ភ្នំពេញ៖ អគ្គស្នងការដ្ឋាននគរបាលជាតិ ប្រកាសបដិសេធ ចំពោះពតិមានដែលគណនីឈ្មោះ «ណាធីយ៉ា ឯកា (Natiya Aek Ka)» ដែលបានផ្សាយជុំវិញហេតុការណ៍ពាក់ព័ន្ធសិស្សសាលាវិទ្យាល័យថ្មគោល ខេត្តបាត់ដំបង ៧០ប្លាយនាក់នាក់បានដួលសន្លប់ថាកើតឡើងក្រោយពីមាន មានជនជាតិចិន បានចុះសុំនាយកសាលាមកពិនិត្យសុខភាពសិស្សដោយសិស្សខ្លះត្រូវបានជួសឈាម រីឯសិស្សខ្លះត្រូវចាក់ថ្នាំ និងពិនិត្យចង្វាក់បេះដូង។
លោក ហេង ស៊ុនផារិទ្ធនាយកសាលាវិទ្យាល័យថ្មគោលបានឲ្យដឹងថា៖ ហេតុការណ៍ដួលសន្លប់នេះ បានកើតឡើងចំពោះសិស្ស ៧១នាក់ ក្នុងនោះសិស្សស្រីមាន៧០នាក់កាលពីថ្ងៃទី៦ និង៧ធ្នូឆ្នាំ២០១៨។ទាក់ទងវត្តមានគ្រូពេទ្យចិនលោក ហេង ស៊ុនផារិទ្ធ បានឲ្យដឹងថា កាលពីថ្ងៃទី២ និង៣ធ្នូ មានក្រុមគ្រូពេទ្យខ្មែរសហការជាមួយក្រុមគ្រូពេទ្យចិន (ក្នុងនោះ មានគ្រូពេទ្យចិនប្រមាណពី១០ទៅ ២០នាក់) ជិះឡានទូរីសចំនួន២ បានធ្វើដំណើរទៅស្រាវជ្រាវនូវជំងឺបេះដូងដោយគ្រាន់តែប្រើប្រាស់ប្រដាប់ឧបករណ៍ស្ទង់បេះដូងតែប៉ុណ្ណោះមិនបានជួសឈាមនោះទេ។
នាយកសាលាវិទ្យាល័យថ្មគោលបញ្ជាក់ថាការចុះស្រាវជ្រាវជំងឺបេះដូងនោះ គឺបានធ្វើតាមសាលាជាច្រើនមិនត្រឹមតែវិទ្យាល័យថ្មគោលប៉ុណ្ណោះទេ គឺមាននៅតាមសាលាមួយចំនួនក្នុងស្រុកសង្កែ និងក្រុងបាត់ដំបង។
សិស្ស ដែលក្រុមគ្រូពេទ្យបានចុះស្រាវជ្រាវពិនិត្យបេះដូងក្នុងវិទ្យាល័យថ្មគោលនោះ គឺជាសិស្សកម្រិតថ្នាក់ទី៧, ទី៨ និងទី៩។ ចំណែកការដួលសន្លប់របស់សិស្សនៅវិទ្យាល័យថ្មគោលចំនួន ៧១នាក់នោះ គឺជាសិស្សថ្នាក់ទី១១ និងទី១២ នោះទេ ដែលមិនពាក់ព័ន្ធនឹងសិស្សដែលក្រុមគ្រូពេទ្យខ្មែរ និងចិនបានសហការគ្នាស្រាវជ្រាវជំងឺបេះដូងនោះឡើយ។លោក ហេង ស៊ុនផារិទ្ធបានវាយតម្លៃថាការដួលសន្លប់គឺមកពីសិស្សខ្វះជីវជាតិនិងអត់ងងុយ!?។
អគ្គស្នងការដ្ឋាននគរបាលជាតិាតមរយៈគេហទំព័ររបស់ខ្លួន បានបដិសេធថា ការផ្សាយរបស់បណ្តាញសង្គមនៃគណនីឈ្មោះ ណាធីយ៉ា ឯកា (Natiya Aek Ka) ដែលចោទប្រកាន់ថាហេតុការណ៍ដួលសន្លប់របស់សិស្សសាលាវិទ្យាល័យថ្មគោល ខេត្តបាត់ដំបង ដោយសារជនជាតិចិន បានជួសឈាមសិស្ស និងការចាក់ថ្នាំបានខុសនឹងការពិតលើបញ្ហានេះ។
អគ្គស្នងការដ្ឋាននគរបាលជាតិ មិនបានបកស្រាយអំពីមូលហេតុដែលនាំឲ្យមានសិស្សសន្លប់នោះទេតែបានអំពាវនាវអ្នកលេងបណ្តាញសង្គម សូមកុំ សែរ(Share)ដោយចាត់ទុកថាជា រឿងមិនពិតជាពត៍មានក្លែងក្លាយ(Fake News) នឹងអាចប្រឈមចំពោះមុខច្បាប់ ក្នុងចេតនាបំពុលបរិយាកាសសង្គម៕
