ឧត្តរមានជ័យ ៖ មេច្រកទ្វារព្រំដែនអន្តរជាតិជាំសាងាំ ត្រូវបានគេរិះគន់ថា កំពុងតែឃុបឃឹតជាមួយឈ្មួញ ដឹកទំនិញគ្មានច្បាប់អនុញ្ញាត ចូលទៅប្រទេសថៃជារៀងរាល់ថ្ងៃ ពុំមានការត្រួតពិនិត្យនោះឡើយ។
ប្រភពពីអ្នករកស៊ីឲ្យដឹងថា នៅច្រកជាំ មានរថយន្ដដឹកទឹកកកបង្កប់ទៅដោយជ័រទឹករាប់សិបតោន ក្នុងមួយខែៗបើ ឆ្លងបារ៉ាស់ច្រកទ្វារព្រំដែន អន្តរជាតិ ជាំសាងាំដោយពុំមានការត្រួតពិនិត្យពីសមត្ថកិច្ចនៅច្រកនេះ ចូលទៅក្នុងប្រទេសថៃ ។
ករណិយ៍ជាក់ស្តែងបានកើតឡើងកាលពីនៅថ្ងៃទី២៧ខែ វិច្ឆិកា ឆ្នាំ២០១៨គឺថា លោកសាប់ យឿន ប្រធានច្រកទ្វារព្រំដែនអន្តរជាតិជាំសាងាំ ស្រុកអន្លង់វែង ខេត្តឧត្តរមានជ័យ បានបើកដៃឲ្យឈ្មួញ នាំទំនិញគ្មានច្បាប់អនុញ្ញាតប្រភេទជ័រទឹក រាប់សិបតោន ចូលទៅប្រទេសថៃ តាមច្រកទ្វាអន្តរជាតិជាំ ។
ប្រភព ដដែល បានឲ្យដឹងថាវាមិនមែនជាលើកទី១ទេដែល លោក សាប់ យឿន ប្រធានស្នាក់ការច្រកទ្វារព្រំដែនអន្តរជាតិជាំសាងាំនិងមន្ត្រីជំនាញគយនគរបាល បើកឲ្យឈ្មួញនាំទំនិញគ្មានច្បាប់អនុញ្ញាតឆ្លងដែនយ៉ាងអនាធិបតេយ្យរាប់សិបគ្រឿងក្នុងមួយថ្ងៃៗ គេងបន្លំបំបាត់ចំណូលពន្ធរដ្ឋ យ៉ាងគឃ្លើនដោយគ្មានញញើតអ្វីទាំងអស់។ ការដែលលោក សាប់ យឿន ឃុបឃិតឲ្យឈ្មួញនាំចូលទំនិញគេចពន្ធ និងទំនិញបង់ពន្ធមិនគ្រប់ កំពុងធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ ។
ចំពោះពតិមាននេះលោក សាប់ យឿន ប្រធានស្នាក់ការច្រកទ្វារព្រំដែនអន្តរជាតិជាំសាងាំ បានបដិសេធមិនឆ្លើយជាមួយកាសែតដោយថា កំពុងជាប់រវល់ និងបានបើកឲ្យចុះផ្សាយ បើមានទំនិញគេចពន្ធ ។ ម្ចាស់អាជីវកម្មរកស៊ីជ័រទឹកឆ្លងដែនតាមច្រកទ្វារព្រំដែនអន្តរជាតិជាំសាងាំ បានឲ្យដឹងថា ការរត់ការបង់ប្រាក់ឲ្យច្រកទ្វារព្រំដែនជាំសាងាំ ដូចបង់អីវ៉ាន់ចាបហួយដែរ ។ ចំណែករឿងចំនួនទឹកប្រាក់មិនអាចបញ្ជាក់បានទេ បន្ត ក្នុងមួយជើងៗដឹកបានតែ៥ទៅ៦តោនតែប៉ុណ្ណោះ ហើយត្រូវបង់លុយអោយគ្រប់ស្ថាប័នទាំងអស់ទើបអាចឆ្លងដែនចូលបាន៕
