អាមេរិក៖ សារព័ត៌មាន CNN ប្តឹងទៅតុលកាលើលោក ដូណាល់ ត្រាំ និងមនុស្សជំនិតរបស់លោក៥នាក់ផ្សេងទៀត ក្រោយពេលដែលសេតវិមាន បានហាមអ្នកសារព័ត៌មានរបស់ខ្លួនម្នាក់គឺលោក Jim Acosta មិនឲ្យចូលយកព័ត៌មាននៅទីនោះ។
ក្នុងសេចក្តីប្រកាសព័ត៌មានកាលពីថ្ងៃអង្គារ៍ទី១៣វិច្ឆិកាសារព័ត៌មាន CNN បានលើកឡើងថា ការដាក់ពាក្យបណ្ដឹងរបស់ខ្លួនគឺដើម្បីចង់ឲ្យមានការសម្រេចពីតុលាការថាលោក Jim Acosta អាចចូលទៅយកព័ត៌មាននៅសេតវិមានវិញបាន ហើយធានាថាសេតវិមាននឹងមិនដកហូតសិទ្ធិចូលយកព័ត៌មានពីលោក Jim Acosta ទៀតទេនៅពេលអនាគត។ សេចក្តីប្រកាសព័ត៌មានដដែលរបស់ CNN ក៏បានហៅការហាមឃាត់លោក Jim Acosta មិនឲ្យចូលយកព័ត៌មាន នៅសេតវិមានថាបានរំលោភសេរីភាពសារព័ត៌មានដែលមានចែងក្នុងរដ្ឋធម្មនុញ្ញអាមេរិក។
អ្នកនាំពាក្យសេតវិមាន លោកស្រី Sarah Sanders បានចេញសេចក្តីប្រកាសព័ត៌មានភ្លាមៗឆ្លើយតបទៅនឹងការដាក់ពាក្យបណ្ដឹងរបស់សារព័ត៌មាន CNN ដោយថាបណ្ដឹងនេះធ្វើឡើងដើម្បីទាក់ទាញចំណាប់អារម្មណ៍តែប៉ុណ្ណោះ។ លោកស្រី បន្ថែមថាសេតវិមាននឹងធ្វើការការពារខ្លួនដោយម៉ឺងម៉ាត់ចំពោះបណ្ដឹងនេះ។
លោកស្រី Sarah Sanders បានលើកឡើងផងដែរនេះមិនមែនជាលើកទី១ទេ ដែលលោក Jim Acosta បញ្ចេញនៅឥរិយាបថមិនសមរម្យបែបនេះ។ លោកស្រី Sarah Sanders បន្ថែមទៀតថា សេរីភាពសារព័ត៌មានដែលមានចែងក្នុងរដ្ឋធម្មនុញ្ញមិនត្រូវបានធានានោះទេនៅពេលដែលអ្នកសារព័ត៌មានម្នាក់ក្នុងចំណោមអ្នកសារព័ត៌មានជាង១៥០នាក់ដែលចូលរួមក្នុងសន្និសីទសារព័ត៌មានមួយ ប៉ុនប៉ងសួរតែឯងផ្ដាច់មុខ។
សេតវិមាន និង សារព័ត៌មាន CNN មើលមុខគ្នាលែងត្រង់ បន្ទាប់ពីមានការប៉ះទង្គិចពាក្យសម្តីរវាងលោក ដូណាល់ ត្រាំ និង លោក Jim Acosta នៅក្នុងសន្និសីទសារព័ត៌មានកាលពីថ្ងៃទី៧ ខែវិច្ឆិកា ឆ្នាំ២០១៨។ ក្នុងសន្និសីទសារព័ត៌មាននោះ លោក Jim Acosta បានព្យាយាមសួរដេញដោលជាមួយលោក ដូណាល់ ត្រាំ ជុំវិញករណីជនភៀសខ្លួនមកពីបណ្ដាប្រទេសក្នុងតំបន់អាមេរិកកណ្ដាល ដែលនាំគ្នាមកធ្វើដំណើរជាក្រុមមានគ្នារាប់រយនាក់ក្នុងគោលបំណងស្វែងរកការងារក្នុងប្រទេសមិកស៊ីកូ និងសហរដ្ឋអាមេរិក។
លោក Jim Acosta បានហៅក្រុមមនុស្សទាំងនោះថាជាជនភៀសខ្លួន តែលោក ដូណាល់ ត្រាំ ហៅពួកគេថាជាអ្នកដែលឈ្លានពានអាមេរិកទៅវិញ។ លោក Jim Acosta នៅតែព្យាយាមតតាំងនឹងលោក ដូណាល់ ត្រាំ រហូតលោក ដូណាល់ ត្រាំ បញ្ជាឲ្យគេសហការីរបស់លោកយកមេក្រូចេញ ពីលោក Jim Acosta។ ភ្លាមៗក្រោយពីរារាំងមិនឲ្យលោក Jim Acosta សួរតទៅទៀត លោក ដូណាល់ ត្រាំ ថែមទាំងបាននិយាយថាវាជារឿងគួរអាម៉ាស់ ដែល CNN មានបុគ្គលិកដូចលោក Jim Acosta។
