កំពង់ចាម ៖ ព្រះតេជគុណអនធាងអានដែលបួសច្រើវស្សារហូតឡើងបានធ្វើជាចៅអធិការវត្តជ្រោយថ្ម និងជាព្រះមេគុណសង្ឃខេត្តនៅមិនសុខបានសឹកទៅការប្រពន្ធក្មេងឆ្កុយនៅថ្ងៃទី១៧ ខែធ្នូ ឆ្នាំ២០១៨ខាងមុខនេះ។
ដោយសារឃើញសង្ឃមានថានៈដល់ទៅមេគុណខេត្តទប់កីលេសមិនបានសឹកទៅការប្រពន្ធក្មេងចឹងគណៈកម្មការអាចារ្យវត្ត ជ្រោយថ្មរ ខេត្តកំពង់ចាម បានសម្តែងការព្រួយបារមម្ភថា បច្ច័យ របស់សម្តេចកិត្តិព្រឹត្តបណ្ឌិត ប៊ុន រ៉ានី ហ៊ុន សែន ដែលបានប្រគេនមកអោយដើម្បីទុកកសាងសាលាបាលីក្នុងវត្តអាចនឹងត្រូវលោកឆាន់ដាច់?។ព្រោះនៅពេលដែល លោក អន ធាងអាន បានលាចាកសិក្ខាបថ រយៈពេលជាងមួយខែ ខាងគណៈកម្មការអាចារ្យវត្ត មិនបានទទួល ព័ត៌មានជាក់លាក់អំពីថវិកានោះទេ ។មិនដឹងថា តើ អតីតៈមេគុណខេត្ត អន ធាងអាន យកថវិកានោះចាត់ចែងទៅលើអ្វី និងទុកនៅឯណានោះទេ ដែលប្រការនេះ ធ្វើអោយកើតមានមន្ទិលសង្ស័យនោះ ។
អាចារ្យវត្តជ្រោយថ្មរ បានអោយដឹងថា កាលពីល្ងាចថ្ងៃទី ២ ខែសីហា ឆ្នាំ២០១៨ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានអញ្ជើញបូជាទៀនធូប ផ្កាភ្ញី ថ្វាយព្រះ និងនាំយកទេយ្យវត្ថុជាច្រើន ទៅប្រគេនព្រះសង្ឃដែលគង់ចាំព្រះវស្សានៅវត្តទុស្សនារាម (ហៅវត្តជ្រោយថ្ម) និងវត្តខេមវ័ន បឹងស្នាយ ដែលស្ថិតនៅក្រុងកំពង់ចាម ខេត្តកំពង់ចាម។ បើតាម លោក តាអាចារ្យ ថានៅមានថវិកាចំនួនជាង១ម៉ឺនដុល្លាផ្សេងទៀតដែលបានមកពីសប្បុរសជន ចូលបច្ច័យទុកទិញដី ជាប្រយោជន៍វត្ត ហើយថវិកានេះ ក៏ តេជគុណ អន ធាងអាន ជាអ្នកកាន់កាប់ដែរ ហើយលុយនោះ មិនទាន់បានចាត់ចែងក្នុងការទិញដីនោះទេ ។
ទាក់ទិនទៅក្តីកង្វល់របស់អាចារ្យវត្តជោយថ្មរ នោះ អតីតៈព្រះមេគុណខេត្តកំពង់ចាមនិងជាចៅអធិការវត្តជ្រោយថ្មរ លោក អន ធាងអាន បានបំភ្លឺថា លុយចំនួន៥ម៉ឺនដុល្លា ដែល សម្តេចកិត្តិព្រឹទ្ធបណ្ឌិត បានប្រគេន គឺលោក បានផ្ញើនៅក្នុងធនាគារ មិនទាន់បានចាត់ចែងសាងសង់អ្វីទេ ។ដោយឡែក ចំពោះថវិកាជាង ១ម៉ឺនដុល្លាទៀត លោក បានយកទៅជួយកសាងសាលាបាលី នៅភូមិទួលបី ក្នុងស្រុកកងមាស ដែលជាស្រុកកំណើតរបស់លោក ហើយថវិកានេះ លោកសន្យា និងសងមកវត្តជ្រោយថ្មរវិញ ប៉ុន្តែ គ្មានថ្ងៃកំណត់នោះទេ។
លោក អន ធាងអាន បានប្រាប់កាសែតថា ការសឹក ហើយមករៀបចំមង្គលការនេះ គឺគ្មានការបង្ខិតបង្ខំពីភាគីណាមួយនោះទេ ។
លោកថា ប្រការដែលលោក លាចាកសិក្ខាបថនេះ មូលហេតុមកពីអស់និស្ស័យពីព្រះសម្មាសម្ពុទ្ធ និងមានជម្ងឺប្រចាំកាយ មិនអាច អត់អាហារល្ងាចបាន។ក្រោយពីសឹក ម្តាយរបស់លោក បានស្តីដណ្តឹងប្រពន្ធអោយតែម្តងទៅ ដែលនឹងត្រូវចូលរោងការនៅថ្ងៃទី១៧ ខែធ្នូ ឆ្នាំ២០១៨ ខាងមុខនេះ ។
កាលពីរសៀលថ្ងៃទី១២ ខែ វិច្ឆិកា មន្ទីរធម្មការ និង សាសនា និង សាលាគណខេត្ត បាននិមន្ត-អញ្ជើញព្រះសង្ឃ អាចារ្យ គណះកម្មការវត្តជ្រោយថ្ម និង វត្តបឹងស្នាយ មកប្រជុំដើម្បីស្នើសុំឱ្យព្រះធម្មសាលវង្ស សា វីរៈ ព្រះរាជាគណះថ្នាក់កិត្តិយស ជាព្រះសមុហ៍គណខេត្ត ជាព្រះអនុគណក្រុងកំពង់ចាម និងជាចៅអធិការវត្តខេមវ័ន បឹងស្នាយ ឱ្យព្រះអង្គទទួលនាទីជាចៅអធិការស្តីទីវត្តជ្រោយថ្ម បន្ថែមលើតួនាទីបច្ចុប្បន្ន។
