ខេត្តកំពង់ស្ពឺ ៖បានបែកគំនិតចង់ស៊ីដាច់បច្ច័យបុណ្យកឋិនកសាងវត្តចំនួនជិត២០លានរៀលចៅអធិការវត្តទេពឧណ្ណារាម ស្ថិតក្នុងភូមិសំពៅងរ ឃុំព្នាយ ស្រុកសំរោងទងក៏ប្រឌិតរឿងថាមាន ចោរគាស់ទ្វារកុដិចូលលួចលុយ ។
ចៅអធិការវត្តទេពឧណ្ណារាម ដែលប៉ុនប៉ងស៊ីដាច់បច្ច័យបុណ្យកឋិនតែភរមិនបានល្អត្រូវសមត្តកិច្ចតាមទាន់ជាន់កែង រហូតត្រូវចាប់ផ្សឹក មានឈ្មោះនាម ម៉ន អឿន អាយុ៤២ឆ្នាំ ជាព្រះចៅអធិការវត្ត ។
សមត្ថកិច្ច ឱ្យដឹងថា កាលពីវេលាម៉ោង២ និង២៧នាទីរសៀល ថ្ងៃទី២៩ ខែវិច្ឆិកា ឆ្នាំ២០១៨ ព្រះសង្ឃ ព្រះនាម ម៉ន អឿន ជាព្រះចៅអធិការវត្តទេពឧណ្ណារាម បានមកប្តឹងនៅអធិការដ្ឋាននគរបាលស្រុកសំរោងទង ថាមានចោរចូលគាស់ទ្វារកុដិ របស់ ព្រះអង្គ លួចយកសម្ភារមានតម្លៃ និងប្រាក់រាប់សិបលានរៀល ដែលប្រាក់ទាំងនោះ គឺជាប្រាក់បច្ច័យកឋិនទាន ទុកសម្រាប់កសាងវត្ត។
ក្រោយពីទទួលពាក្យបណ្តឹងខាងលើ សមត្ថកិច្ចជំនាញ បានធ្វើការស្រាវជ្រាវរហូតបំបែកសំណុំរឿង និងកំណត់បានមុខសញ្ញាប្រព្រឹត្ត ជាក់ស្តែង តាមលក្ខណៈបច្ចេកទេសវិទ្យាសាស្ត្រ និងតម្រុយភិនភាគស្លាកស្នាមមួយចំនួន កត់សំគាល់ជនសង្ស័យជាអ្នកប្រព្រឹត្ត (ប្រឌិត) តែម្តង ។ បន្ទាប់ពីធ្វើការស៊ើបអង្កេត និងស្រាវជ្រាវយ៉ាងយកចិត្តទុកដាក់រួចមក សមត្ថកិច្ចបានកំណត់មុខសញ្ញាជនសង្ស័យ ពោលគឺជាដើមបណ្តឹង ឈ្មោះម៉ន អឿន ជាព្រះចៅអធិការវត្តទេពឧណ្ណារាម តែម្តង។
ជនសង្ស័យត្រូវបានរកឃើញថា បានប្រឌិតព័ត៌មាន និងបានរៀបចំភ័ស្តុតាង ស្លាកស្នាមក្លែងបន្លំដើម្បីបំភ័ន្តថា ក្រុមចោរជាអ្នកលួចលុយ អស់ចំនួន១៦លាន ៥ម៉ឺនរៀល និងប្រាក់ដុល្លារចំនួន៩០០ដុល្លារ ដោយជនសង្ស័យបានប្រើរូបភាពគប់កញ្ចក់ទ្វារឱ្យបែក ហើយគាស់ទ្វារដែក ចូល ក្នុងបន្ទប់។ករណីនេះអតីតសង្ឃកំហូចបានទទួលស្គាល់ថា ខ្លួនពិតជាបានប្រព្រឹត្តដោយខ្លួនឯងពិតប្រាកដមែនគ្មានអ្នកណាចូលរួមឡើយ។
