ខេត្តកំពង់ឆ្នាំង៖រថយន្តធនធំមួយគ្រឿងដឹកអង្កាមពីលើឈើហ៊ុបធំៗពីក្រោមរួចពីខេត្តពោធិសាត់ត្រូវបានកម្លាំងសមត្ថកិច្ចចម្រុះខេត្តកំពង់ឆ្នាំងស្ទាក់ចាប់បាននៅម៉ោង ៤ រសៀល ថ្ងៃទី១១ ខែវិច្ឆិកា ឆ្នាំ២០១៨ នៅប៉ុស្តិ៍កងរាជអាវុធហត្ថខេត្តលេខ៥០១ ស្ថិតនៅក្នុងភូមិចំការស្វាយ ឃុំសេដ្ឋី ស្រុកសាមគ្គីមានជ័យខេត្តកំព់ឆ្នាំង ។
មន្ត្រីរដ្ឋបាលព្រៃឈើស្រុកកំពង់ត្រឡាចបានឲ្យដឹងថា ឈើ ដែលឈ្មួញបន្លំដឹកដាក់ក្នុងរថយន្តធំនេះ ជាប្រភេទដើមឈើ រាជឆ្កុលទាំង២ដើមនេះ មានប្រវែង១០ម៉ែត្រ និងមានមុខកាត់ទំហំ០,8០ ម៉ែត្រ និង១ដើមទៀតមានមុខកាត់០,7០ម៉ែត្រ។
រថយន្តដឹកឈើរាជឆ្កុលនេះម៉ាក FUSO ពាក់ស្លាកលេខ តាកែវ ៣A-២១៥៤ ជាប្រភេទរថយន្តភ្លៅ៥ ។ឈើរាជឆ្កុលនេះ មានអាយុកាលរាប់រយឆ្នាំ និងបានដឹកចេញពីស្រុកវាលវែង ខេត្តពោធិ៍សាត់ ឆ្ពោះទៅកាន់ប្រទេសវៀតណាម ។
ក្នុងពេលស្ទាក់ចាប់នេះ អ្នកបើកបរថយន្ត និងអ្នកនៅលើរថយន្តនេះចំនួន៤នាក់បានរត់គេចអស់ នៅសល់ម្នាក់ប៉ុណ្ណោះ ដែលជាព្រូរថយន្ត ។ប្រភពផ្សេងមួយទៀតបានឲ្យដឹងថា រថយន្តមួយគ្រឿងនេះគឺបានធ្វើសកម្មភាព រាល់ថ្ងៃ ដោយដាក់អង្កាមពីលើ ដឹកឈើពីខាងក្រោម ដឹកពីពោធិសាត់ រហូតដល់ភ្នំពេញ ធ្លាយដល់ព្រំដែនវៀតណាមទៀត ហើយបានបើករំលងសមត្ថកិច្ចគ្រប់កន្លែង ប៉ុន្តែលើកនេះ ប្រហែលជាភ្លេចទំនាក់ទំនងជាមួយអ្នកមើលផ្លូវ ទើបរថយន្តនេះ វឹលកង់មិនរួច ត្រឹមខេត្តកំពង់ឆ្នាំងចឹងនោះ ៕
