(ខេត្តកំពង់ឆ្នាំង)៖ មកដល់ពេលនេះមានរយះពេលជាង១ខែហើយ ដែលក្រុមហ៊ុនលោក រឿន ថាវរិទ្ធ បានធ្វើអាជីវកម្មបូមខ្សាច់លក់អត់ច្បាប់ គ្មានអាជ្ញាបណ្ណ័ពីមន្ទីរ និងក្រសួងពាក់ព័ន្ធ ក្រោមលេសស្តារបាតអាងជួសជុលទំនប់កុមារយកទឹកធ្វើស្រែនៅក្នុងភូមិអ្នកតាហាង ឃុំកំពង់ត្រឡាច ស្រុកកំពង់ត្រឡាច តា មរយះការស្នើសុំពីតំណាងប្រជាពលរដ្ឋមួយក្រុមតូច ។
លោក អ៊ុក រស់ ប្រធានមន្ទីររ៉ែ និងថាមពលខេត្តកំពង់ឆ្នាំង នៅថ្ងៃទី០៧ , ១២ , ២០១៨ បានប្រាប់អ្នកសារព័ត៌មានក្នុងខេត្តថា៖ រឿងជួសជុលទំនប់ ស្ដារបាតអាង នៅទំនប់កុមារ ក្រុមហ៊ុនគេមានច្បាប់ត្រឹមត្រូវ ប៉ុន្តែរឿងបូមខ្សាច់ធ្វើអាជីវកម្មលក់ដូរ គឺខុសច្បាប់។ ដូច្នេះក្រុមហ៊ុនត្រូវតែមានច្បាប់ពីមន្ទីររ៉ែ និងថាមពល និងក្រសួង ដើម្បីបង់សួយសារហករ (បង់ពន្ធជូនរដ្ឋ ) អោយបានត្រឹមត្រូវ ទើបធ្វើអាជីវកម្មលក់ខ្សាច់បាន ។
រឿងបូមខ្សាច់ស្តារបាតបឹងកុមារ យកទឹកធ្វើស្រែគឺជារឿងមួយត្រឹមត្រូវ តែហាមការដឹកខ្សាច់ទៅលក់ ។ ប៉ុន្តែមកដល់ពេលនេះក្រុមហ៊ុនមួយនេះ នៅតែបន្តបូមខ្សាច់ដឹកចេញទៅលក់ជារៀងរាល់ថ្ងៃ ដោយមិនទាន់មានច្បាប់ត្រឹមត្រូវនៅឡើយទេ គឺមានអ្នកស៊ីលុយគេឬ…!! ទើបធ្វើអីគេមិនកើត ។
… ប្រជាពលរដ្ឋហួសចិត្តថា៖ បើដឹងថាក្រុមហ៊ុនមួយនេះអត់ច្បាប់ហើយ ម៉េចក៏នៅបណ្តោយអោយគេដឹកខ្សាច់លក់ជារៀងរាល់ថ្ងៃទៀត តើលោកប្រធានមន្ទីរវ៉ែ និងថាមពលខេត្តហ្នឹង បានលុយប៉ុន្មានទើបមិនព្រមទប់ស្កាត់ ។ ចំណែកលោកចៅហ្វាយស្រុក លោកចៅហ្វាយខេត្ត បានកាដូប៉ុន្មានដែរ ពីក្រុមហ៊ុនហ្នឹង ទើបធ្វើមិនដឹងមិនឭបែបនេះ ដោយអស់លោកជាអ្នកទទួលខុស និងទទួលត្រូវ សូមកុំភ្លេចអភិក្រមរបស់សម្តេចតេជោ មុជទឹក ឆ្លុះកញ្ចក់ សឹតសក់ ព្យាបាល ឬវះកាត់ចោលទៅ អាជម្ងឺពុករលួយ និងម៉ែអាលួយ តែបើកែមិនឡើងទេនោះ ប្រជាពលរដ្ឋស្នើសុំសម្តេចក្រឡាហោម អញ្ជើញពួកគាត់ទៅរៀនច្បាប់នៅក្រសួងមហាផ្ទៃថែមទៀតទៅ ទុកកៅអីពួកគាត់អោយគេអ្នកមានសមត្ថភាពធ្វើវិញ ។
ម្យ៉ាងវិញទៀតអស់គ្នាគួរតែធ្វើការស្រាវជ្រាវពាក់ព័ន្ធទៅនឹងលិខិតស្នើសុំរបស់ប្រធានសហគមន៍ដែលបានដាក់ចំនួនផ្ទៃដីដល់ទៅជាង ១ពាន់ហិតា ប៉ុន្តែជាក់ស្តែងដោយយោងទៅលើឯកផែនទីសហគមន៍អ្នកតាហាង មួយគឺមានត្រឹមតែ៥៦៦ ហិតាតែប៉ុណ្ណោះ។ ប្រភពព័ត៌មានមួយទៀតពីប្រជាពលរដ្ឋរស់នៅក្នុងភូមិអ្នកតាហាងបានបញ្ជាក់ថាដីនៅក្នុងតំបន់អាងទឹក(ដីរដ្ឋដីខ្សាច់)នោះត្រូវបានគេឃុបឃិតគ្នាលក់ឲ្យគេអស់ទៅហើយក្នុងមួយហិចតាតំម្លៃ១២០០០ ដុល្លារ ទៅ១៥០០០ ដុល្លារឯណោះ។បើយោងទៅតាមផ្លូវច្បាប់អ្នកដែលបានលួចទ្រព្យសម្បត្តិរដ្ឋលក់តើត្រូវទទួលទោសបែបណាដែរ?។