សៀមរាប៖ នៅព្រឹកថ្ងៃទី១២ ខែវិច្ឆិកា ឆ្នាំ២០១៨ឃឹម ប៊ុនសុង អភិបាលខេត្តសៀមរាបបានអញ្ជើញជាំអធិបតីប្រកាស លោក នួន ពុទ្ធារ៉ា អតីតនាយករដ្ឋបាលខេត្តសៀមរាប (កូនប្រុសលោកនួនបូផលបច្ចុប្បន្នអនុប្រធានអពព)ឲ្យចូលកាន់តំណែងជាអភិបាលក្រុងសៀមរាបជំនួនលោក លោក សូរ ប្លាតុង អតីតអភិបាលក្រុងសៀមរាប ត្រូវបានផ្ទេរ ទៅកាន់ជាអភិបាលស្រុកប្រាសាទបាគង ជំនួសលោក ម៉ក់ សំភារ អតីតអភិបាលស្រុកប្រាសាទបាគង ដែលត្រូវបានចូលនិវត្តន៍ ។
នេះបើផ្អែកតាមអនុក្រឹត្យលេខ ១០២៣ អនក្រ.តត ចុះថ្ងៃទី០២ ខែវិច្ឆិកា ឆ្នាំ២០១៨ ស្ដីពីការផ្ទេរភារកិច្ច និងតែងតាំងមន្ត្រីរាជការ ដែលចុះហត្ថលេខា ដោយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា។
លោក ឃឹម ប៊ុនសុង បានប្រាប់ថា ការផ្លាស់ប្ដូរលោក សូរ ប្លាតុង ពីក្រុងសៀមរាប ទៅស្រុកប្រាសាទបាគងនេះ មិនមែនលោកមានកំហុស ក្នុងអាណត្តិលោកឡើយ ផ្ទុយទៅវិញ លោក សូរ ប្លាតុង បានបំពេញការងារយ៉ាងល្អ និងគួរយកគំរូតាម ខណៈដែលស្រុកប្រាសាទបាគងនេះ ជាក្រុងរណប របស់ខេត្តសៀមរាប ហើយត្រូវការបុគ្គលដែលមានសមត្ថភាព និងបទពិសោធន៍ទៅគ្រប់គ្រងដើម្បីចូលរួមអភិវឌ្ឍន៍តំបន់នេះឲ្យកាន់តែខ្លាំងឡើង។
អភិបាលខេត្តសៀមរាប បានសង្ឃឹមថា លោកអភិបាលស្រុកប្រាសាទបាគងថ្មីនេះ នឹងខិតខំយកចិត្តទុកដាក់កសាងប្លង់គោល ប្រើប្រាស់ដីធ្លីឲ្យបានឆាប់រហ័ស សម្រាប់ប្រើប្រាស់នៅ ក្នុងកិច្ចសហប្រតិបត្តិការជាមួយក្រុងសៀមរាប ដែលបច្ចុប្បន្ននេះបានកសាងប្លង់គោលប្រើប្រាស់ដី រួចរាល់ហើយ ដែលនឹងត្រូវអនុវត្តនៅឆ្នាំ២០១៩ខាងមុខ និងជំហានបន្ទាប់នៅក្នុងផែនការពង្រីកទីក្រុង ឲ្យក្លាយជាទីក្រុងទេសចរណ៍មួយដែលមានសោភ័ណ្ឌភាព ដូចនេះស្រុកប្រាសាទបាគង គឺស័ក្ដិសមជាទីបំផុត។
