ភ្នំពេញ ៖ តាមរយៈវិទ្យុអាស៊ីសេរី កាលពីថ្ងៃទី១៤ ខែវិច្ឆិកា ឆ្នាំ២០១៨បានឲ្យដឹងថា៖មេធាវីលោក កឹម សុខា បានស្នើឱ្យតុលាការ លើកលែងការចោទប្រកាន់ ដើម្បីបើកឱកាសឲ្យកូនក្ដីរបស់ខ្លួន មានសិទ្ធិទៅព្យាបាលនៅក្រៅប្រទេស ។
លោក ផែង ហេងមេធាវិម្នាក់របស់លោកកឹមសុខា បញ្ជាក់ថា ស្ថានភាពជំងឺលោក កឹម សុខា បច្ចុប្បន្នគឺត្រូវការទៅព្យាបាលនៅក្រៅប្រទេសដដែល ក៏ប៉ុន្តែលោក កឹម សុខា នៅរង់ចាំតុលាការទម្លាក់ចោលការចោទប្រកាន់ជាមុនសិន ពីព្រោះថា លិខិតឆ្លងដែនរបស់លោក ក៏ត្រូវបានចៅក្រមដកហូតទុកដែរ។
លោកមេធាវី បញ្ជាក់ថា៖ «ក្រៅពីវីដេអូឃ្លីបដែលតំណាងអយ្យការយកមកធ្វើជាភស្តុតាង និងសាក្សីមួយ ចំនួន ដែលតុលាការយកមកសំអាង តែដោយសារតែនៅក្នុងនីតិវិធីស៊ើបអង្កេតខ្ញុំមិនចង់និយាយឲ្យលម្អិតទេ។ តែក្រោយពីមេធាវីត្រួតពិនិត្យមើល គ្មានភស្តុតាងណាដែលតំណាងអយ្យការយកមកចោទប្រកាន់នោះទេ»។
ទោះបីយ៉ាងណាសំណើនេះទំនងជាមិនអាចទៅរួចដោយសាកាលពីថ្ងៃទី៧ វិច្ឆិកាកន្លងទៅ សម្តេច ហ៊ុន សែននាយករដ្ឋមន្ត្រី បានយលព្រមភ្នាល់ជាមួយលោក សម រង្ស៊ី អតីតប្រធាននៃអតីតគណបក្សសង្គ្រោះជាតិ រឿងថា លោក កឹម សុខា នឹងត្រូវដោះលែងនៅចុងខែធ្នូខាងមុខនេះឬខែមិនាឆ្នាំ២០១៩ដោយដាក់ធ្ងន់ៗគឺសមរង្ស៊ីចាញ់សុខចិត្តចូលគុកនិងបើសម្តេចហ៊ុនសែនចាញ់ចុះចេញពីតំណែង។
លោក កឹម សុខា ត្រូវបានចៅក្រមស៊ើបសួរ សម្រេចឃុំខ្លួននៅគុកត្រពាំងផ្លុងកាលពីថ្ងៃទី៥ ខែកញ្ញា ឆ្នាំ២០១៧ ហើយត្រូវបានដោះលែងឱ្យនៅក្រៅឃុំ និងដាក់ឱ្យស្ថិតនៅក្រោមការត្រួតពិនិត្យ តាមផ្លូវតុលាការកាលពីថ្ងៃទី៩ ខែកញ្ញា ឆ្នាំ២០១៨នៅផ្ទះរបស់លោកក្នុងក្រុងភ្ណំពេញ។
ប្រធានអតីតគណបក្សសង្គ្រោះជាតិរូបនេះ ត្រូវបានចោទប្រកាន់ពីបទសន្និដ្ឋិភាពជាមួយបរទេស ជាប្រភេទបទល្មើសក្បត់ជាតិ តាមបញ្ញត្តិមាត្រា៤៤៣ នៃក្រមព្រហ្មទណ្ឌនៃព្រះរាជាណាចក្រកម្ពុជា ដែលបទឧក្រិដ្ឋនេះ មានទោសជាប់ពន្ធនាគារពី ១៥ឆ្នាំ ទៅ ៣០ឆ្នាំ។រឿងស។រឿងសុំដោះលែងនេះដែរក្រុមមេធាវីលោកកឹមសុខា ធ្លាប់បានដាក់លិខិតទៅចៅក្រមស៊ើបសួរសាលាដំបូងរាជធានីភ្នំពេញកាលពីខែមីនា ឆ្នាំ២០១៨ ស្នើសុំលើកលែងការចោទប្រកាន់លោក កឹម សុខា ក៏ប៉ុន្តែមកទល់ពេលនេះ មិនទាន់មានការឆ្លើយតបពីតុលាការនៅឡើយ។
