសារគឺត្រូវបានចៅក្រមសាលាដំបូងរាជធានីភ្នំពេញដូចជាលោកស្រី ចាំង ស៊ីណាត លោក យូ ប៊ុនណា បានផ្ទេរសមត្ថកិច្ចទៅគណៈកម្មការសុរិយោដីសមត្ថកិច្ចក្នុងការដោះស្រាយ។ ប៉ុន្តែមកដល់ ឆ្នាំ 2013 ស្រាប់តែលេចឈ្មោះលោកស្រី ឃី ជឺ បានចូលរួមដាក់ពាក្យបណ្តឹងជាមួយលោក ប៊ុន ម៉េង ក្នុងនាម ជាសហដើមបណ្តឹងទើបធ្វើអោយចៅក្រមនៅសាលាដំបូងរាជធានីភ្នំពេញ ក៏ដូចជានៅតុលាការឧទ្ធរណ៍ពិបាក ក្នុងការសម្រេចក៏ត្រូវធ្វើការសម្រេចទៅតាមការស្នើសុំរបស់លោកស្រី ឃី ជឺ ទៅ។ ព្រោះបើនិយាយពីស្ថាប័នតុលាការតាំងពីសាលាដំបូង រហូតដល់កំពូលនរណាក៏ស្គលា់លោកស្រី ឃី ជឺ ដែរ ។
ជុំវិញពត៌មានខាងលើនេះអ្នកសារពត៌មានយើងបានព្យាបាមស្វែងរកលោក ប៊ុន ម៉េង និងអ្នកស្រី ឃី ជឺ ដើម្បីសុំការពន្យល់ដែរតែរកមិនឃើញ ព្រោះអត់ស្គាល់លេខទូរស័ព្ទ ៕
